¹ Pandabindabi nkani mwisiku lya bwandilo musabata, bakabuka kwi pumpha, pakubika amafuta gha kununkila gho bakanozya. ² Bakagha ukuti ibwe balifumizyepo pi pumpha. ³ Bakinjila, loli batakawagha mubili wa Mwene u Yeso. ⁴ Vikabombwa vino, bo bachili batimbanizyikite, mwamabuchibuchi, abanthu babili bakimilila papipi bavwete imyenda iya kubala. ⁵ Bo abanakazi ubogha bukabakola ni vyeni vyabo bakinamila pansi, bakati ku banakazi, ''Ka honi cho mukulonda uwabumi mukasi mu bafwe? ⁶ Ate kuno, loli azyukite! Mukumbuke vyo akanenanga ku kwinu bo achili ali mu Galileya, ⁷ po akatingi uMwana wa Munthu abaghile ukupelekiwa mu nyobe zya balwani aba mbibi sona nu kupayikiwa, sona pi siku lya butatu akwiza ukuzyuka.'' ⁸ Abanakazi bakakumbukila amazyu ghache ⁹ bakanyokela ukufuma kwi pumpha sona nukubabuzya vyonsi vino ku bala leveni na banyabo bonsi. ¹⁰ Ulu u Maliya Magadalena, u Johana, u Maliya u nyina wa Yakobo, sona na banakazi abanyabo bakaya bababuzya ivinthu ivi abatumiwa. ¹¹ Loli inkani iyi yikaboneka ngati yakusita bwanaloli ku batumiwa, sona batakabasubalila abanakazi. ¹² Loli u Petulo akanyamuka nukusamalila kwi pumpha, sona, akimilila nukunanamizya mukasi, akalinga utwasala twa myenda pamwene. Po u Petulo akanyokela ukuya ku nyumba yache, nukuswigha navyo vikabombwa. ¹³ Lindilila, pakaba abanthu babili bakabukanga ku kaya kamo ko kakwitiziwa Emawusi, ko kakaba sikisite mayilosi ukufuma ku Yelusalemu. ¹⁴ Bakanenezanianga weka nu munyantche pa vinthu vyonsi vyo vikabombwa. ¹⁵ Vikabombiwa bo, bakunenezania nu kulalusania poka, u Yeso umwenecho akafika nu kwenda nabo. ¹⁶ Loli amaso ghabo ghakapotwa ukuti ghamumanye. ¹⁷ U Yeso akanena nabo, '' Ka umwe banthu babili mukunenezania nkani buli po mukwenda?'' Bakimilila nukulingisya mu bukalale. ¹⁸ Yumo uwabamo, yo akaba we Cleopas, akamwamula, ''Ka wewe munthu mwene mu Yelusalemu yo atamenye ivinthu vyo vibombiwe mu masiku agha?'' ¹⁹ U Yesu akanena nabo, ''Ka vinthu buli?'' Bakamwamula, ''Inkani iya kukwamfania nu Yeso wa ku Nazaleti, yo akaba mughonela, uwamaka mu mbombo na mu mazyu pamaso pa Chala na banthu bonsi, ²⁰ sona na baputi abasongo poka na balongozyi bo bakamupeleka nu kumupayika. ²¹ Loli tukasubalila ukutiweyo inti ize apulumusye u Izilayeli. Naloli, sona nivi vyinsi, ulu lisiku lya butatu ukufuma mo ivinthu vikabombiwila. ²² Loli sona, nabanakazi bamo mukabukutila kitu bakatuswighisya, po bakaba kwi pumpha pa ndabindabi hee. ²³ Po batakawagha umubili wache, bakiza, nukuti balinga iminthondwe ya bangelo bo bakanena ukuti wa bumi. ²⁴ Abanthu bamo bo bali nuswe bakaya kwi pumpha, sona bakavyagha ngati mo abanakazi bakanenela. Loli batakamulinga.'' ²⁵ U Yeso akanena nabo, ''Mwe banthu bapunganu na ba myoyo imikavu pakwivwisya