¹ Darius kəxɔ́ əfíɔ̀ zikpɛn án, əcán amə katɔn. ² Í ìcɔ̀ amə amɔ̀ntɔ̀n kə Daniel lə ŋ́kɔ́ nə́wò, í wò jonə́ akɔntá nɛn. ³ Daniel wùgan wò séé, ɖóbé Mawu mə nunyan sunsí. ⁴ Gaŋ́nan mə án, amə kpɔ̀tià wò códé́ŋ́ ílə́ jíbə́ nán jágɔ də́ əfíɔ́. Wó wɔ̀kəkə́ íglo, agɔ̀ jəjə ɖəkɛn ŋ́lé ŋ o. ⁵ Amə a wò lə nùbé, mìan jì nyɔn nə́ to yé Mawu sɛnsɛn mə. ⁶ Dumə məgan kidé wo kpəɖəŋtɔ̀ wò bɔ́ í và yi əfíɔ̀gbɔ̀, í lə nùnə́ bə́: Darius fiɔ nɔ́n agbə tɛ́gbɛ́ɛ́! ⁷ Dufíɔ wò kìdé wò cami va ɖə sùsù bəyéwoa ɖə əsə̀ sɛn ŋ́ ɖəkà dó bé, lə́ ŋ̀kə̀kə́ əgban gbramə án tovo nə́ əwo ɔ əfíɔ o. Nə́ aməɖə dale əsə̀ à jíà, woa cɔ̀ɛ̀ í sə́ daŋkpíde jaŋ̀tá wòb domə. ⁸ Àkaaka wo ɖə əsə̀à dò nán tɔ́ ədɔ́wɔ̀wɔ̀ lə ədùa sééé mə kə amədə́ ŋkaà dàlə́ ji o. ⁹ Ǝfíɔ̀ Darius ŋrɔ́n wə́mán í dasí de ji. ¹⁰ Gakəmə Daniel nyán bə́ wò ɖə əsə́ a dò à, í ì có lə́ yé xòmə̀, í yii yé xɔmə lə́ asanŋun ji kəwò ɖə̀ yé xɔxɔnu də Jérusalem kpají; í zətɔn gbəɖəkà a jəcró í nán də́nùgù nə́ yé Mawu sìgbə̀ ì wɔnə̀ ɖə̀cà ənə̀. ¹¹ Amə ŋ̀nán wòzɔ́n kpitikpiti, í vɛ́ kpɔɛ́, í ì lə̀ kloji, ilə̀ də̀nùgù nə̀ Mawu. ¹² Wò sùdù yi əfíɔ̀ gbɔ́, í lə́ bíɔ́sə̀ bə̀, nyan bə̀ ə̀də́sə̀ bə̀ aməɖə̀kɛn ŋ́kpɔmɔ́ní là sɛn Mawu bù tòvo nə́ ə̀wòa? Ǝfíɔ̀ ɖóŋ́ bə́: ənyɔn dòdò ì nyì bə̀ amə ɖə̀kɛn ŋ́ɖó làdà lə́ Mèdes kídé Perses sə̀ jí o. ¹³ Í wò gbə́ trɔ́ lə́nù nə́ əfíɔ̀ bé́, Daniel tɔɔ́ mə̀ xləxlə yudatɔwò dòmə̀tɔ́ ɖə̀ká ŋ́dò bùbù ɖəkɛn əŋun wò o. Ŋ́wɔ̀ də́ tɔɔ́ sə̀ àjí o, í xònə́ɖə zətɔ́n gbəɖəká. ¹⁴ Kə əfíɔ̀ sə ənyɔ̀n an, ədàyà nə́ í ì jibə́ yé a xɔ̀nə́, í lə́ bùtàmə có ənyɔn anŋ́ kə̀kə̀ əzàn do. ¹⁵ Vɔa àmə wò lə́ dàyà nə́ əfíɔ a, í lə́ nubə́, o əfíɔ̀ ə̀nyan bə̀ Perses kídé Mèdes sɔɔ̀a nùbə́ amə kəlà dalə̀ tɔɔ̀ sə̀ jía wò ŋ́kà sə̀ kə́a. ¹⁶ Ŋ́nyán nə́ agbə́ nùmɔ́n o, í ì nùbə́ wòa vɛ́ lə́ Daniel nə́ wòa sədə́ jaŋ̀tà wò dòmə̀. Kə ì vaà a, əfíɔ̀ nùnə́ Daniel bə́: Tɔɔ̀ Mawu kə̀ ə̀lə̀ sɛn kídé kakà dəjì, nàn xɔ̀ nə́wò! ¹⁷ Wò cɔ́ əkpə́ ísə́ tù ədo à nu, í əfíɔ̀ cɔ̀ ənù wò ísə̀ grɛ, càgbə̀ aməɖəkɛn ŋ́kà vàhun í o. ¹⁸ Ǝfíɔ̀ trɔ̀yi yé xɔ̀mə̀, í cì ənù mandu, íasià ɖəkɛn ŋ̀và mlɛn dəgbɔ́ o, í ŋ́ danrɔ̀n kəkə̀ əŋun kə o. ¹⁹ Ǝfíɔ̀ nyɔ̀n ŋ̀gbangbansi, í có kabà yi jaŋ́tà wò dòa gbɔ́. ²⁰ Kə ì təbɔ́ ədò a gbɔ̀ à, ì yɔ̀ Daniel də ŋ̀zizìmə, í əfiɔ̀ lə́nù nə́ Daniel bə́: Daniel, Mawu agbəagbə yé sùbɔ̀ví, tɔɔ̀ Mawu kə̀ əsɛ́n nɔn kídé kakàdəji à tə̀ŋ̀ ɖə̀wò lə́ jaŋ́tà lɔ̀mə an? ²¹ Í Daniel nùnə̀ əfíɔ̀ bə́: Ǝfíɔ̀, nɔ̀n agbə tɛ̀gbɛɛ̀ɛ̀. ²² Tiŋun Mawu dɔ́ yé dɔ̀là í và də̀gànu nə́ jàŋ́tà wò, í wòŋ̀ wɔé ə̀nù bàɖà ɖə kídé ŋ́ o, ɖòbə́ nyiŋ̀un wɔ nù vɔn ɖəkɛn o, í lə́ wòŋtà gbɔ̀a nyiŋun wɔ̀ nù bàɖà ɖə o. ²³ Ayətɛ́ əfíɔ a, ínù bə́ wòa ɖə̀ Daniel dò lə̀ ədoamə. Kə̀wò ɖə́dò à, abí ɖəkɛn ŋ̀lə̀ gotò nə́ o, ɖóbə́ əkándə́ yé Mawu jí. ²⁴ Ǝfíɔ ɖəgbə̀ bə́ wóá kprɔɔ amə kə kpa ənyɔn də́ Daniel ŋùan, wò víwo, kídé wò síwò nə́ wóa cɔ̀ wò də jaŋ́tawo déamə kəkə́ wàɖó ədòà mə an, jaŋ́tàwo vùvù wò, í gban wò nùwò səə́. ²⁵ Ŋ̀nanŋ̀gbə́ a, Darius fiɔ̀ ŋrɔ́n nù nə́ dùkɔ̀wò, əgbə vovo tɔ̀wò kə̀lə̀ anyìgbanji à wò seé, bə́ ŋ́tífafa nə̀ aməsiamə! ²⁶ Í ɖəgbə̀ bə́ aməsiamə kə̀lə̀ tiŋun dume wòà vɔ̀nvɔ̀n, í kpɔ́ Daniel yé Mawu a sí ɖòbə̀ ənỳ Mawu agbəagbə, í lɛ́ kə̀kə̀ í sə̀ ɖaàà: yé fiɔ̀ɖuxo ŋ̀kaà gban o, í yé cɛ́ kpàkpà lɛ́ kə̀kə̀ sə̀ yi nùwùwù. ²⁷ Yé í tùnə̀kà amə, í xɔ̀nə́ nan amə í wɔ̀nə̀ nùkùnù desí wó lə̀ jiŋkóri kidé anyìgbanji. Yé í xɔ̀nə́ Daniel lə́ jaŋtà wò dòmə̀. ²⁸ Daniel rikə lə̀ Darius kídé Cyrus, Perse wò fíɔɖuxòa mə.