¹ Abanthu abinji bakanyamuka nukumutwala u Yeso kwa Pilato. ² Bakanda pakumupa inongwa bakati, ''Tumwaghite umunthu uyu akusobezya abanthu aba kaya kitu, sona akukanizya abanthu pa kusonkha umusonkho kwa Kayisala, po akunena akuti umwene weyo weKilisitu, mwene.'' ³ U Pilato akamubuzikizya akati, ''Ka uwe we mwene wa ba Yuda?''U Yeso akamwamula sona nukunena ukuti,'' Momo wanenela.'' ⁴ U Pilato akati ku baputi abasongo na ku banthu bonsi, ''Nthakumwagha ninongwa nazimo nayimo umunthu uyu.'' ⁵ Loli bakanena bakati, ''Akuvulungania abanthu, pakumanyisya mukaya konsi aka Yudeya, ukwanda ku Galileya mupaka na kuno.'' ⁶ Po bo u Pilato ivwa vino, akamulalusya nanthi akaba munthu wa ku Galileya. ⁷ Bo azimanya ukuti akaba mubulaghili wa Helodi, akamutuma kwa Helodi, yuyo wepe akaba mu Yelusalemu mu masiku ghalanyene. ⁸ Bo u Helodi amulinga u Yeso, akahoboka hee, papo akalondanga amulinge ku kabalilo akatali. Akamwivwanga sona akalondanga ukuti alinge ivimanyisyo vyo akubomba. ⁹ U Helodi akamubuzikizya u Yeso mu mazyu aminji, loli u Yeso atakamula nachimo. ¹⁰ Po aba puti abasongo na basimbi bakanyamuka nukunena ivibibi ivya kumupa inongwa. ¹¹ U Helodi na ba nkhondo bache bakamwangazya nukumunyazya. Po bakamuvwika imyenda yo mikulu po bakabuka nawe sonakwa Pilato. ¹² U Helodi nu Pilato bakamanyan isiku lilanyene pobo vimo vichili bakaba pa bulwani. ¹³ Po u Pilato akitizya bonsi abaputi abasongo, abalongozyi bonsi aba mu chisu chila na banthu bonsi ¹⁴ akababuzya akati,'' Mukiza nu munthu uyu ngati weyo apuvyanga abanthu, sona nkhulinga, une, bo namubuzikizya pantazi papinu, nthamwaghite ni nongwa nayimo pavyo mwamupanga inongwa. ¹⁵ Nu Helodi wepe atakayagha inongwa nayimo po amutuma sona ku kwitu, sona nkulinga, nachimochimo cho abombite ichibibi cho angakomiwa. ¹⁶ Po inthi mupanike sona nukumufumya.'' ¹⁷ Mumabuku amakali Luka 23:17 atalimo. Po u Pilatoakapewa ululaghilo ulwakuti afumyenge umu Yuda yumo mu jele pala kuli ulusekelo. ¹⁸ Loli bonsi bakalila hee, bakati, ''Umunthu uyu afumepo pano, loli mutusatulile u Balabasi!'' ¹⁹ U Balabasi akaba munthu yuyo bakamubika mu jele chifukwa chakuti akasambukila akaya nukukoma abanthu. ²⁰ U Pilato akababuzya sona, ukuti mukulonda ukutiimusatule u Yeso. ²¹ Loli bakakola ,bakati, ''Mumupamantile,mumupamantile.'' ²² Akanena sona aka butatu, ''Choni ,Ka mbibi buli yo umunthu uyu abombite? Nagha pakuti ate ninongwa nayimo iyakuti tungamukomela polelo pala twamupanisya, inti musatule.'' ²³ Loli bakamubuzya nizyu ilikulu, tukulonda ukuti tumupamantile. A mazyu agha kukola ghakamwikusya u Pilato. ²⁴ Po u Pilato akitikizya vyo bakulonda. ²⁵ Akabasatulila yo bakalondanga uwa kulwana ni chisu sona ukusoba abanthu po akabapa u Yeso mu bwighane bwabo. ²⁶ Bo bamufumyapo, bakamwimika u Simoni uwa ku Kileni, yo akafumanga ku kaya, bakamunyamulizya ichi mpinjika ukuti amukonkhe uYeso. ²⁷ Abanthu abinji, sona na banakazi bo bakaba ni chitima sona bo bakalilanga, bakamukonkha. ²⁸ Loli u Yeso bo ang'anamuka,abalinga, akati, ''bayemba ba ku Yelusalemu, mutakandilile