¹ Balaama den yedi Balaka, "Maa padbinbinda lele, nekanba, ki bobni naatona lele yeni patona lele, li padli po." ² Lanwani ii, Balaka den tieni Balaama ń den buali o yaali. Balaka yeni Balaama den yuandi ki padi naatonli yeni patonli, padbinbindli kuli po. ³ Balaama den yedi Balaka, "Sedi ki guudi a padjuukaana, min piadi waamu. Li ki kandi O Diedo ba cua ki tuogi nni, o ya yedi nni ya maama kuli, n ba waani a." Lanwani ii, o den fuadi, ki doni li juali yuli po, tiidi n ki ye naani. ⁴ Wan den ye li juali yuli po ya yognu, O Diedo de tuogi o, ke Balaama yedi o, "N cedi ke o maa padbinbinda lele, ke n padi naatonli yeni patonli padbinbindli po kuli." ⁵ O Diedo den kuani mi maama Balaama ñɔbu nni, ki yedi, "Guani Balaka kani, ki yedi o ya maama ne." ⁶ Lanwani ii, Balaama den guani Balaka kani, ke o see o padjuukaana kani, ke Mowabi nikpelba kuli ye yeni o. ⁷ Balaama den cili ki pua sawali, ki yedi, "Balaka taa nni Arama ki cua yeni nni, Mowabi bado cedi ke n ñani hali puoli juana po, ke o yedi, 'Cua na, soli npo Jakɔbo puolŋuani,' O yedi, 'Cua na ki wuli a pabienli Israyeli yaaba yuli po.' ⁸ N na ba tieni ledi i, ki soli, U Tienu ń ki soli yaaba? N ba tieni ledi i, ki bieni n pali O Diedo ń ki bieni o pali yaaba ya po? ⁹ Kelima, n see a juatna po, ki nua ba; N see a juabila po, ki nua ba. Diidi ya nibuolu n paadi ki ye bibá, kaa taa yeni ya nibuoli n sieni. ¹⁰ ŋma ba fidi ki cɔdi Jakɔbo puolŋuani yaaba n yabi nani i kpentanbiini yeni? Bá bi ya bɔgdi bi nitaanli taalma na, ŋma ba fidi ki cɔdi kaanyendu ya niba? Cedi mani min kpe o niteginka kuuma, N miali mo ya juodma ń tua nani bi yaali yeni.!" ¹¹ Balaka den yedi Balaama, "A tieni nni be n yeni ii? N yini a ke ŋan soli n yibalinba, ama, ke a nan yadi bipo mi yediŋanma." ¹² Balaama den jiini, ki yedi, " N kan fangi n yuli ki yedi O Diedo ń kuani ya maama n ñɔbu nni ka aa?" ¹³ Balaka den yedi o, "N mia ŋa ke ŋan cua tin gedi kaantianu, naani ke a ba ŋanbi ki la ba. Nekanba, a nua bi jondi kuni baba i, ŋaa nua bikuli. Lanpo, a ba la bikuli, ŋan ban soli ba, lipo, npo. ¹⁴ Lanwani ii, o den taa Balaama ke bi doni Pisiga juali yuli po, ki kua Sofima kuanu nni, o go den maa padbinbinda lele. O den padi padbinbindli kuli po naatonli yeni patonli. ¹⁵ Balaama den yedi Balaka, "Ya see a padjuukaana kani, min gedi nepo, ki tuogi U Tienu ki guani." ¹⁶ O Diedo den tuogi Balaama, ki kuani mi maama o ñɔbu nni, ki yedi, "Guani Balaka kani, ki yedi o n tondu." ¹⁷ Balaama den guani o kani, ke o see o padjuukaana kani, ke Mowabi nikpelba see o kani. Balaka den buali o, "O Diedo yedi be i?" ¹⁸ Balaama den cili ki pua sawali, ki tua, " Balaka, Fii ki sedi, Sipori bijua, diadi a tubli, ki cengi nni. ¹⁹ U Tienu ki tie nilo ka, ki baa pua mi tofaama, O nan go ki tie nisaalo ka, ki baa lebdi yognu kuli o yantiali. O kpeli ki niani ñɔnianu, kaa tiadi ki kuani u lan buali maama aa? O kpeli ki maadi maama, kaa tieni wan yedi yaali ii? ²⁰ Diidi, O bili nni li ñɔbonli, ke min yadi mi yediŋanma bipo i. U Tienu puni ba li seli, n kan fidi ki lebdi libakuli. ²¹ U Tienu ki la Jakɔbo tuonbiadi, o ki la Israyeli tagli. O Diedo bi Tienu ye bi siiga nni, Bi yigni yeni li pamanli, kelima, bi badciamo ye bi siiga. ²² U Tienu ñani ba Ejipti diema nni, yeni o muanua paalu. ²³ Suagu ki ye, ki ba nandi ki guli Jakɔbo. Jababuli ki ye, ki ba tieni Israyeli bonbiadli. Ama, bi ba yedi Jakɔbo puoliŋuani po, 'Diidi U Tienu ń tieni bipo yaali!' ²⁴ Diidi, li nitaanli fii ki sedi nani o yangbanñua yeni, nani ku yangbanjagu ń yi fii maama, ki cuo wan beli yaali yeni. O kan duani kaa ŋmani wan cuo yaali ya nandi, kaa go ñuni o sɔma mo." ²⁵ Lanwani ii, Balaka den yedi Balaama, "A ya kan soli ba, ŋan nan da selgi ba wani." ²⁶ Ama Balaama den jiini o, ki yedi, "Mii yedi a ke N ba yedi O Diedo ń waani nni ke min yedi yaali ka aa?" Balaama gaali Israyeli yaaba mi taataama. ²⁷ Lanwani ii Balaka den guani ki jiini Balaama, "Cua na tin go gedi kaantianu. Li ki kandi lanpo, U Tienu ba tuo npo, ŋan soli ba." ²⁸ Lanwani ii, Balaka den taa Balaama, ke bi doni Pewori juali, yaali n yiini mi fanpienma po yeni, yuli po. ²⁹ Balaama den yedi Balaka, "Maa npo padbinbinda lele, nekanba, ki bobni naatona lele yeni patona lele." ³⁰ Balaka den tieni nani Balaama ń yedi o maama yeni; o den padi naatonli yeni patonli padbinbindli po kuli.