¹ O Diedo den Maadi yeni Moyiisi yeni Haarɔn, ki yedi, ² "Ne tie yiko i, ñɔbonli i, ke n bili yi: Yin yedi Israyeli yaaba ke ban cua yeni ya naañuamɔno n ki pia yiagu, kaa pia pɔdiba kuli, ke baa kpeli ki bugini o naadaagu. ³ Yin teni salgayidkaciamo, Eleyasari li naanua. Wan ñani li nua ti jondi niinpo, ki cedi nilo ń kodi o o nintuali. ⁴ Salga yidkaciamo, Eleyasari ba tuu o nuubili o sɔma nni, ki teli u kadkaanu gbandieli liiga po, ki miimii taalma lele. ⁵ Salga yidkatiano n ba juu o nua, ke Eleyasari nunbu nni. O ba juu o gbangu, o nandi, o taana yeni o sɔma kuli. ⁶ Salga yidkaciamo ba taa sedili benu, Isopi beni yeni u gaalmɔnu, ki lu ban juu o nua ya mu yeni nni. ⁷ O ba yuandi ki ŋuudi o tialakaadi, ki go wuli. O ba yuandi ki kua ti jondi nni, ki ya ye ti jɔgindi nni hali yeni ku yenjuogu. ⁸ Ya salga yidkaa n juu o naañua yeni, ba ŋuudi o tialakaadi, ki wuli, ki ya ye ti jɔgindi nni hali yeni ku yenjuogu. ⁹ Yua n ki jɔgni o yuli, ba taani o nua fantanma, ki baa naankani n ŋani, ti jondi niinpo. Li fantama baa ye Israyeli yaaba nitaanli po i. Bi baa ŋmadi li fantama mi ñima nni, ki ya ŋuudi ki ŋanbdi yaaba n tieni ti tuonbiadi, kelima li fantama tie ti tuonbiadi sugli miabu ya padli fantama i. ¹⁰ Yua n ba taani ki wodi mi fantama yeni, ba ŋuudi o tialakaadi, ki wuli, ki ya ye yeni ti jɔgindi hali yeni ku yenjuogu. Li baa tie Israyeli yaaba po yeni ya nilanba n ye bi siiga kuli ya ñɔmaama n ki pia miidma hali ya yognu kuli. ¹¹ Yua n sii nikpiemo kuli baa ye yeni ti jɔgindi hali dana lele i. ¹² Li nili ba ŋuudi ki ŋanbi o yuli, li daataali daali yeni li daaleleli daali yo, ki fidi ki ña o jɔgindi nni. Ama, o ya ki ŋuudi ki ŋanbi o yuli, li daataali daali, lanwani ii o kan fidi ki ña ti jɔgindi nni li daaleleli daali. ¹³ Yua n sii nikpiemo, kaa ŋuudi ki ŋanbi o yuli, li nilo jɔgni O Diedo kaangagdiŋamu i. Li buali ke ban ñani li nilo Israyeli yaaba siiga, kelima baa mii mi ŋuudiŋanbima ñima opo. O baa li ye yeni o jɔgindi i, o yema kuli baa tie jɔginyema i. ¹⁴ Nilo ya kpe jongu nni ya ñɔbonli n ne. Yua n kua li jongu nni yeni yua n bi ye li jongu nni mi kuuma yognu kuli, baa ye yeni ti jɔgindi i, hali dana lele. ¹⁵ Ya tiagu n ye li jongu nni, kaa ŋuagi, kaa pia bonbiili kuli jɔgni n yeni. ¹⁶ Li go tie yenma i, yua n sii ban kpa yua yeni ki jugsiega, bii, nikpiemo, bii nilo kpabli, lanyaaka o kakuli. li nilo baa ye yeni ti jɔgindi i, hali dana lele. ¹⁷ Yin ba tieni maama ki ŋanbi yua n ye ti jɔgindi nni n ne: Yin taa ban padi ya naañua, ti tuonbiadi sugli po yeni fantama, ki tieni tiagu nni, ki ga li ñinbunli ñima, ki pugni. ¹⁸ Yua n ki ye yeni jɔgindi, ba taa Isopi benu, ki tuuni mi fantanñima nni, ki miimii li jongu po yeni ya tiadi n den ye li jongu nni kuli, yeni ya niba n den ye li jongu nni kuli yeni yua n sii kpimo, bii nikpabli, yeni o kpiemo po yeni o kakuli po. ¹⁹ Li daataali daali yeni li daaleleli daali, yua n ki ye yeni jɔgindi ba miimii yua n ye yeni ti jɔgindi po. Li daaleleli daali, yua n ye yeni ti jɔgindi ba ŋanbi o yuli. O ba ŋuudi o tialakaadi, ki wuli. Yeni ku yenjuogu kuli li ba sua ke o ŋanbi o yuli. ²⁰ Ama, yua yie kaa ŋanbi o yuli, ki ye o jɔgindi nni, li buali ke ban ñani li nilo li nitaanli siiga, kelima o jɔgni O Diedo kaangagdiŋamu. Baa miimii opo ti jɔgindi ñima, lanwani ii, o ye yeni jɔgindi i. ²¹ Lani n tie maabilkaama bipo ya yogu ń tuu ya yog kuli. Yua n miimii ti jɔgindi ñima yeni, ba ŋuudi o tiadi. Yua n sii ti jɔgindi ñima, baa ye yeni ti jɔgindi hali yeni ku yenjuogu. ²² Yua n ye yeni jɔgindi ya sii ya bonli kuli, limo jɔgni n yeni. Yua n sii li bonjɔgindi kuli mo baa ye yeni ti jɔgindi, hali yeni ku yenjuogu.