2 Ivintu vye wivuye kufuma kukwane pakasi pa va home avinji, uvisajile vyenevyo ku vantu avalwitiho ve valikwanisya nukumanyisya navanji vulo. 3 Uyimbe muvugomu poka nine ngati musilikali umwinza uwa Chilisiti uYesu.
4 Nawumo umusilikali we pe alipambombo yimo akuvomba sona izinji izya kuhovosya uvulanzi uvu, loli uwene akuvomba ukuti amuhovosye usongo wakwe umupiti.
5 Havili, inga wumo akupotana pakushimbila, uwene vatangamuzwiha iphupu pekapeka uwene akupotana kujendela mundajilo. 6 Ishi shakwenelela ukuti umulimi we akujimbilila pambombo aposhele ishigavo shakwe isha shivyalwa ishakwanda.
7 Usivilile ukuyana nashe ine nkuyanga, pakuti uMwene alikupa iwe ukuzyagania muvintu vyonti. 8 Umukumbushe uYesu Chilisiti, umwizikulu wa Davidi, we vahamuzyusya kufuma kuvafwe. Ishi shili ukuyanana nipangwi lyane ilyinza,
9 ye nishi ine nkuyimba ukufishila ukupinyiwa na manyololo ngati ne mugozi. Loli izwi lya Mulungu litapinyiwe.
10 Pelelo ine nkujimbilila vyonti ivintu shifukwa sha vala ve vasevwa, ukuti vope vulo vakavaje uvuposhi vwe vuli mwa Chilisiti uYesu, poka nuvushindamu vwa shima. 11 Uku kwe kuyanga kwe kuhondeye: "Inga iswe tufuye nawo poka, iswe havili tuliva twe valanzi poka navo.
12 Inga iswe twajimbilila, iswe tulilamulila havili poka nawo. Inga iswe twamuhana wenewo, wope vulo alituhana iswe.
13 Inga iswe te twe vasuvaliwa, uwene akusyala musuvaliwa, pakuti uwene atangayihana wuyo weka." 14 Mujendelele ukuvakumbusya venevo ivintu vinivi. Muvalajile venevo paantanzi pa Mulungu ukuti vatalwanaje ukuyana na mazwi; izi zitakwavwa nashimo havili zikuvanangania veka vala ve vakwivwa. F28
15 Uvombe ahinza ukuyilanjizya wewe weka kwa Mulungu ngati wumo we akwitishiziwa, umuvomba mbombo we atali nishifukwa isha kwivwila insoni, we akumanyisya ahinza sana izwi lya vwa nalyoli. 16 Uyepusye ukunyazya nukuyanga ivya vulo, vye vikutwala ku vusita vumulungu uvwinji.
17 Injango zyavo zilisata ngati wu kansa. Pakasi pavavo pali uHimenayi nu Fileti,
18 ve vasoveleye kufuma kuvwanalyoli. Avene vakuti ukuzyuha kuhavombwa hali, pe avene vakunangania ulwitiho lwa vamu. 19 Nangavuli, ukuyisimpa kwa lwalo lwa Mulungu kukwimilila. Luli na masimbo iga: "UMwene akumanya vala ve vakwe" havili "Aliwonti we akwitiha pizina lya Mwene ahondeye ukwepuha kufuma kuvusita vugolosu."
20 Munyumba inyinza mutali vyeka ivililo vya golodi ni vya siliva. Mulinsona nivililo vya makwi nitope. Vimo mwivyo vivombelo ivya mushinzi, havili vimo vya musamu.
21 Inga wumo avizelufya wuyo weka kufuma kuvivombelo ivya musamu, ishene shikuva shililo shamushinzi. Ishene vakushisengula paluvazu, shakuvombela usongo, havili vakushisengania kumbombo yonti inyinza. 22 Zishimbile iphapilo izya shilumendo. Vulondole uvugolosu, ulwitiho, ulugano, nu mutende poka navala ve vakupunda pa Mwene kufuma pa mwoyo wavo umuzelu.
23 Loli ugahane amavuzyo agavupunganu nivya mwalwe. Umanye ukuti agene gakupapa ulwisi. 24 Umuvomvi wa Mulungu ahondeye atadalinkanaje. Muvuyo vwakwe uwene avanje washisa pantanzi pavonti, ahondelaje ukumanyisya, havili avanje wuphumaje,
25 avavunganihaje ve vakumususya umwa kufwasa. Lumo uMulungu anginza avape venevo ulupinduho shifukwa sha vumanyi vwa vwanalyoli.
26 Avene vangayagania sona nu kulehana nishipingo sha vutalamalandu, lwe avene vasopholilwe na wuyo pa kwanza kwakwe.