¹ O Diedo den yedi Haarɔn, "Fini, a bijaba yeni a yaaja cugli nni yaaba, yinba n baa tie yaaba n ba tugi ya tuonbiadi n tieni u kaangagdiŋamu nni ya tagli. Ama, fini, yeni a bijaba, yinba baba n ba tugi ya tuonbiadi, ke nilo tieni salga yidma tuonli nni. ² Li ya tie a kpiiba, Lefi buolu yaaba po, li buali ke ŋan nagni ba a kani, ban ya todi a, ya yognu ke fini yeni a bijaba tuuni li gbandieli nni, a ñɔmaatana ŋantaadikpagu nintuali. ³ Bi baa todi a, ki todi li gbandieli nnituona kuli. Ama, bi kan nagni ya bona n ye u kaangagdiŋamu nni, bii li padbinbindli tuonsɔntiadi kani, Lanyaaka, bani yeni fini kuli ba kpe i. ⁴ Bi ba nagni a, ki ya todi a u kadkaanu gbandieli tuona nni, yeni ya tuona n nua li gbandieli ŋanbima yeni li bonbaanbidi kubma. nilamo kan nagni yin tuuni naani. ⁵ Fini n baa tugi u kaangagdiŋamu yeni li padbinbindli tuona kuli, lani n tie, n pabienli ń go da ti jiidi Israyeli yaaba yuli po. ⁶ Diidi, Mini nba n gandi Lefi buolu yaaba Israyeli buoli kuli siiga. Bi tie ŋan bobni yaaba nani paabu yeni, ki puni mini O Diedo, ke ban ya tuuni u kadkaanu gbandieli tuona. ⁷ Ama, fini yeni a bijaba baba n baa tuuni salga yidma tuona yeni ya tuona n nua li padbinbindli yeni u kaangagdiŋanmɔnu nni, bu kpaldɔginkaaba ń duagi yaali kuli po. Yinba n baa tugi li tuona yudandi, ki tuuni li tuona kuli. N puni yinba i salga yidma tuona kuli, ke li tie i paabu. Nilamo, yua n ki tie Haarɔn diegu nni yua ya nagni likani, o ba kpe i. ⁸ Lanwani ii, O Diedo den yedi Haarɔn, "Diidi, Mini n puni a ti yikodi, ke ŋan diedi ban gagdi ki puni nni ya paabu kuli, yeni Israyeli nitaanli ń gagdi ya paabu mini O Diedo po kuli. N puni fini yeni a bijaba, ke li paabu ń tua i ya biini hali ya yogu ń tuu ya yogu kuli. ⁹ Ya bona n gagdi ki ŋani hali boncianla n ne, ya paabu ke baa juu li padbinbindli po ki gbeni: ban gagdi ya paabu kuli mini O Diedo po; mi jiema paabu, ti tuonbiadi sugli miabu pada, i tagli guaŋanbima pada; Lanya bona gagdi ki ŋani boncianla fini yeni a bijaba po. ¹⁰ Lanya paabu gagdi ki ŋani boncianla; li buali ke a bijaba yaaba n gagdi ki ŋani apo kuli ń di li paabu jiema. ¹¹ Ya paabu n tie a ya biinu n ne: Israyeli yaaba ń gagdi ki puni nni ya paabu, ban bobni ya paabu a bogda yeni li padli po. N puni a lankuli, fini yeni a bijaba yeni a bisiaba, bun tua a biinu hali ya yognu ń tuu ya yognu kuli. Yua n gagdi ki ŋani, a diegu nni kuli, ba fidi ki di li paabu jiema. ¹² Min go puni a yaali n ne: mi kpama nni kuli mi kpaŋanma ku daamɔngu nni kuli ku daamɔnŋangu yeni li bonluonkaali bonkpiala kuli, ban puuni nni ya tiidi luankpiala. N puni lankuli. ¹³ Ban kpendi yeni ya kpaandi jiepaandi kuli tie a ya biinu i. Yua n gagdi ki ŋani a diegu nni kuli ba fidi ki di li paabu jiema. ¹⁴ Israyeli diema nni, ban gagdi yaali O Diedo po kuli tie a ya biinu i. ¹⁵ Pia miali kuli ya bikpiaga, ban puni O Diedo yaaga kuli, bi niba yeni ti yandi kuli ya bikpiamu tie a ya biinu i. Ama, li buali ke bi niba n daa ki faabi bi bonjakpiala yeni ya yanga n jɔgni bontonkpiga. ¹⁶ Ban ba daa ki faabi yaaba, li buali ke ban daa ki faabi ba ke bi pia ŋmaayendo i. Lanwani ii, bi niba ba pa bonjaga po, dibala mu i, u kaangagdiŋamu nni dibala