¹ Pawulo, umupositole wakwe Yesu Kilisitu ukupitila mukulonda kwakwe Leza, ukulingana ni layano lyawumi lino lili muli Kilisitu Yesu, ² Kuli Timoti, umwana umukundwe; Uluse, uwila nu mutende ukufuma kuli Leza Tata na Kilisitu Yesu Mwene witu. ³ Inkhutayizya Leza, wino inkhamuwombela ukufuma pali yatata, ngati vino insita zyonsi inkhakwizuka umumapepo usiku nu musanya. ⁴ Pano inkhwizuka amansozi yako, inkhalonda ukukulola wewe, ukuti ningazula nukusechela. ⁵ Nizusiwa ni suwilo lyako ilya chumi, lino apanthandiko likazile muli nyokokulu Loyisi nanyoko Yunisi, nukuti nafikapo likwikala nupya na muli wewe. ⁶ Chii ali chifukwa chino inkhukwizusya kuno uwasye ichawupi chakwe Leza chino chili muli wewe ukupitila ukulambalika kwa makasa yane. ⁷ Apakuti Leza atatupa umupasi uwanthete, kweni uwamaka, nu walukundo nu wamuchinzi. ⁸ Achino utaya ninsonyi apa wukamboni ukuyana na Mwene witu, na pali nene, Pawulo, umunyepwe wakwe. Umumasyo yakwe, mwankhane ukuchula apamulandu wi landwe lisuma ukuyana na maka yakwe Leza. ⁹ A Leza wino watupuswisye sweswe nu kutwama sweswe nu lwamo ulutiswe. Asi uku milimo yitu ukuti awombe chii, kweni ukulingana na vino wapekinye nu wila wakwe.Watupile sweswe ivinthu vii muli Yesu Kilisitu lino insita zitani zitalike. ¹⁰ Kweni nomba ukupususya kwakwe Leza kwawumbukwa apa kuloleka kwakwe kapususya witu Yesu Kilisitu. A Kilisitu wino wamazile nu kuleta uwumi wuno wutalilekapo ukwaka ukupitila umwilandwe lisuma. ¹¹ Apa mulandu na chii, nasozilwe ukuya ne katanda, ne mupositoli nu kasambilizya. ¹² Apa mulandu na chii nani inkhuchula umu vintu vii. Kweni inthakuvwa insonyi, apakuti imumanyi wino namusuwila. apakuti inkhufikapo ukuti alingine ukulindilila vino imunenyile weliwe mphaka uwanda wuwu. ¹³ Sunga ulwezyo lwakusambilizya kuzima kuno muvwile kuli nene, ni suwilo nu lukundo luno luli muli Kilisitu Yesu. ¹⁴ Ichinthu ichizima chino wachita kuli wewe, chisunjilile ukupitile umumupasi wutiswe, wuno wikala muli sweswe. ¹⁵ Umanyile chii, ukuti wonsi yano yikala umu Eziya yafunileko kuli nene. Umukawukutila kaa muli Figelasi na Helimogenasi. ¹⁶ Mwene awape luse aya mung'anda yakwe Onesipolasi, apakuti wankomelzyana nene kayilikayili nukuti atuvwile insonyi ni minyololo yane. ¹⁷ Mumalo mwakwe, pano wali uku Loma, wandondanga kayilikayili, nukuti wanzanyile. ¹⁸ Mwene amupe weliwe ukuti azane uluse apawanda wulya. Umunzila zyonsi zino wangazwilizizyemo nene umu Efeso, umanyile ningo sana.