¹ Loli iwe, yanga she shiyanine poka nu kulingania kwe kwizuye uvwanalyoli.

² Manyisya avanavuli avasongo ukuva vakuteshelela, avamushinzi, avakuyilesya, vevagomile mulwitiho, mulugano, havili namukujimbilila. ³ Mwidala lyalilyoka, manyisya avantanda avasongo ukuti vavanje vamushinzi munkalo, vatahave vakulumania avamwavo pamo ukuva vazya vakung'wela ipele ilyinji, loli vave vamanyisi ava zyenyinza,

⁴ havili vavasunde avantanda avansi ukugana avalume vavo havili nukugana avana vavo,

⁵ ukuti vave vakuyilema, avazelu, avakusunga inyumba zyavo ahinza, havili ukuva vakwivwila avalume vavo, pe ukuti izwi lya Mulungu litahayangwaje ngati livivi. ⁶ Mwidala lyalilyoka, uvagomye avanavuli avansi ukuvombezya insivo inyinza.

⁷ Mumadala gonti uyilanjizye wewe weka ukuva we shiholanio isha mbombo inyinza. Mumanyisyo zyaho, ulanjizye uvwanalyoli, ukumusimishizya umoyo waho,

⁸ havili ipangwi ilyanalyoli lye lishizile ukususya, pe pakuti wonti we akususya iwe apeziwaje insoni shifukwa vate nashimo she vangayanga ishivivi ukuyana niswe. ⁹ Avazya vavanje vakuyisya kuvapiti vavo mushilishonti, ukuvahovosya venevo havili vatavanje vakudalinkana navo,

¹⁰ vatavanje vakwiva ukufuma kuvavo, loli mumalo mwavo valanjizyaje ulwitiho lwonti ulwinza, pe pakuti mwidala lyonti valetaje inkongole kuvimanyilo ukuyana nu Mulungu umuposhi witu. ¹¹ Pakuti uvwila vwa Mulungu vuvonesile ku vupokwa vwa vantu vonti.

¹² Vukutumanyisya iswe ukuhana uvusita Mulungu havili mukwanza ivyamunsi, nu kwihala uvulanzi uvwakuyilema, uvugolosu, havili nuvulanzi vwa vuMulungu munkulo ino,

¹³ lwe tukwenya kuntanzi ukuposhela mulusuvilo uvulote vwitu, nukuvoneshela ukwa vushindamu uvwa Mulungu witu umupiti havili umuposhi uYesu Chilisiti. ¹⁴ UYesu ahayipa wuyo weka kuliswe umwakuti atuposhe iswe ukufuma kuvushilania ndajilo zyonti nu kuyipela muzelu wuyo weka uwa vantu va payo ve vakuyikungula ukuvomba imbombo inyinza. ¹⁵ Yanga ivintu ivi, uvagomye avantu ukuvomba vyenevyo, havili uvagolosye nuvulamulilo vwonti. Utahaleshe wumo umuntu akusule iwe.