¹ Ishi izya kwinza kwa Mwene witu uYesu Chilisiti nukuvungana kwitu poka ukuva poka nawo, tukuvalambilizya imwe, vamwitu,

² ukuti mutayuvanaje luvilo pamu ukuyimba lumo numupepo pamu kujendele mwizwi, pamo kujendela mwakalata we akuva ngati afuma kukwitu, lye likuva ngati isiku lya Mwene lyinzile hali. ³ Patahave nawumo uwakuvahopeha imwe mwidala lyolyonti. She ilyene litaliyinza mupaka pe ukugavinkana ukupiti kwinzile nu muntu umusita nkomelezyo avumbusile, umwana wa lunanjiho. F24

⁴ Uno we wewula we akupinga nu kuyituphula wuyo weka ukuvushila vonti ve vakwitwa Mulungu pamo vala ve vakuvaputa. Ingape, uwene akutendama mwitepheli lya Mulungu nukuyipimbiliha wuyo weka ngati wu Mulungu. ⁵ Imwe mutakukumbuha ukuti lwe nali poka nimwe navavuzizye ivintu vinivi?

⁶ Ishi imwe mumanyile she shikumudinda uwene, ukuti uwene ayinze avumbukwe peka pahavalilo hakwe.

⁷ She uvwene uvusitankomelezyo vwe vutakuvoneha vutalisile hali ukuvomba, pakuti alipo wumo we ishi akuvudinda vwenevwo mupaka pe uwene ayinza ayepa penepo. ⁸ Pe umusita nkomelezyo wula alivumbukwa, we uMwene uYesu alimugoga numwuji wa mwilomo lyakwe nukumusovezya wenewo kujendela mushitushizya sha kwinza kwakwe.

⁹ Ukwinza kwa musita nkomelezyo uyo kuliyandana mumbombo zya Setano poka na maha gonti, ivimanyilo, nivisukumizyo vyilenga,

¹⁰ havili poka nahavele honti ahavutalamalandu he hakuvahopeha vala ve vakulova, mulandu avene vahanile ukugana uvwanalyoli nukuti vapokwe. ¹¹ Pa shifukwa shinishi uMulungu akuvatumila venevo amaha amapiti agakuvasovezya ukuti avene vasuvile ilenga

¹² havili ukuti avene vonti valongwaje ve vatasuviye uvwanalyoli loli mumalo mwakwe vaganile ivya vusita vugolosu. ¹³ Loli iswe tumusalifyaje shima uMulungu shifukwa shinyu, vamwitu mwe muganiwe nu Mwene, mulandu uMulungu ahavaseva imwe ngati shihomwa ishakwanda pa kupokwa kujendela ukuyizelufya nu mupepo nukusuvila muvwanalyoli. F25

¹⁴ Umwene ahavita imwe kwishi kujendela mwipangwi lyitu ilyinza, ukuti imwe mukave uvushindamu vwa Mwene witu uYesu Chilisiti.

¹⁵ Ishi lelo, vamwitu, mudaje havili mukakatile kuvimanyisyo vye imwe mwamanyiye, kali kwe kujendela kwizwi pamu kujendela mwakalata witu. ¹⁶ Ishi uMwene witu uYesu Chilisiti umwenesho nu Mulungu uTata witu, we ahatukunda iswe havili ahatupa iswe ulusuvizyo lwa shima nulusuvilo ulwinza kujendela muvwila,

¹⁷ avasuvazye nu kugomya amoyo ginyu mumbombo yonti inyinza na mwizwi.