mu vyonsi vyo abaghnela bakanenananga! Ka ²⁶ chitakaba chakubaghilila u Kilisitu atamiwe mu vyonsi ivi, nu kwinjila mu buchindamu bwache?'' ²⁷ Ubwandilo bwakufuma kwa Mose sona nukwizila mu baghonela, u Yeso akabang'anamulila ivinthu vyonsi ivi ukuyana nayuyo vya mumasimbo ghonsi. ²⁸ Bo bapalamila ku kaya ko bakayanga, u Yeso akalangizya ngati akulonda ukupululila. ²⁹ Po bakamupepeka, nukuti, '' Wikale nuswe, pakuti chamabwila kale sona kuli papipi ukwila.'' Po u Yeso akabuka nukwikala nabo. ³⁰ Vikabombiwa ngati ulu, bo bikala pansi ukuti balye, akasenda ichibama,nukuchisaya, nukuchimenyula, nukubapa. ³¹ Po amaso ghabo ghakighuka, po bakamumanya,po akasobela pamaso pabo. ³² Bakanenezania weka nu mu nyantche, ''Ka imyoyo yitu yitakatukila, bo akunena nuswe mu nzila, po akatwighulila amasimbo?'' ³³ Bakanyamuka mukabalilo kalanyene nukunyokela ku Yelusalemu. Bakaba ileveni bo babunganite poka na bonsi bo bakaba palanyene nabo, ³⁴ bakanena, ''U Mwene azyukite naloli,amubonekile u Simoni.'' ³⁵ Po bakanena ivinthu vyonsi vyo vikabombiwa munzila, sona namo u Yeso akabalangila po akamenyulanga u buledi. ³⁶ Bo banena ivinthu ivi, u Yeso umwenecho akimilila pakasi pa pabo, nukunena ku kwabo, '' Umutende ghube numwe.'' ³⁷ Loli bakatetema nukwizula nu bogha, bakamanya ukuti balinga umbepo. ³⁸ U Yeso akanena ku kwabo, '' Choni cho mukutamiwa? Ka choni cho mukwilalusya mwebene mu myoyo yinu? ³⁹ Linga mu nyobe zyane na mu vinama vyane, une nene. Za munkhole nukulinga. Pakuti umbepo atakuba nu mubili pamo amafupa, ngati mo mukundingila une mbelile.'' ⁴⁰ Bo anena ivi, akabalangizia inyobe zyache ni vinama vyache. ⁴¹ Loli batakivwisya chifukwa cha buhobosu, po bakaswigha. U Yeso akati kukwabo, ''Muli nachimo ichakuti mungalya?'' ⁴² Bakamupa ichimenyu cha nswi yakukazinga, ⁴³ akasenda sona nukulya pamaso pabo. ⁴⁴ Akati kukwabo, '' po nkhaba nga numwe, nkhababuzya ukuti vyonsi vyo vikasimbiwa mu ndaghilo zya Mose sona na baghonela sona mwa Masalimo ghabaghile ukufisiwa.'' ⁴⁵ Po inyinong'ono zyabo zikughuka, mwakuti bivwisye mu masimbo. ⁴⁶ Akati kukwabo, '' Vyovyo visimbiwe, ukuti u Kilisitu abaghile ukutamiwa nu kuzguka sona ukufuma ku bufwe pi siku lya butatu. ⁴⁷ Ukulapa nu kuhobokela kwa mbibi ghabaghile ghafumusiwe mu vikaya vyonsi, ukwandila ukufuma ku Yelusalemu. ⁴⁸ Mwebakaboni ba vinthu vino. ⁴⁹ Linga, nkubatuma namo u Tata wane akambuzizya. Loli mwikale mu chikaya mupaka muvwale amaka ukufuma ku mwanya.'' ⁵⁰ Po u Yesu akenda nabo mupaka kupipi ku Betaniya. Akabika inyobe zyache sona nukubasaya. ⁵¹ Vikabombwa ngati ubunyene, bo akubasaya, akabaleka nukunyamuliwa ukuya kumwanya. ⁵² Po bakamwiputa nu kunyokela ku Yelusalemu mu kuhoboka ukukulu. ⁵³ Bakalindanga mu tempeli, ukuwputa u Chala.