une, loli mwililile mwebene na bana binu. ²⁹ Pakuti nkulinga amasiku ghakwiza gho bakwiza ukuti,' Basayiwa aba chumba babo batapapitepo lumo sona amabele ghabo batonsizyepo.' ³⁰ Po inti bakande banenenge ku vipili, 'tuwile uswe,' sona ku vipili, 'tufukile.' ³¹ Pakuti nanti bakubomba vyonsi ivinyene po ikomo lichili lili na mani, inti vikabombiwe vyachoni?'' ³² Abanthu bamo babili abanongwa, bakabapamantila poka ukuti bakomeke. ³³ Bo bafika pa malo gho bakughitizya ukuti ''Mafupa ku mutu,'' po bakamupayika poka nabanongwa-yumo ku ndyelo yache sona uyunji ku mongo kwache. ³⁴ U Yeso akati, ''Tata, baghobokele, pakuti batakuchimanya cho bakubomba.'' Po bakanda injuga, nukuzepulania imyenda yache. ³⁵ Abanthu bakalinganga vyo vikabombwanga bo abalongozyi bakumwangazya, bakuti, ''Akapokanga abanyabo. Po muleke ipoke mwene, nanti we Kilisitu wa Chala, umusaliwa.'' ³⁶ Aba nkhondo bakamwangalilanga,nukupalamila ku kwache, ukumupa ivineja, ³⁷ sona nukuti, nanti we Mwene wa ba Yuda, wipoke wemwene.'' ³⁸ Po pakaba ichikongwani pamwanya pache, '' Uyu we Mwene wa ba Yuda.'' ³⁹ Weka pa batula nongwa balabo bakamupamantila poka akamunenanga nukuti, ''Ka te we Kilisitu? Wipoke wemwene sona nuswe.'' ⁴⁰ Loli umunyabo akamususya, nukuti, Ka utakoghopa u Chala, po muli poka nawe pakupamantiliwa? ⁴¹ Uswe batupamantile uswe pa bwanaloli, papo tuli pakupokela vivyo tukabombanga. Loli umunthu uyu atakabomba ichibibi nachimo.'' ⁴² Po akati, ''Yesu, unkhumbuke pala winjila mu buchindamu bwako.'' ⁴³ U Yeso akati kukwache, ''Naloliloli nkukusimikizya, ilelo inti ube nune ku mu paladizo.'' ⁴⁴ Kakaba kabalilo ka ma awala sikisi, po ichisi chikighalila ichisu chonsi mupaka pa awala lya nayini ⁴⁵ ukuti izuba likapotwanga pakubala. Po umwenda wa mu tempeli ghukagabinkana pabili. ⁴⁶ Akalila umwa kukolomoka, u Yeso akati, ''Tata, munyobe zyako nkhubika umbepo wane.'' Bo anena ichi, akafwa. ⁴⁷ Bo usalijenti alinga vyo vikabimbiwanga, akamupala u Chala, nukuti ''Naloli umunthu ali muswepu.'' ⁴⁸ Po abanthu bonsi bo bakiza poka pa nukusimikizya bakalinga ivinthu vyo vikabombiwanga, bakanyokela bakwichaya pa vifuba vybo. ⁴⁹ Loli bonsi bo bakamumanya, na banakazi bo bakamukonka ukufuma ku Galileya, bakimilila pabutalipo, nukulingisya ivinthu ivi. ⁵⁰ Palanyene, pakaba umunthu yo akitiziwanga Yosefe, yo akaba yumo wa balongi. Akaba munthu mwiza nu muswepu. ⁵¹ Umunthu uyu atakivwana ni nyinong'ono zyo abalongi abanyabo ni mbombo zyabo. Akafumanga kukaya akakulu aka ku Yudeya ku Alimateya, sona akalondanga ubumwene bwa Chala. ⁵² Umunthu uyu, akabuka kwa Pilato, nukulenga umubili wa Yeso. ⁵³ Akaghusawula, nukughuvungilizya mu tumyenda utwiza, sona nukubika mwi pumpha lyo likakumbiwa pibwe, mo mutakasiliwamo nayumo yumo. ⁵⁴ Likaba li Siku lya kwinozyekera, sona isiku lya Sabata likaba papipi pakwanda. ⁵⁵ Abanakazi babo bakiza nu Yeso ukufuma ku Galileya bakakonkezya nu kulinga ipumpha lyo umubili wache bukabikiwamo. Bakanyokela bakaya pakuyania amafuta ni vya kununkizya. ⁵⁶ Po pa Sabata bakatuzya ukuyana ni ndaghilozyabo.