¹ Muvakumbusye venevo ukuti vayisyaje kuvalajilii nava vuvulamulili, ukuvivwila nenevo, ukuti vayisenganie kumbombo yonti inyinza,

² vatahamuligaje nawumo, vatanyonywaje ukulwa, nukuva vatehamu, valanjizye ukuyisya pantanzi pa valivonti. ³ She lumo iswe twamile twe vasita njele havili tutahivwilaga. Twasoveleye havili twamile twe vazya va vinyonywa ivyakuyilaga. Twatendime muvuhandamanu na munkwini. Twamile twe vanyazuna vakupatana uno nuwamwavo. ⁴ Loli lwe uvutehamu vwa Mulungu umuposhi witu nishikunzi sha vuntu shihavoneha,

⁵ zitali mwe mumbombo zya vugolosu zwe iswe tuhavomba, loli kujendela muvwila vwakwe vwe ahatuposhela iswe, kujendela mulwozyo lwa kupapwa uvupya nukuyandula kujendela muMupepo uMufinjile, ⁶ vwe uMulungu ahatupungulila kuvwinji piswe kujendela mwa muposhi witu uYesu Chilisiti,

⁷ ukuti tugolosheye mu vwila vwakwe, ukuti iswe tuve vapwano nukuva nulusuvilo lwa vulanzi vwa shima ⁸ Ipangwi ili lisuvaliwa. Ine nkwanza iwe uhomeshezye pa ivintu vinivi, ukuti vala ve vasuviye mwa Mulungu ukuti vasheve ukuyinjizya vavo veka mumbombo inyinza. Ivintu vinivi vyinza havili vya mbombo kwa wonti. ⁹ Loli uyepusye ukuyanjizania ukwavupunganu nukuvelenjela iphapo ukudalinkana nukulwana ukuyana nululajilo. Ivintu vinivyo vitali nimbombo havili vya vulo.

¹⁰ Mumuhane wonti wula we akuleta ukugavinkana pakasi palimwe, lye mwasohana lyoka pamu havili,

¹¹ ukumanya ukuti umuntu inza wunuyo agalunkine kufuma kwidala ilyinza havili akutalamalandu nukuyilonga wuyo umwenesho. ¹² Pe inga namutuma uAtemasi pamu uTukiko kwimwe, muhahalambane nukwinza kukwane ku Nikapoli, kwe sivile ukumalila kuko ahavalilo ahahatazu.

¹³ Uvombe shilishonti she ungakwanisya ukumutuma mwidala lyavo uZena umumanya nkomelezyo nu Apolo, ukuti vatasovelwaje nashimo. ¹⁴ Avantu vitu vahondeye ukumanyila ukuyiviha vavo veka mumbombo inyinza zye zikwavwa ivyakwanzikwa ivya paluvilo, pe ukuti vitavanje visita kuhoma ivihomwa. ¹⁵ Vonti ve vali poka nine vakulamuha iwe. Uvalamushe vala ve vatukunzite iswe mulwitiho. Uvwila vuvanje poka nimwe mwenti.