¹ Kanana bado, yua n den kua niganu po, Aradi dogu nni yeni, ń den gbadi ke Israyeli yaaba paa u sanu nni, ki caa Atarima, o den tuogi ba, ki pua yen ba bu tɔbu, ki cuo nitianba, ki luoni ba li kpaadidieli nni. ² Israyeli yaaba den poli ki niani O Diedo, ki yedi, "A ya tuo ki todi ti, ke ti kɔni, ki paadi ya niba ne, ti ba pua ki mudi li diema yeni bi dociami cain." ³ O Diedo den cengi Israyeli yaaba miabu, ki cedi ke bi kɔni ki paadi Kanana yaaba. Bi den kpa ba boncianla, ki mumudi bi dociami, ki yini likani, Horma, lani n tie ban bolini ya dogu cain. ⁴ Bi den ñani Hori juali po, ki taa li mɔgmɔnli sanjali, yaali ki gedi ya diema n kaagi Edomi diema nni. Li nitaanli pali den wadi, u sanu nni. ⁵ Bi den bulni, ki gagi U Tienu yeni Moyiisi, ki tua, "Be n cedi ke a ñani ti Ejipti diema nni, ki cua yeni ti ya fanpienma ne nni ke tin kpe ee? Jieŋanma ki ye, ñima mo ki ye, ti nan miadi ti jieyuoyuodi ne o." ⁶ Lanwani ii, O Diedo den den jiini bi siiga nni ya wee n pia ti lɔbibiardi. Li wee den jundi bi niba ke bi kpenli. ⁷ Li nitaanli den cua ki la Moyiisi, ki yedi o, "Ti tieni ti tuonbiadi, kelima ti den bulni ki gagi O Diedo yeni fini. Jaandi ki mia O Diedo wan fagni i wee ne ti kani." Lanwani ii, Moyisi den jaandi li nitaanli po, ⁸ O Diedo den yedi Moyiisi, "Cedi ban tagi waa, ŋan tabni o ya daacaadu n fagi po, ki caani u. Li ya tie ke waa juni yua, ke o yaadi ki diidi li waa, o ba paagi." ⁹ Lanwani ii, Moyiisi den duadi ti kumɔndi, ki tagi waa, ki tabni o daacaadu po, ki caani u. Li ya tie ke waa juni nilo, ke o yaadi ki diidi ti kumɔndi waa, o yi paagi i. ¹⁰ Lanwani ii, Israyeli yaaba den tugni bi cenli, ki gedi ki ban caani bi jondi Oboti dogu nni. ¹¹ Bi den ñani lankani, ki gedi Iye Abarima, ya fanpienma n kaagi ku mɔgciangu puoli yeni nni. ¹² Bi den ñani lankani, ki gedi ki caani bi jondi Seredi jualɔngu nni. ¹³ Bi den ñani lankani, ki cuoni ki puodi Arinoni kpenu yu n ñani Amori yaaba diema nni, ki pundi mi fanpienma nni, ki gedi ki caani bi jondi. Arinoni kpenu n den ye Mowabi yaaba diema yeni Amori yaaba diema siiga, ki tie bi bianu. ¹⁴ Lanyapo i, ke O Diedo tɔbu tili nni, li den diani ki yedi, "Wahebi, Sufa nni yeni li kpentaana yeni Arinoni yeni u mo ya kpentaana. ¹⁵ li juali jiidma, ki ya caa Ari dociamu po ki jiidi ki pundi Mowabi diema bianu." ¹⁶ Bi den ñani lankani, ki gedi Beyeri, lankani ke li caali ye, O Diedo den yedi Moyiisi, "Taani li nitaaanli, min teni ba mi ñima." ¹⁷ Israyeli yaaba den yini ya yanbu ne: "Caali, wugdi a ñima. Yiini mani i yani lipo. ¹⁸ Ti yudanba ń den gbiidi ya caali, bi bulcindanba ń gbiidi ya caali yeni O Diedo gbiamu, yeni bi bali gbiami." Bi den