¹ Mthangwe lace mwanangu limbikisika na chifundo ndico chiri muna Mkhirisitu Yesu. ² Bzinthu ndibzo ndabva kucok,a kuna mboni zizinji, bzimbawaikha mu cikhulupiriro ca wanthu omwe amdzakwanisa kupfunzisambo anzao. ³ Kubonera nande pabodzi mmasada ninga mchikunda wa nkhondo wabwino wa mkhirisitu Yesu. ⁴ Palibe mchikunda ambatumikira pamene wa tangwanika na bzichito bza moyo uno, pala kuti akomese mbuya wace mkulu. ⁵ Apo pomwe penu winango anipikisana mmasenzeko ya kuthamanga, ambapasiwa lini chibangiri ca kumutenda , ate ateweze mitemo yace. ⁶ M'bwakufunika kuti mulimi wakulimbika atambire chigawo ca bzakukolola bzace pa kutoma. ⁷ Kumbukani bwino ndibzo ndikulewabzi, nakuti Mbuya amdzakupani kubvesesa pa chirichense. ⁸ Kumbukani Yesu Mkhirisitu, wa ku dzinza la Davide, ndiye adalamusiwa kuna anyamuya. Ibzi mthangwera utumiki bwangu bwa mafala ya Mulungu, ⁹ bomwe ndikubonera nabo kufikizana ate kumangiwa na njema ninga nya kupalamula. Soma mafala ya mulungu yalibe kumangiwa. ¹⁰ Natenepo nimbapirira bzinthu bzense pala iwo ndiwo asankhuliwa, pala iwo pomwe akaone cipulumuso ndico ciri muna Mkhirisitu Yesu na ulemerero bwa muyaya. ¹¹ Ngakukhulupirika mafalaya: "Penu tafa naye pabodzi, timdzakhala pomwe na moyo naye. ¹² Tingapirira timdzacitambo ufumu na iye. Tingamulamba, iye amdzatilambambo. ¹³ Penu ndife wakusaya kukhulupirika , iye amdzakhala wa kukhulupirika basi, thangwe angabzilambe lini yekha.'' ¹⁴ Pitirizani kumbawakumbusa bzobzi. Achenjezeni pa maso pa Mulungu bza kumbapokana kuguma mafala; bziribe phindu, apo bzimbalulisa iwo wakubzibva. ¹⁵ Chitani kamfulumize bza cadidi bzire kubzionesera kuna Mulungu wa kudziwika, nyabasa wa kusaya manyazindiye ambapfunzisa bwino mafala ya cadidi. ¹⁶ Pewani kusewera mbwebwe za pezipezi, komwe kumbasandusa munthu kunyanya kukhala wakusaya chipembedzo. ¹⁷ Bzakusewera bzao bzimdzaenderera ninga chironda cha khansa. Mwa iwo ali Humenayo na Fileto. ¹⁸ ndiwo asochera pa kuchita cadidi. Ambati mmukiro wa anyamuya udachitika kale, apo ambadzonga chikhulupiriro ca wanthu winango. ¹⁹ Soma meju, maziko ya Mulungu yaimisiwa pa kukhazikika. Yana cizindikiro ici: ''Mbuya ambazindikira wace wale'' apo ''Aliyense wakumbaguma dzina la mbuya abule pana anyakusaya cilungamo.'' ²⁰ Soma neye mnyumba ya kuumira tani sikuti mumbakhala bzakutakulira oro na siriva bzokha nada. Mumbakhala pomwe bzakutakulira bza kukonziwa na kusema na bza kumunya na mataka. Bzinango mwa bzobzi so pala kuphatizira bza ulemu apombo bzinango bzakusaya ulemu. ²¹ Penu winango ambzicenesa kuna cinthu ca kuphatiziwa mwa kusaya ulemucho, amkhala ninga cakutakulira ca ulemu. Ambapambuliwa pa mphepete, na mbuyace kuti ngwa phindu apo ambakhala wakuthemera pa basa lensene la bwino. ²² Thawa bzilakolako bza uswaka. Psaga chilungamo, cikhulupiriro, cikondi, na mtendere na ndiwo ambacemera Mbuya na chadidi ca mtima uchena. ²³ Soma lambani mabvunzo ya kupusa na yakusaya malango. Mumdziwa kale yambanyosa ndewo. ²⁴ Kapolo wa Mbuya nampodi kumbapoka. So ambakhale wa kuderekha pa bzense, wakukwanisa kupfunzisa, na wakuderekha. ²⁵ wakukwanisa kulangiza mwa kupfatsa wale ndiwo ambamugaza Mbuya. Mulungu pinango pense angadzawape nzeru yakulapa thangwera kudziwa chadidi chace. ²⁶ Apo akabzipulumuse ku matchera ya satana mdyerekezi, pomwe adaphatiwa naye, ku chifuniro chace.