2 Ine nkuvalambilizya poka nu Euodiya, havili ine nkuvalambilizya poka nu Suntuke, muve ninsivo inkolanu mwa Mwene.
3 Mwemumwo, nkulava iwe, wamwitu wane uwavwanalyoli, ukuti uvavwe avantanda iva ve vavomvile poka nine ukusasya ipangwi ilyinza, ukulandatana nu Kelementi navanji avavomvi avamwitu, ve amazina gali mwi buku lya vulanzi. 4 Museshelaje mwa Mwene shima. Havili ine nkuti, seshelaji.
5 Leha uvutehamuvwinyu vumanyikwe kuvantu vonti. UMwene apalamiye.
6 Mutahasaganie nishintu shimo. Mumalo mwakwe, muvintu vyonti kujendela muphuto havili nkuvalava umwakuyisya poka ninsalifyo, leha ukulava kwinyu kumanyikwe kwa Mulungu,
7 havili numutende wa Mulungu, we wukushila ukuzyagania konti, wulizijilila amoyo ginyu ninsivo zyinyu mwa Chilisiti uYesu. 8 Pavumalilo,vamwitu, ivintu vyonti vye vya nalyoli, ivintu vyonti vye vya kushindikwa, ivintu vyonti vye vigolosu, vyonti ivintu vye viganiwa, vyonti ivintu ivya ipangwi ilyinza, inga shilipo shimo ishintu ishinza nkani, inga shilipo shimo ishintu isha kushitima, musivilile ukuyana nivintu vinivi.
9 Ivintu vye imwe muhamanyila, havili muhaposhela havili muhivya nu kwenya mumwane, muvombe ivintu vinivi, pe uMulungu wa mutende aliva poka nimwe. 10 Ine nkuseshela namaha sana mwa Mwene mulandu ishi mwanda ukunsivilila ine. Mwemumwo mwakuziwa sana nine pisinda, loli patali umwavi nawumo uwimwe ukwavwa.
11 Ine ntakuyanga izi mulandu ine nkusovelwa. She ine manyiye ukukwanilisiwa nashe ndinasho muhavele honti.
12 Ine manyile ukuti shoni ukuva ne mupina, havili ine manyile ukuti shikuva vulu ukuva navyo ivyinji. Mwidala lyonti havili na muvintu vyonti ine manyiye ikwilu ya she ungayilisya ahinza pamu ukuva ninzala, na she ungava navyo ivyinji pamu ukusovelwa.
13 Ine ningavomba vyonti ivintu kujendela muwula we akungomya ine. 14 Nangavuli, mwavomvile ahinza ukugavana poka nine muntamyo zyane.
15 Mwe va ku Filipi mumanyile ukuti kuvwandilo vwi pangwi ilyinza, pe nkepaga ku Makedoniya, kutali ishivanza nashimo she shihanavwa ine muhavele ahakupa nu kuposhela loli imwe mweka.
16 Nape namile mu Tesalonika, imwe mwatumile uvutuli vwa ntamyo zyane ukushila lwoka.
17 Te kwekuti ine nkulondola ivya vwila. Mumalo mwakwe, ine nkwanza ishihomwa she shikonjela pashuma shinyu. 18 Ine phosheleye ishintu shonti ishakukwana, havili nukushila. Ine nkapelwa ahinza ishi pakuti nkaposhela ukufuma kwa Epafulodito ivintu vye imwe mwatumile. Vintu vye vikununchila uvunonu, imputile ye yikwitishiziwa havili ya kuhovosya kwa Mulungu.
19 UMulungu wane alihomana nintamyo zyinyu zyonti ukuyanana nuvwadumbwe vwakwe nuvushindamu mwa Chilisiti uYesu.
20 Ishi kwa Mulungu witu nu Tata kuve uvushindamu shima nashima. Ameni. 21 Mulamushe vonti avantu va Mulungu avafinjile mwa Chilisiti uYesu. Avamwitu ve vali poka nine vakuvalamuha imwe.
22 Vonti avantu va Mulungu avafinjile ve vali uku vakuvalamuha, sana sana vala ava munyumba ya Kayisala.
23 Uvwila vwa Mwene uYesu Chilisiti vuve poka numupepo winyu. F1