¹ Ulu,ba wamwitu, mutwiputile ukuti izwi lya Mwene libukilile nu kuchindikiwa, ngati mo sona libelile numwe, ² sona nukuti tufumeko ku busita bugholosu na banthu ababibi, pakuti te bonsi bali nu lwitiko. ³ Loli u Mwene musubaliwa, yo inti abaghomye umwe nukubapoka umwe ukufuma kwa mubibi uyo. ⁴ Tuli numwe nu lusubilo mwa Mwene, ukuti mwebonsi mukubomba sona inti mubukilile pakubomba ivintu vyo tukubalamula. ⁵ Leka u Mwene alangizye imyoyo yinu ku lughano lwa Chala na mukufwililikira kwa Kilisitu. ⁶ Ulu tukubalamula umwe, ba wamwitu, mwizina lya Mwene witu u Yeso Kilisitu, ukuti mukanizye uwamwitu wensi yo akwikala mu bumi ubwabukata sona batakwikala ukwendera mukabele ko mukapokera ku kwitu. ⁷ Pakuti umwe mwebene mukumanya ukuti chiza ku kwinu pakupokera uswe, chifukwa tutakikala bwaka po tukaba numwe. ⁸ Tutakalya ichibama cha yumo ukusita kulipira, loli tukabombela ubusiku nu musanya mu bubombeli na mukwilwisya, po tutabaghile ukuba chakupyola kwa yumo wa umwe. ⁹ Tukabomba ichi te chifukwa chakuti tute nu bulamulili, loli tukabomba ichi umwakuti chibe chilangizyo ku kwinu,ukuti umwe mukupokera ku kwitu. ¹⁰ Pakuti po tukaba numwe, tukabalamula, '' Yo atakulonda pakubomba manyi alye.'' ¹¹ Pakuti tukwivwa ukuti bamo mumwinu bakwenda mu bukata ukusita ukubomba, loli mibili ya kutanganikwa. ¹² Po ulu ubonyene tukulamula nukubakwezya mwa Mwene u Yeso Kilisitu, ukuti babaghile babombe mwa chimyamya sona nukulya ichibama chabo. ¹³ Loli umwe, ba wamwitu, mutakalite pakubomba ubwiza. ¹⁴ Sona nanti yumo atakwivwila amazwi gha mukalata iyi , mumusungilie sona mutakabe nawe poka, ukuti akoziwe insoni. ¹⁵ Mutakamusenye ukuba mulughu, loli mumuchevye ukuba ngati we wamwitu. ¹⁶ Ulu leka u Mwene uwa mutende umwenecho abape umutende akabalilo konsi munzira yonsi. U Mwene abe numwe mwebonsi. ¹⁷ Une, ne Paulo, nkusimba ichi ninyobe yane, cho cho chi dindo pa kalata wensi yo nkusimba. ¹⁸ Ubwila bwa Mwene witu u Yeso Kilisitu ghube numwe mwensi. Ameni.