¹ Ine nkukupa ululajilo ulu pantanzi pa Mulungu nu Chilisiti uYesu, we alilonga avapuma na vafwe, havili mulandu wa kuvoneshela kwakwe nishinamwene shakwe:

² Ulumbilile izwi; uyisenganie lwe vya pa luvilo na pe hagha. Uyanie pe vapuvile, uvahalipile, uvagomye, poka navwonti uvutehamu ni nsambilizyo. ³ She ahavalilo haliyinza lwe avantu vatalizijimbilila insambilizyo zya kwivwa. Mumalo vwakwe, avene valiyivunganishila avenesho avamanyisi ukuyana ninsivo zyavo, ve valiyangaga zye amakutwi gavo ge gakuvanyejela gakwanza ukwivwa.

⁴ Avene valigunjila ukwivwa izya nalyoli, pe avene vali galavushila kuluvazu lwa mapangwi ga vahali.

⁵ Loli iwe, uyaganie munjele muvintu vyonti. Ujimbilile muntamyo; uvombe imbombo ya mulumbilili; ukwanilisye imbombo yaho. ⁶ Pakuti ine phungulilwe hali. Ahavalilo ahakwepa kwane hinzile.

⁷ Ine nalwa uvulwe uvwinza; namalizya ukupotana ukwa kushimbila kwane; nalusunjilila ulwitiho.

⁸ Iphuphu ya vugolosu vwane yisengulilwe, ye uMwene, uhalonga umugolosu, alipha ine pisiku lila, havili te kwe kukwane kweka, loli havili na kuvonti vala ve vakunzite ukuvoneshela kwakwe. ⁹ Lwisya winze kukwane luvilo.

¹⁰ Pakuti uDemasi anchimbiye ine. Uwene ayiganile insi yishi ino pe avazile ku Tesalonika. UKelesikesi ahavala ku Galatiya, nu Titi ahavala ku Dalimatiya. ¹¹ Wu Luka weka we alipoka nine. Umusende uMaliko pe winze nawo mulandu uwene wapindu kukwane mumbombo.

¹² UTikika nkamutuma ku Efeso.

¹³ Inkanzu ye nkayileha ku Tiloya poka nu Kalopu, undetele yeneyo lwe iwe ukwinza, na mabuku, nkani-nkani amakwela gakusimbila. ¹⁴ U Alekizanda umusyanaji ahalanjizya uvutalamalandu uvwinji kukwane. UMwene alimulipa wenewo ukuyanana nimbombo zyakwe.

¹⁵ Niwe vulo uyizijilile wewe weka kuwuyo, mulandu uwene ahapinganaga sana namazwi gitu.

¹⁶ Ukuyizijilila kwane ukwakwanda, nawumo we alipoka nine. Mumalo mwakwe, vonti vanchimbiye ine. Ishi shitahavalonjelele venevo. ¹⁷ Nkandi uMwene alipoka nine havili ahangomya ine ukuti, ukujendela mumwane, uvulumbilili vwizwi vusile vwonti, nu kuti vonti avakunzi vivwe. Havili ine nkapulumusiwa mwilomo lya nsama.

¹⁸ UMwene aliphoha ine ukufuma kumbombo zyonti izya vutalamalandu havili alinsengula ine ukuva wa kushinamwene shakwe isha kumwanya. Kuwuyo kuvanje uvushindamu shima nashima. Ameni. ¹⁹ Umulamushe uPulisila, uAkwila, ninyumba ya Onesipolasi.

²⁰ U Elasitasi asyaye ku Kolinti, loli u Tilofimo namulesile muvinu ku Melitasi.

²¹ Ulwisye ukwinza lye iphepo yishili. U Ewubulusi akulamuha iwe, nu Pudeni vulo, nu Linasi, uKolodiya, na vamwitu vonti.

²² UMwene avanje poka numupepo waho. Uvwila vuvanje poka niwe.