¹ Ǝ̀fiɔ̀ Nebucadnetsar wɔ ə̀kpə̀ tatà kídé cíká, yé kɔ̀kɔ̀mə nyì mɛ̀trù kàkítákpó, í yé kə̀kə̀ ŋ̀kə̀ mə̀ nyì mɛ́trù amandɛn. Ǝ̀ mɛ́n də̀ Dura yé barìmə̀ lə́ Babylone yé nù tòtrómə̀. ² Ǝfiɔ́ Nebucadnetsar ɖòga lə̀ ədua mə, í yɔ́ àmə̀ ŋkùtà wò: Magìkí wɔtɔ̀ wò, kòjóɖótɔ̀ wò, dùmə̀ mə̀gán wó bə́ wóa và bɔ̀ də́ əkpətàtà gbɔ́. ³ Kə̀wò bɔ̀à, əfíɔ́ Nebucadnetsar có jə̀tə́ də́ ə̀kpə̀tàtà gbɔ̀. ⁴ Kánrɛntɔ̀à dàxá siŋsí, í nù bə́ àmə̀ wò seé nàn ɖòtó nyɔ́gbì! ⁵ Nə́ mìsə̀ í ə̀kpɛn wò lə̀ ɖí, í əhún gitar wò, gasù wò kídé ə̀há wò lə̀ ɖí à àmə̀ síamə̀ nán và də̀nùgù nə́ ə̀kpə́tàta kə́ ə̀fíɔ́ mə́ ɖɛ́ à. ⁶ Àmə̀ ɖə́ kə́là dá lə́ əsə̀à ji à, wòa cɔ̀ ɛ́ danŋkpí də́ əzòmə̀ í a fíɔ́n gùdúgùdù. ⁷ Ŋ́nàn ŋ̀tìà nə̀ dùkɔ̀ a wò sə̀, í əhún gasùwó, əkpɛ́n wó, ə̀ha wò lə́ ɖi à, àmə̀ síàmənàn và í và jə̀kló, í ɖə́nùgù nə̀ ə̀kpə̀tàtà kə̀ ə̀fíɔ́ mɛndɛ́ à. ⁸ Lə́ wɔnán ŋ̀nan wóŋ̀gbə́ à Chaldeéns tɔ́ ɖə́wò lə́ xónù cóJuif tɔ̀ wò ŋ̀tí. ⁹ Í wó lə́ nùnə̀ bə́: ə̀fiɔ́ Nebucadnetsar nán nɔ́n agbə tɛ́gbɛɛ́! ¹⁰ Ǝ̀ də́sə̀ bə̀ àmə̀ síàmə̀ kə̀ lásə̀ əhún wò gbə́, kidé əwə́ dùdù wò, kídé gasùwò gbə̀ à, ɖólà jəkló, í də́nùgú nə́ ə̀kpə̀tàtá à. ¹¹ Í àmə̀ kə̀ ŋ̀ wɔ̀ də̀jí a, wòá sə́ sə́ dànŋkpí də́ zòmə̀. ¹² Vɔa Juif tɔ́wò kə́ ə̀có də́ ədùa yénù wò jíkpɔ̀tɔ à wòa lə́ Babylone àn, Schadrac, Méschac kídé Abəd Nego à wòŋ́ lə́ wɔ dé əseé à wò jí o. Wóŋ lə́ sɛ́n tɔɔ́ vòdù wò o, í wò ŋ̀ lə́ jə́klò nə ə̀kpə̀tàtá kə̀ ə̀mə̀ a o. ¹³ Xòmə̀fiɛ́n lə́ ə̀fíɔ́ Nebucadnetsar, í dɔ àmə̀ wò bə́ wóà vɛ́yɔ̀, Schadrac, Meschac kídé Abed-Nego vá. ¹⁴ Nebucadnetsar lə́ bíɔ̀ wò sə̀ bə́, adodo í wò lə́ nùbə́ miŋ̀ lə̀ sɛ́n tíŋun Mawu wò kídé ə̀kpə́tàtà kə̀ŋ̀ mə̀ ɖɛ́ à a? ¹⁵ Unfiaà alò cò ə́gbájia nə̀ mí sə̀ ə̀kpɛ́n wò lə̀ɖí, í gsù lə́ɖí, í əhàwò lə́ɖí à nù ɖólà jə̀kló í də̀nùgù nə̀ ə̀kpə̀tàtá kə̀ŋ wɔ̀ɖɛ́ à. Ŋ̀nyì ə̀nə̀ án, wòà cɔ́ mí də́ ə̀zòmə̀, í nán kpɔ́ Mawu kə́ lá váxɔ́ nə́mí àn. ¹⁶ Schadrac, Méschac kídé Abed-Nego nùnə̀ ə̀fíɔ́ bə́, míŋún təŋ́ ɖó ənyɔ́n ɖə̀ŋ́ nə́wò unfià o. ¹⁷ Mí kándé mìàn