¹ Ba wamwitu, manye tubike ulwitiko lwitu mwa Mwene u Yesu Kilisitu, u Mwene wa mapalo, ukulinga ubunthu bwa banthu bamo. ² Lumo umunthu yumo angize injile po mubunganite avwete ivibangeli vya golide sona ni myenda imiza, po aponyene piza umunthu umupina yuyo avwete imyenda yo yifitite. ³ Nanthi wamulingisya umunthu yo avwete imyenda imiza nukunena ukuti, '''ikala pano pa malo amiza,'' loli ukumubuzya umunthu umupina ukuti, ''imilila aponyene, ''pamo ikala pa vinamavyane,'' ⁴ ka utakwilonga wemwene? Ka utaba we mulongi uwa mphepo imbibi? ⁵ Ivwa, mwebaghaniwa ba wamwitu, ka u Chala akasala ba chisu cha pansi ukuba bakabi mu lwitiko sona ukuti bakwiza ukuba ba mphyana ku chinamwene cha kumwanya ko akalaghizya ku bo bamughanite? ⁶ Loli mubafuyite abapina! Ka tebo bakabi babo babapusikite? ⁷ Ka tebo babapinyite? Ka tebo bakutuka izina iliza lyo mwikala mukwitizya? ⁸ Nanthi, bo bunonyene, mukukonkha indaghilo ukuyana na masimbo, ''muzukughana abapalamani ngati mo mwighanile mwebene,'' po bo mukubomba iviza. ⁹ Loli nanthi mutakughana abanthu bamo, kokuti mukutula inongwa, sona kokuti muli ninongwa pakuchizania indaghilo. ¹⁰ Pakuti wensi yo akwivwila indaghilo zyonsi, loli lumo lukumupota bo ali ninongwa mundaghilo zyonsi. ¹¹ Pala yumo akuti, ''Utakabombenge ubuchende,'' sona akuti, ''Utakakomenge.'' Po pala utakubomba ubuchende, loli ukukoma, kokuti ukuba wakunanga indaghilo. ¹² Polelo munene sona nukubomba ngati bobo bakuya pakulongiwa pachifukwa chakusula indaghilo mubwabuke. ¹³ Pakuti ubulongelo bukwiza ukusita chisa kubabo batalangizya ichisa, papo ichisa chikupota ibulongi. ¹⁴ Ka bwiza buli bo bulipo, ba wamwitu, nanthi yumo akunena ukuti ali nulwitiko, loli ate ni mbombo nazimo? Ka ulwitiko lula lungamupoka? ¹⁵ Buli nanthi uwamwitu pamo umuyemba avwete akabibi sona akusoba ichakulya isiku lila. ¹⁶ Po yumo mwa umwe akunena kukwabo ukuti, ''Bukanga mumutende, mwikale akiza sona mwikute.'' Nanthi mutabapile ivinthu ivyakubenelela pa mibili yabo, ka bwiza buli bo bulipo.? ¹⁷ Munzila iyakuyana nu lwitiko lwene, ukuti nanthi bate ni mbombo, bo bafwile. ¹⁸ Po yumo akuti, ''Uli nu lwitiko, sona indi ni mbombo.'' Ndangizya ulwitiko ulusita mbombo, sona inthi nkulangizye ulwitiko lwane mu mbombo zyane. ¹⁹ Ukwitikizya ukuti u Chala ali weka; po ukubomba akiza. Loli ni mphepo imbibi zyope zikwitikizya, sona zikutetema. ²⁰ Ka po mukulonda ukumanya, umunthu umupunganu, ukuti ulwitiko ulusita mbombo lwa mwalwe? ²¹ Ka atakaba we tata witu u Abulahamu yuyo akamanyikwa ni mbombo papo akabika u mwana wache u Ayizeki apakochela? ²² Mukulinga ukuti ulwitiko lukubomba ni mbombo zyache, sona nukuti mu mbombo zyache momo ulwitiko lukakulila. ²³ Amasimbo ghakafisiwa gho ghakunena ukuti, '' U Abulahamu akasubila u Chala, sona vikabelengeka ku kwache ukuti muswepu,'' sona akitiziwa ukuti mumanyani wa Chala. ²⁴ Mukulinga ukuti mo mu mbombo zyache momo umwanalume bakumulingila, sona temo mu lwitiko lwene awe. ²⁵ Munzila iyonyene sona, te we Lahabu yo akaba we malaya loli akiza amanyikwa mu mbombo po akapokela bo bakatumiwa sona nukubendezya inzila iyinyabo? ²⁶ Pakuti umubili gho ghute nu muzimu ghufwile, po viyanite bwaka nu ulwitiko lo lute ni mbombo nazimo lufwile.