¹ Mwe baghaniwa, ulu uyu we kalata wa bubili yo nkhubasimbila umwe, sona mubonsi banonyene bobo bakubakumbusya pakubaneng'enia inyinong'ono zinu izya naloli ² pakuti umwe mukumbukenge amazwi gho ghakaneniwa kale na baghonela abaswepu nindaghilo zya Mwene sona u Mupoki witu akabapa ukwizila mu batumwa binu. ³ Ichabwandilo mumanye ichi, mu masiku gha kubumalilo pazukwiza abalobezyo. Abene bakwiza ukobezya nukukonkha ku vinyonywa vyabo. ⁴ Bakwiza pakunena, ''Ka lili kwi ilayizyo lya kwiza kwache? Pakufuma po u Tata witu akafwila, ivinthu vyonsi vili mo vikabela, ukwanda ku bwandilo bwa kupeliwa.'' ⁵ Abene madinkho bwaka pakuluvya ukuti kale na mazwi gha Chala, kumwanya ni chisu vikabako ukufuma ku minzi sona ukwizila ku minzi, ⁶ ukwizila umu momo ichisu chikamalila pakabalilo kala, umwakuti chikizula na minzi. ⁷ Nizwi lilanyene ilyakuyana bwaka kumwanya na pansi visenguliwe nu moto, ukufika pisiku lya bulongi sona nukumala abanthu bo batakwiputa. ⁸ Baghaniwa, mutakaluvyenge ichinthu ichi, mukuti isiku lyoka mwa Mwene ghali ngati yo myaka wanu sauzandi, sona amasiku wanu sauzandi lili ngati lisiku lyoka. ⁹ U Mwene atakuchedwa ukuyana namo akalaghizyila, ngati mo bamo bakwinong'onela. Mu malo ghache, umwene ali bwaka mye papinu. Atakulonda ukuti yumo mwa umwe azimile loli ukuti ali wensi mwa umwe abe nu mwabi wakupinduka. ¹⁰ Napo, isiku lya Mwene lizukwiza ngati munthu umwivi: Kumwanya kuzukwiza nukwenda nichongo ichikulu. Ivya mu mwanya vikwiza ukukoziwa nu moto, po ichisu ni vyakubombiwa vyache vizukochiwa vyonsi. ¹¹ Pakuti ivinthu vyonsi ivi vikwiza pakumala mu nzila iyinyene, ka muzukuba mwe banthu ba luko buli? Mube banthu abaswepu sona abakwikala mwakwiputa. ¹² Umwe mukulindilila sona mwalubilo isiku lya kwiza kwa Chala. Pisiku lila, kumwanya kukwiza ukukomanika nu moto, po ivinthu vyonsi vizusunguluka ni chilungula ichikulu. ¹³ Loli ukuyana ni laghizyo tukulindilila kumwanya ukupya sona ni chisu ichipya, mo ubugholosu bukwiza pakubamo. ¹⁴ Polelo, baghaniwa, bo mukulindilila ivinthu ivi, bomba iviza vinu ukuti mube baswepu sona basita chilema nachimo po achili, mumutende. ¹⁵ Sona, zanga tulindilile ubololo bwa Mwene witu bo bupoki, ngati mo uwamwitu u Paulo akabasimbila umwe, ukuyana na mahala gho ghapeghiwa kukwache. ¹⁶ U Paulo akunena ivnthu ivi mu bakalata bache bonsi, mo muli ivinthu ivipala pakuvivwisya, ngati mo akabombela sona mu masimbo aghanji, pakokumanika kwabo. ¹⁷ Polelo, baghaniwa, pakuti muzimenye kale nizya vinthu ivi po vichili, mwikole mwebene ukuti mutakinjile umwa kupusikiwa na banthu abasita ndaghilo ukuti mwize mutaye ulwitiko lwinu. ¹⁸ Loli mukule muchisa na mahala gha Mwene witu sona umupoki u Yesu Kilisitu. Po ubuchindamu ghube mumwache ukufuma ilelo mpaka bwilebwile. Ameni!