ke yenli kuli kpiagu tie grami piiga (g 10), ki daa ki faabi ba. ¹⁷ Ama, yaali n tie nua ya bikpiaga, pia ya bikpiaga yeni ŋuabo ya bikpiaga wani ii, i kan daa ki faabi lanya yandi bikpiamu. Lan ya yandi gagdi ki dagdi O Diedo po i. Li buali ke lan padi li yandi, ki miimii bi sɔma li padbinbindli po, ki juu bi kpama ki puni O Diedo ya nuulmanu n ba mangi o pali. ¹⁸ Li padyandi nandi tie a ya biinu i. Nani li bengunli yeni li jientaali yeni, lanya nadi kuli mo tie a ya biinu i. ¹⁹ Israyeli nitaanli ń gagdi ki puni nni ya paabu kuli, n puni fini yeni a bijaba yeni a bisiaba, li paabu baa tie a ya biinu i hali ya yognu ń tuu ya yognu. Li tie ya ŋantaado n loli O Diedo nintuali, kaa pia fidima, Mini O Diedo yeni fini yeni a puolŋuani siiga, hali ya yognu ń tuu ya yognu i." ²⁰ O Diedo den yedi Haarɔn, "A ji ki pia biinu mi diema tinfanma nni, nani faali, a go ki pia a bonceli, li nitaanli bonpiakaali siiga. Mini n tie a biinu yeni a faali Israyeli nitaanli siiga. ²¹ Diidi, yinba Lefi buolu yaaba, n puni yi Israyeli yaaba ń pa binli kuli ya binli pani, yini n ba tua i faali, ki tua ipo u kadkaanu gbandieli kani tuona ñuñuudi. ²² Lan cili dinne, ki ya caa, Israyeli yaaba ji kan nagni u kadkaanu gbandieli, ki da ti tieni tuonbiadi, likani, ki kpe. ²³ Lefi buolu yaaba baa tuuni ya tuona n tie u kadkaanu gbandieli tuona. Bani n ba tugi ya tuonbiadi n ba tieni likani kuli ya tagli bi yula po. Li tie ya ñɔbonli n bili bi po yeni bi puolŋuani po hali yeni ya yogu n ki pia gbenma i. Baa ji pia faaliba kuli Israyeli yaaba siiga. ²⁴ Israyeli yaaba ń pa ya binli lonpo, O Diedo po yeni, n puni ba lanya pani i, yini n tie bi ya faali. Lanyapo i, ke n yedi ba, 'Bi ji ki pia faaliba kuli Israyeli yaaba siiga.'" ²⁵ O Diedo den maadi yeni Moyiisi ki yedi ²⁶ "ŋan maadi yeni Lefi buolu yaaba, ki yedi ba, 'I ya ga Israyeli yaaba ń pa bi binli lompo, min puni yi ya biinu ke u tie i faali yeni, li buali ke yin waani O Diedo nintuali, ki puni O Diedo li pani bɔgdima taalma piiga po, taalyenma, lan tua imo ya pugdi li binli nni. ²⁷ Li pugdi baa tie ipo nani jiepaandi paabu bii ku daamɔngu tiidi paabu binli nni yeni i. ²⁸ Lanwani ii, imo baa puuni O Diedo i paabu, ke bu tie i binli pugdi, yin gaani Israyeli yaaba kani ya binli pani yeni. I ya ga bi kani, li pani, yin teni Haarɔn, salga yidkaciamo i ya pugdi. ²⁹ Yin baa gaani ya paabu nni, li buali ke yin ñani ya paabu n gagdi ki dagdi O Diedo po. Yin ñani yaali n gagdi ki ŋani hali boncianla, ki puni O Diedo yeni ti cɔlindi, ban teni yi ya paabu yeni niinni.' ³⁰ Ama, ŋan go yedi ba, 'I ya waani O Diedo yaali n pia mayuli, yin ga ya paabu siiga, li baa tie Lefi buolu yaaba po nani o kpaalo ń yi ñani o jalu nni ti jiepaandi, bii ku daamɔngu daano ń tuodi o daamɔngu, ki teni O Diedo ya daapaanma yeni i. ³¹ I ya teni i paabu, ke ya jiedi n sieni, i ji ba fidi ki di yin bua naani kuli, kelima, yin tuuni u kadkaanu gbandieli kani yeni, imo ya binli pani n yeni ³² I ya ñani i pugdi, ki waani O Diedo, ki puni o i paabu, i ji ba fidi ki di li jiema yin bua naani kuli ke laa ji pia tagliba kuli, Ama yin da biidi Israyeli yaaba paabu yaabu n gagdi O Diedo po, lani n tie yin da kpe mo.'"