¹ Weka mwa banthumi bo bakanyamula ivibekete seveni bakiza nukunena nune, '' Za, nkhuzu kulangizya ukususiwa kwa malaya umukulu nkhani yo ikaite mu minzi aghinji nkhani, ² yuyo yo aba mwene ba pa chisu baka hula nawe, sona nu bwalwa bwa bu hule bwache abakwikala pa chisu baka kolwa nabo.'' ³ Po uwanthumi akanyamulila kubutali mu muzimu ku nkholongo, sona nkhalinga umwanakazi ikalite pa chinyamana ichichesamu chicho chizwile nia mazina agha nthusi. I chinyamana chikaba ni mitu seveni sona ni mphembe seveni. ⁴ U mwanakazi akavwala amalaya agha pepo sona aghachesamu sona akayaniwa nu golide, na mabwe agha langala, sona nu bwambo , akakola munyobe zyache u lubako lwa kwizula nu golide wa vinthu vyakufita sona ni vibibi ivya bwamalaya bwache. ⁵ Pa cheni chache pakasimbiwapo izina lyo likaba niching'anamulo ichakufisiwa: ''Babylon umukulu, u mama wa bwa malaya ni vinthu vyakufita pa chisu cha pansi.'' ⁶ Nkhalinga ukuti umwanakazi akolizye nu daba uwa banthu abaswepu aba Chala sona nu daba wabobakakomiwa pa chifukwa cha Yesu. Bo namulinga, nkhaswigha hee. ⁷ Loli u wanthumi akanena kukwane, ''Choni cho ukuswigha? Inthi nkhulinganye iching'anamulo ichakunuswefu icha mwanakazi sona nizya chinyamana chochimunyamwile, i chinyamana cho chili nimitu seveni sona ni mphembe teni. ⁸ I chinyamana cho mukachilinga chikabapo, loli ulu chitakuboneka, Ilelo po chikwiza pakufuma sona mu chibwina ichitali nukuya kukunangika. Bonsi bo bakwikala mu chisu, bonsi bo amazina ghabo ghata simbiwe mu buku lya bumi ukufuma pa bwandilo bwa chisu_ba kwiza pa kuswigha pobachilinga ichinyamana, chifukwa akabapo lumo, po ulu nayumo, sona inthi akize. ⁹ Apa pakulonda inyinong'ono iy mahala. I mitu seveni gho mapili seveni gho u mwanakazi ikalitepo. ¹⁰ Pali sona aba mwene seveni. Aba mwene fayivi bawile, weka alipo sona abanji bachili pakwiza, po nanthi iza, akuzukwikala akabalilo kanandi. ¹¹ I chinyamana cho chikabapo lumo, po ulu nachimo, loli we mwene wa eyiti. Yuyo akwimilila bala seveni sona akuya ku kupyutiwa. ¹² I mphembe teni zyo ukazilinga boba mwene teni bo bachili bata pokelite ichinamwene, loli bakwiza ukupewa ubulamulili ngati bo ba mwene mu awala lyoka poka nichinyamana. ¹³ Izi zya nyinong'ono yoka, sona bazukupa amaka ghabo nu bulamulili ku chinyamana. ¹⁴ Bazukulwa ubwite nu nang'onzi. Loli unang'onzi azukubapota chifukwa we Mwene wa bamwene sona we Malafyale wa ba nyafyale_sona bonsi na yuyo bitiziwa, basaliwa, sona basubaliwa.'' ¹⁵ U wanthumi akati kukwane, ''A minzi gho ukaghalinga, gho umalaya yula ikalitepo, bo banthu, magulu, mitundu, sona ni ndimi. ¹⁶ I mphembe teni zyo mukazilinga_zila sona ni chinyamana vizukumubenga umalaya. Vizukumusobezya nukuba nkhule, vizukulya umubili wache, sona vizukumocha wensi nu moto. ¹⁷ Pakuti u Chala abikite mu myoyo yabo ukuti vibombe ubwighane bwabo pakuvipa amaka ukuti vilamule ichinyamana mpaka amazwi gha Chala gha fisiwe. ¹⁸ U mwanakazi yo ukamulinga ko kaya akakulu ko kali nu bulaghilili pa bamwene ba pachisu.''