¹ Ulu ukuyana nu kwiza kwa Mwene witu u Yeso Kilisitu sona nu kubungana kwitu poka ukuba nawe, tukubalonda hee umwe, ba wamwitu, ² ukuti mutakaneng'ene mu nyinong'ono zinu pamo nukutamiwa, lumo nu mbepo, pamo ni ntumi pamo nu kalata yo akuba ngati akufumira ku kwitu, ku mfundo yakuti isiku lya Mwene lyafika kale. ³ Nayumo atakabapusike umwe munzira yonsi. Pakuti te chize mpaka pala ukuwa kwache kwiza, sona nu munthu wa kunanga aboneke, umwana wa paraniko. ⁴ Uyu weyo akususya sona nu kwikwezya pa bonsi bo bakuti boba Chala bo bakwiputiwa. Po nukuti, bakwikala mwi tempeli lya Chala nukwibika bene ngati bo ba Chala. ⁵ Ka mutakukumbuka ukuti po nkaba numwe kababuzya ivinthu ivi? ⁶ Ulu mukumanya cho chikumukanizya, ukuti ize asetuliwe pakabalilo akakuyana kene. ⁷ Pakuti ichakufisama cha uwakunanga chikubomba kale, loli pali yumo yo akumukanizya ulu mpaka afumisiwemo mu nzira. ⁸ Po umunanzi akwiza pakusetuka, yo u Mwene u Yeso akwiza pakumukoma nu muyi wa mulomo wache nukumuleka abe wa bwaka pa busetuli bwa kwiza kwache. ⁹ Ukwiza kwa munanzi kukwiza ukuba mbombo zya Satana na maka ghonsi, ni vimanyikwilo, sona ni viswigho vya bumyansi, ¹⁰ sona nu luko lonsi ulwa bunanzi bo bukupusika bo bakumala, chifukwa batakapokekera ulughano lwa bwanaloli nukuti bapokiwe. ¹¹ Pa chifukwa ichi u Chala akubatumira umusuvyi uwa maka, ukuti basubile ubumyansi ¹² sona nukuti bonsi babe bakusuliwa bo batakusubila ubwanaloli mu buyo bwache bakasenya ukuba lwangalo mukusita kugholoka. ¹³ Pololi tubaghile tubike amapalo kwa Chala chifukwa chinu, ba wamwitu bakughaniwa nu Mwene, chifukwa u Chala akabaseba umwe ngati nseke zya bwandilo izya kupokiwa ukwendera mukubaghilisiwa nu Muzimu sona nu lusubilo mu bwanaloli. ¹⁴ Akabitizya umwe ku ichi ukwendera mu bulumbilili bwa mazwi amiza, ukuti mube bakupokera ubuchindamu bwa Mwene u Yeso Kilisitu. ¹⁵ Po ulu ba wamwitu, imilira mwa kukazya nukukolera nkhani ku mikalile gho mukamanyisiwa, lumo ni lizwi pamo nu kalata witu. ¹⁶ Ulu leka u Mwene witu uYeso Kilisitu umwenecho nu Chala u Tata witu, yo atughanite uswe sona akutupa ubufwase bwa kumwanya nu lusubilo ukwendera mu bwila, ¹⁷ abasansamusye nu kughomya imyoyo yinu mu mbombo yonsi na mwizwi.