¹ Abaghonela aba bumyansi bakiza ku banthu, sona na bamanyisi abamyansi bope bakwiza kukwinu. Abene inthi bakize mu bufisamu ni vimanyisyo vyo vikubakomania vyo vya bumyansi, sona bakwiza pakumukana u mweneyo yo abatabula bonsi. Abene inthi bakisendele bene ukukomanika ukwa lubilo. ² Abinji bakwiza pakukonkha izya bumalaya mu mwabo, inzila ya bwanaloli yikwiza pakusamuliwa. ³ Mu bupafu bonsi kwa bo bakwiza pakubatamanthizya umwe na mazyu agha bumyansi. Ukulongiwa kukwiza akabalilo kata kukaba sona nukukomanika kwabo kutasipwilepo. ⁴ Pakuti u Chala atakabaleka bwaka abangelo bo bakananga. Mu malo ghache akababika ku jele bapinyiwe ni nkhusa nukubabika mu chisi mpaka pisiku lya bulongi. ⁵ Sona, atakachileka ichisu ichakale. Mu malo ghache, akamupoka u Nowa, yo akaba mulumbilili wa bugholosu, poka na banji seveni po akiza nukwizula kwa minzi mu chisu cha basita kwiputa. ⁶ U Chala akabika sona utwaya twa Sodomu nu Gomola mwi toyi nukutuponia mukukomanika ukuba ngati chimanyisyo cha vyo inthi vibombiwe ku bo batakwiputa. ⁷ Pakuti loli pakaba umugholosu u Loti, yo akasulumania ni nkhalo ya bwa malaya ya bwa banthu bo batakakomanianga indaghilo. ⁸ Pakuti umunthu umugholosu, yo akikalanga pakasi papabo isiku ni siku, akatamiwa nkhani mu moyo wache ughugholosu chifukwa cha vyo akalolela sona nukwivwa. ⁹ U Chala amenye mo akubapokela abanthu bo bakumoghopa ku ngelo sona mo akubafundila abanthu bo te bagholosu mpaka pisiku lya bulongi. ¹⁰ Ichi naloli cha bonsi bo bakukonkha ivinyonywa ivibibi ivya mubili nabo bakubukana ubulaghili. Bajimvu sona bamitumvyo, abene batakoghopa bo bakubasamula bo bachindamu. ¹¹ Abangelo bali nu bukulu ukubachila na maka, loli abene batakubapa ubulongi bwa musamu. ¹² Loli abanthu aba, bali ngati vinyamana vyo vitakwinong'ona, ivyene vikapeliwa pakuti vikoliwenge nukukomiwa. Abene batakuvimanya vyo bakuvisamula. Mukukomania, bope bakwiza pa kubamala. ¹³ Bakwiza ukupokela ichabupi cha mbibi zyo bakubomba. Bakwinong'ona ukuti chizapo pakuyihobosya imibili yabo pisiku. ¹⁴ Abene banyazu sona bakukozya insoni. Bakuhoboka mu mbombo izya kubapusika po mukulya poka nabo. Abene bali na maso ghosi aghabumalaya; batikutisiwe ni mbibi. Bakubategha bo badedebazu mu vyakubombwa , sona nimyoyo yikubomba zyo zya vinyonywa. Abene bana bakughuniwa! ¹⁵ Bayilekite inzila ya bugholosu sona basobelite, bakonkhite inzila ya Balaam umwana waBeor, yo akaghana umuvwalo wa butulanongwa. ¹⁶ Loli akachemeliwa pa chifukwa cha busobi bwache---Imbunda yo yitakunena, yikanenela mwizwi lya munthu pakumukanizya umughonela ku bupunganu bwache. ¹⁷ Abanthu aba vyo viziba vyo vite na minzi sona chibuvi cho chikuputiwa ni mphepo. Bobo ichisi ichisisya chikubalindilila. ¹⁸ Abene bakunena amazyu gho ghabupunganu, bakubadeba abanthu ukwendela mu vinyonywa vya mibili yabo. Bakudeba abanthu bo bakuyezya ukutoloka ukufuma ku banthu bo bakwikala munthamyo. ¹⁹ Bakulaghizya ubwabuke ku kwabo, po abene bobo bazya ku bubibi. Pakuti umunthu akuba muzya ku chinthu chonsi cho chikwiza kukwache. ²⁰ Nanthi batoloka ku bubibi bwa mu chisu ukwizila mu mahala gha Mwene sona umupoki u Yesu Kilisitu sona po bakwipinzania mu vilanyene nukuvipota, pabumalilo bakuba babibi nkhani ukuchila pabwandilo. ²¹ Chili ichete kukwabo ukuti batakayimanyepo inzila ya bugholosu ukuchila ukuyimanya nukuleka ululaghilo lo lukapeghiwa ku kwabo. ²² Ichili ichi cha momumo papinu : ''Imbwa yikunyokela sona mumatapisi ghache, sona ingulube yo yoghite yikunyokela munthipa.''