¹ O Diedo den maadi yeni Moyiisi, ki yedi, ² "Maadi yeni Israyeli nitaanli, ki ga bi gbiami na, buolu kuli baa pia o gbiamu i, lan taani piiga n gbiami lie. ŋan diani buolu kuli yeli o gbiamu po. ³ ŋan diani Haarɔn yeli Lefi yaaba gbiamu po. Buolu kuli baa pia gbayendu i, ke o yudaano yeli diani upo. ⁴ ŋan bili li gbiami kuli, u kadkaanu gbandieli nni, ku ŋantaadikpagu kani, min kadi yeni a naankani yeni. ⁵ I ba la min ba gandi ya buolu yudaano gbiamu ba bundi. Lani n ba cedi Israyeli yaaba ń bulni ki gagi yeni nni yeni, lan gbeni, ŋma go ba fii ki yie apo." ⁶ Lanwani ii, Moyiisi den maadi yeni Israyeli yaaba. I buoli kuli yudanba den teni bi gbiami, yudaano kuli yeni o gbiamu, u buolu ń gandi yua. Likuli den taani piiga n gbiami lie i. ⁷ Moyiisi den bili li gbiami kuli a ñɔmaatana kpagu gbandieli nni. ⁸ Lan fiifaa, Moyiisi den kua a ñɔmaatana kpagu gbandieli nni, ki diidi ki sua be i ! Lefi buolu yua, Haarɔn gbiamu n den bundi. U den pudi mi bundpanma, ki puuni, ki loni Amandie bonluana yaa beni! ⁹ Moyiisi den ñani ya gbiami kuli n den ye O Diedo nintuali yeni, ki waani Israyeli nitaanli kuli, ke buolu yudaano kuli taa o gbiamu. ¹⁰ O Diedo den yedi Moyiisi, "Bili Haarɔn gbiamu ku ŋantaadikpagu kani. ŋan ŋa li gbiamu ń ya bili likani, ki tie Israyeli nitaanli ń fiini mi yiema O Diedo po, ki tugi ya tagli bontiadkaali, lani n tie bi bulmi ń gbeni, lanyaaka, bi ba kpe i. ¹¹ Moyiisi den tieni nani O Diedo ń waani o maama yeni. ¹² Israyeli nitaanli den maadi yeni Moyiisi, ki yedi, "Ti ba kpe nekanba i. Tikuli ba bodi cain! ¹³ Yua n li fii ki nagni O Diedo gbandieli kuli se wan kpe. Tikuli ba kpe yeni yo oo?"