¹ Achino nomba, mwe yanane, mukome umuwila wuno wuli muli Kilisitu Yesu. ² Ivinthu vino wuvwile kuli nene pakasi pali ya kamboni ayinji, uviyike ukuyanthu ayasuwalikwa yano nawo yanga sambilizya. ³ Uwuvwe ivyakuwaya palipamwi na nene nene ngati umusilika umuzima wakwe Kilisitu Yesu. ⁴ Kutaya umusilika wino akakunda imilimo yasile, umwakuti asechelesye wino amutumile. ⁵ Nupya asizwikwa impumpu ndichakuti atakulwisya ukukonkana na masunde. ⁶ Chilingine ukuti umulimi umukome apochele tasi ivyakulya vyakwe. ⁷ Yelenganya tasi pali vino inkhuvwanga, muno Leza andakupe ukuvwichisya muli vyonsi. ⁸ Yizuka Yesu Kilisitu, Ukufuma umumbezu yakwe Deveti, wino wazyulupwike ukufuma ukuyafwe. Chii ukuyana nizwi lilandwe lisuma. ⁹ Muli wino inkhuchulichilamo mphaka ukufika apakunyepwa ni minyololo ngati ne chipondo. Kweni izwi lyakwe Leza asilinyepwe. ¹⁰ Ali chino inkhujimba muli vyonsi apa mulandu wakwe yano yasolwa, umwakuti nawo yanga pochelela ukupusuka kuno kuli muli Kilisitu Yesu, nu wuchindame wapenape. ¹¹ Kuno ukuvwanga kwa kusuwalikwa; '' Ndi chakuti twafwa nawe, tulikala nupya nawe. ¹² Ndi chakuti tukujimba, tuliteka nupya nawe. Ndi chakuti twamukana, nawe alitukana. ¹³ Ndi chakuti siswe yasuwalikwa, wene alikala umusuwalikwa, pano atanga ayikane wenga. ¹⁴ Pitilizyanga ukuwiwusya apa vintu vii, uwasoke apaminso pali Leza ukuyana nu kukanzikana apamazwi; ichinthu ichitakweti chimwi, nu kuponya sile amaka kuli yano yakuvwa. ¹⁵ Womba uwuzima wako apakuyipalamika wenga kuli Leza ngati we musimichilwe, wino akasambilizya ningo izwi lyakwe Leza ilya chumi. ¹⁶ Muleke ukukonchelezya amalyasi yasilsile, yano yangatwalasile anthu ukutali na Leza. ¹⁷ Ukuvwanga kwawo kulisata ngati ichilonda ichamunthapola. Pakasi pawo pali Hyumelasi na Filetasi, ¹⁸ yano yafumako ukuwumolimo. Yakavwanga ukuti ukuzyuka kwachitika mphiti, nukuti yakonona isuwilo lyakwe yamwi. ¹⁹ Napanowuli, ulufula ulukome lwakwe Leza lwimilila. Luli nichilanjizyo chii; ''Mwene wamanya yano ayakwe'' nukuti ''Wensi wino akwama izina lyakwe Mwene alingine ukufuma kuvinthu vino asivilungamane, ²⁰ Umung'anda inkhalamba musiyasile imbale zyakwe golidi na siliva.Mukaya nupya imbale izyamiti nivu. Zimwi muli zii izyamuchinzi apakuwombela, zimwi izyawula umuchinzi. ²¹ Ndichakuti wumwi akuyiswefya wenga ukufuma kuchiwombelo ichawula umuchinzi, wene imbale iyawula umuchinzi. Ayisilwe apambali, ukuya ichiwombelo ichakulondwa ku Mukalamba, nukuti ichipekanywe ukumulimo wonsi uzima. ²² Talukako kulunkhumbwa lwa chilumendo. Ukonkhe uwulungamane, isuwilo, ulukundo, nu mutende nayano yakwama pali Mwene ukufuma mumwenzo uswepe. ²³ Kwene ukane uwusilu na mawuzyo ayasilesile. Umanyile ukuti vikapapa ukupokota. ²⁴ Umuwomvi wakwe Mwene atalingine ukupwata. Mumalo mwakwe alingine ayichefye kuli wonsi, wino angasambilizya, numufuke. ²⁵ Umuwufuke alingine asambilizye yano yakumususya. Leza limwi angawapa ukulapa apakumanya uwumolimo. ²⁶ Yangaya ayawula chimwi nupya nukuleka ichipingo chakwe chiwa, pano yalemilwe naweliwe pakulonda kwakwe.