¹ Ndinkuchitira umboni pamaso pa Mulungu na Mkhirisitu Yesu, ndiye amdzatonga wa moyo na wa kufa, na thangwe la maonekedwe yache na ufumu bwache. ² Lalikani mafala; chita nayo pa nthawe yache apo pakusaya nthawe yace, gaza, tsimula, chenjeza, gwesa mtima na chipfunziso. ³ Nakuti nthawe inkubwera ndiyo wanthu amdzapirira lini ku chipfunziso cha kubva na makutu. Mmalo mwace, amdzabzigwezekera apfunzisi pala bzakukhumba bza iwo okha, wakumbadzasewera ndibzo makutu yao yakupfikayo yamdzafuna kubva. ⁴ Amdzaleka utowa kutetekera bza chadidi achidzapambuka nkumbadzatewera magunkha ya pezipezi. ⁵ Soma iwe, khala wa kupenya pa bzense. Bvaya bza kuwawa; chita mabasa ya ulaliki bwa bwino; kwanirisa utumiki bwako. ⁶ Thangwe ndiri nkuthiriwa nsembe tsapano. Nthawe yangu ya kunyamuka ya kwana. ⁷ Ndalimbana nako kulimbana kwa bwino; ndamaliza njirayo; ndakoya chikhulupiriro. ⁸ Wandibvazika korona wa chilungamo, ndiye Mbuya , mtongi wa chilungamo, amdzandipa pa nsikuyo, apo sikuti kuna ine ndekha, soma na kuna pomwe wensene ndiwo akhakonda maonekedwe yache. ⁹ Chita bzakuti ubwere kuna ine kamangu. ¹⁰ Nakuti Dema wandisiya ine. Wakonda dziko lapansi apo zjai wayenda ku Atesalonica.Kresite adayenda ku Agalatiya, na Tito ku Dalimatiya. ¹¹ Ni Luka yekha ndiye ndinaye. Tenga Maliko ubere naye thangwe adazerewera kale kuphata basa na ine. ¹² Soma Tukiro ndamutuma ku Aefeso. ¹³ Chakufunika changu ndicho ndidachisiya ku Trowa kuna Karipo, ubwerese pa kubwera, na mabukhu, na ma makhanda yakunembiwa yale. ¹⁴ Alesandriyo wakusula mkua adandichitira bzakuipa bzizinji. Mbuya mumdzamubwezera iye kuteweza bzichito bzache. ¹⁵ Iwe pomwe uchenjere naye, thangwe adagaza maninge mafala yathu. ¹⁶ Pakubzikhotcherera kwangu kwa kutoma, palibe ndiye adaima nande kundithandizambo. Mmalo mwace wensene adandithawa. So bzobzi bzamala basi nampodi kubzikoyera kumtima pala iwo nada. ¹⁷ Soma Mbuya adaima nande achindipa mphamvu mwa kuti, kudzera mwa ine, chilalikiro chibvekere kwense kwense mwakukwana, kuti neyembo wachikunja abve basi. Apo ndidapulumusiwa mkamwa mwa mphondolo. ¹⁸ Mbuya amdzandipsokonyolesa kuna cakuipa chirichense apo achidzandipulumusa ine kupita mu ufumu bwace bwa kudzaulu. Kuna iye kukhale ulemerero bwa nthawe na nthawe zakusaya kumala. Amen. ¹⁹ Undiperekere kulimba kuna Prisikila, Akila, nabanja la Onesiforo. ²⁰ Erasto adasalira ku Corinto, soma Trofimo ndamsiya wakufesuka ku Mileto. ²¹ Chita bzakuti ubwere mainza yakujejera yakanati kufika. Eubulo akupereka kulimba kuna iwepo, ndendende pomwe na Pude, Linu, Claudiya, na famidya zensene. ²² Mbuya mbaakhale na mzimu wako. Chifundo chikhale na iwe.