ñani mi fanpienma nni, ki gedi Matana. ¹⁹ Bi den ñani Matana, ki gedi Nahaliyeli, ki ñani Nahaliyeli, ki gedi Bamoti, ²⁰ ki ñani Bamoti, ki gedi Mowabi yaaba diema jualɔngu nni. Lankani i ke Pisiga juali yuli yiini mi fanpienma po. ²¹ Israyeli den sɔni a tonda Amori yaaba bado,Sihɔn kani, ki yedi o, ²² "Cabi ti tin pɔndi a diema. Ti kan tɔgni i kuani yeni ku daamɔngu tiidi kuani nni. Ti kan ñu i caana nni ñima. Ti baa li kubi li sanjali i, ti sancenli nni hali ki ban kadi a diema bianu." ²³ Ama, o bado Siyɔn den ki tuo ke Israyeli yaaba n pɔndi o diema. O den taani o tɔtieba ki gedi ki tuogi Israyeli yaaba mi fanpienma nni. O den cua Yahati dogu nni, ki tuogi Israyeli yaaba bu tɔbu. ²⁴ Israyeli yaaba den fiini ti jadi yeni ki jugsiega, ki pua ki paadi ba ki diedi bi diema, ki cili Arinoni kpenu, ki ban tuoni Jaboki kpenu, hali yeni Amoni yaaba diema bianu. Amoni yaaba diema bianu po den pia li bilinguonli. ²⁵ Israyeli yaaba den fie Amori yaaba dociami kuli, ki kua ki kali li dogi nni kuli yeni Hecibɔn dogu nni yeni li tinkundogi nni kuli. ²⁶ Hecibɔn den tie Amori yaaba bado, Siyɔn dociamu. Wani n den tuogi Mowabi bado bu tɔbu. Siyɔn den fie o diema kuli, ki cili o diema bianu, ki ban tuoni Arinoni kpenu. ²⁷ Lanyapo i ke li diani Mi kpanjama tili nni, ki yedi, "Cua mani Hicibɔn. Cua mani tin guani ki maa o bado Siyɔn dociamu, ki kua u niinni. ²⁸ U mu den ñani Hecibɔn, ki liabi, u mupienu den ñani o bado Soyɔn dociamu nni, ki dini Mowabi diema nni dociamu, Ari, ki bolini Arinoni juaciana yaa kpedi boncianla yeni. ²⁹ Sola, yinba Mwabi yaaba po! I bia n yeni yinba ya nibuoli n ŋua k pugi o bulo Cemoci. O cedi ke o bijaba sani ki yaadi, ke o bisiaba mo tua Amori bado, Siyɔn yonbi. ³⁰ Ama, ti kɔni ki paadi Siyɔn. Ti bolini Hecibɔn, ki ban tuoni hali Dibɔn. Ti pua ki paadi ba i kaani kuli hali yeni Nofa, hali yeni Medeba kuli. ³¹ Israyeli yaaba ji den kua Amori yaaba diema nni i. ³² Moyiisi den sɔni bi jaba ke ban diidi Jaseri dogu ń tie maama. Bi den gedi ki paadi u, ki diedi yeni u tinkundogi kuli, ki deli ki ñani Amori niba, yaaba kua i niinni. ³³ Bi den yuandi ki pegdi, ki taa Bacani sanjali. Bacani bado, Ogi, yeni o tɔgoli kuli den bobni bu tɔbu, ki tuogi ba, ki ba kɔni yeni ba Edreyi dogu nni. ³⁴ Lanwani ii, O Diedo den yedi Moyiisi, "ŋan da jie ba, kelima, N taa ba, wani, o tɔgoli yeni o diema kuli ki tieni a nuu nni, ke ŋan baa o yeni ti kpiagdi. ŋan tieni o, nani ŋan den tieni Amori yaaba bado, Siyɔn, yua den kua Hecebɔn, maama yeni." ³⁵ Lanwani ii, Israyeli yaaba den kpaa Bacani bado Ogi, yeni o bijaba, yeni o jakɔnda kuli, ke bá niyendo ki sani ki ciadi. Bi den yuandi ki diedi o diema.