Mawu kə̀ mí lə́ sùbɔ́ a jí bə́ à teŋ́ ɖə̀nú lə́ zogɛ̀gɛ̀ a mə̀ kídé tɔɔ́ lɔ̀mə̀. ¹⁸ Ǝfíɔ́ bùbù tɔ, Petro nyán bə́ míŋ̀ lə sùbɔ́ tɔɔ́ Mawuwò o, í mí ŋ̀ lə́ də̀tàgù nə̀ cìká yé kpə̀tàtá kə́ ə̀mə́ à o. ¹⁹ Kə̀ ə̀fiɔ́ Nebucadnetsar sə̀ ə̀nyɔ́n ŋ̀nán wò a, yé jí xɔ̀zu, í ì trɔ́ ŋ̀kùvi mə̀ ɖiɖà Schadrac, Méschac kídé Abed Nego gbɔ̀, í nùbə́ wòa bɔ̀ əzò a nə̀ anankə́ nán sun ŋ́ nán àlə̀xɔ̀ vràvrà. ²⁰ Nə́ sɔjà kə̀ wɔ gàn ɖɛ́a wò nán lə́ɖekɛ́jɛ́ amɔntɔ̀n a wò, í blàwò nyɔ̀n ŋ̀ gbí nə́ wòa cɔ̀ wò i vɛ́ sə́ danŋ́kpi də́ əzo à mə̀. ²¹ Àmə̀ wò blà wò, kídé wò gòdivíwò wò vùvɔ̀wù wò kídé wò nù dòdó wò seé í wò cɔ̀ wò daɖiɖà əzo à mə̀. ²² Sigbə̀ əfíɔ́ nù kíde xòmə̀fiɛn bə́ wòà bɔ̀ ə̀zò a ganŋgán ə̀nə́, əzò a yé ɖə́ fíɔń àmə̀ kə̀ vɛ̀ cɔ́, Shadrac, Meschac kídé Abed Nego wò. ²³ Í àmə̀ amɔ̀ntɔǹ à wò, Schadrac, Meschac kídé Abed Nego wò lə́ əzò à ɖɛ́. ²⁴ Vɔ̀nvɔ̀n jí ə̀fíɔ́ Nebucadnetsar, í ì lə̀ bíɔ̀ yé kàmə̀tiwò sə bə́ wòŋ̀ cɔ àmə̀ wòí vɛ́ sə̀ də̀ əzoàmə? Í wò ɖòŋ́ nə́ bə́ ɛnɛń. ²⁵ Í ì lə̀ nù nə̀ wò bə́, yé lə́ kpɔ́ àmə̀ àmə̀nə̀ kə wòŋ́ blaɖɛ́ o, í wò lə́ zɔ́n lə́ ə̀zò àmə̀, ílə́ kpɔ́ jíjɔ́, í àmə̀ amə̀nə̀ à tɔ́à ɖi Mawu dɔ́là wò. ²⁶ Zəɖəká, ə̀fíɔ́ yì adokpó à nù, í lə́ nú bə́: Schadrac, Méschac kídé Abed Nego Mawu agbə agbə sùbɔ̀tɔwɔ́, mí dóva có əzòa mə̀. ²⁷ Ǝfíɔ́ yé gɔ̀mə̀ nɔ́ntɔ́wò, yé ŋ́kútá wò bɔ́, í wò kpɔ́ bə́ əzòá ŋ́ wɔ ŋ́ɖəkɛn nə́ wò o. Wó tàɖà əkùɖəka ŋ́ fíŋń o, wò kalesɔn kidé wò gòtó wò gbə́ lə́ nyɔ́n ŋgbí í ə̀zo ŋ́ klə̀wò o. ²⁸ Nebucadnetsar kə́nù, í lə́ nùbə́ wóàwrá Schadrac, Mèschac kídé Abed Nego wò Mawu kə̀ dɔ́ yé dɔ́láwò í ì và ɖə́ wò lə́ zòmə̀, ɖɔ́bə́ wó kańdéji bə́ a ɖə́ wéwò, í woò gbə́ bə́ wéwó ŋ̀ká sɛ́n Mawu ɖə̀kɛ́n kə̀ có ànyìgbán jí o. ²⁹ Í ì nùbə́: àmə̀sìàmə̀, dukɔ́ ɖəsiàɖə́ kə́la xónù bàɖá ɖə́ cɔ́ Schadrac, Méschac kídé Abed Nego wò Mawu ŋ́ an, wò à jɛ́n kidé kpàcá, í wòa gbán ye xoó gùdúgùdú, ɖóbə́ Mawu ɖəkɛ́n ŋ́sɔ́ kídé wò Mawu o. ³⁰ Ŋ̀nán ŋ̀gbə́ à, ə̀fiɔ́ gbə́ nán wò tòhó gán ŋ̀gan lə̀ Babylone dùkɔ́amə.