¹ Etsimɛ Amɔritɔwo yo fiɔwo kpata, amɛtsiwo le Yɔrdan godo le woezexoe gomɛ kudo kananitɔwo yo fiɔwo kpata, amɛtsiwo le axu to se se be Yehowa naba Yɔrdan yo tɔawo xu le izraɛl viwo yo ŋkɔ kakavana be mizɔn mɛlɔ, wo gbɔdjɔ yi kaulɛntɔ ɖe ŋde gbele wo domɛ akpaŋkɔ izrɛl viwo o. ² Le gaxoxo xɔn mɛ lɔ, Yehowa nu nɛ Yoshua be: wɔ ekpe kaklawo, yi nagbe so evo nɛ Izraɛl viwo ke. ³ Yoshua wɔ ekpe kaklawo yi yiso evo nɛ Izraɛl viwo le Aralɔti yo toa dji. ⁴ Enutsi ŋtsi Yoshua so evo nɔwo ɖo ke. Dukɔn kpata tsi tole Egipti, nusuwo, ahuawɔtɔwo, wo ku le zogbeɛ yo mɔzɔnzɔn lɔ mɛ, le gatsimɛ yi wo tole Egipti. ⁵ Dukɔn kpata tsi tole Egipti so evo; vɔ dukɔn tsinɛ wodji le zogbeɛ mɛ, wo ɖe so evo. ⁶ Ɖo Izraɛl viwo wozɔn le zogbeɛ mɛ xoe eka, kakavana nusu ahuawɔtɔwo yo tsɔntsrɔn tsimɛ wo ŋde ɖoto Yehava yo gbe o; Yehowa ta enu be wo ɖe dja kpɔ edu tsinɛ yo ŋgbe yido nɛ woa tɔgbewo, eɖu tsinɛ mɛ anɔsi kudo anyisi bɔ ɖo. ⁷ Wo viwo yi yisɔɖo wotexoe; yi Yoshua so evo nɔwo, ɖo wonyi evomasotɔwo, ɖoŋtsi wo ŋde tɛnŋ so evo le mɔn zɔnzɔn lɔ mɛ. ⁸ Tsinɛ wo so evo nɛ dukɔn vɔlɔ, wonɔn agbadɔ mɛ kakavana gatsimɛ yi ŋiku nɔwo. ⁹ Yehowa nunɛ Yosua be: ŋɖe Egipti yo ŋkpɛn ɖa le miadji egbɛ. Yi woyɔ texoe xɔn be Gilgal kakavana egbɛ. ¹⁰ Izraɛl viwo xoxu ɖo Gilgal; yi woɖu Paki le woetriɛ yo ŋkeke woenɛ gbe le woetrɔ mɛ, le Yeriko yo dogbawo mɛ. ¹¹ Woɖu edua yo yovowɔ le Paki yo ŋkegbe, kpɔnɔn tsimɛ yesi ŋde leo kudo blafo koli; woɖui le gbexɔngbe. ¹² Mana nɔte le Pakiɛ yo ŋkegbe, le gatsimɛ woɖu yovowɔ duamɛ tɔ; Izraɛl viwo ŋde gbe kpɔ Mana o, yi woɖu kanani yo duamɛ nuɖuɖuwo le xoe xɔn mɛ. ¹³ Tsinɛ Yoshua gogo yeriko lɔ, ekɔkɔ eta yidji yi yikpɔ nusu ɖe nɔte ɖo ŋkɔ nii, ewuigan le alɔmɛ. Ezɔnɖo edji, yi biɛɔ be: wole miadjia alo wole mia futɔwo dji? ¹⁴ Eɖoŋtsi be: Oo, vɔlɔ ŋnyi Yehowa yo ahuaga, ŋto fifiɛ. Yoshua dje eklo yi dota eguŋ, yi yinu nii be: ŋde axoetɔ nyɛ be yanu nɛ yo dɔla? ¹⁵ Yi Yehowa yo ahuaga to be: Ɖe axo afɔkpawo le afɔwo, ɖo tsxoe tsɛ tsidji wonɔte ɖo lɔ kɔ. Yi Yoshua wɔ nɛnɛ.