¹ kan fi zol ayan isim bito Lazarus. huwo min bet ania, beld ta nas Maryam wa Martha ukut bito. ² Maryam huwo yau al kan masau kura ta Yesuah bi riha wa masau bi shar bito, aku bito Lazarus kan ayan. ³ Baad dak rasulu ukuwat del le Yesuah, gali, "Ya Rab, aynu zol al inta bi hibu de huwo ayan." ⁴ Zaman Yesuah asuma, Huwo kelim gali, "Ayan de ma le mutu, lakin ashan bi mejidu Allah wa ashan jena ta Allah bi mejidu be uwo." ⁵ Kan Yesuah bi hibu Martha wa ukut bito Mariam wa Lazarus. ⁶ Ashan kida wokit Huwo asuma gali Lazarus kan ayan, Yesuah akir geni tani yomen ziyada fi mahal al Huwo kan fi fogo. ⁷ Baad dak, Huwo kelim le talamiz, "Kede nina ruwa tani fi Yahudia." ⁸ Talamiz biga kelim le Huwo, "Ya Mualim, hasa de nas Yahudin bi hawil ashan bi rejimu Inta, wa kaman Inta bi ruwa hinak tani?" ⁹ Yesuah juwabu, "Musu saat ta nahar itnashar saa fi yom al wahid? kan zol bi dowuru be nahar, huwo ma bi awgu ashan huwo bi aynu be nur ta nahar. ¹⁰ Wa ashan kida, kan huwo bi dowuru be bilel, huwo bi awgu ashan nur mafi fogo." ¹¹ Huwo kelim zede, wa baad dak, huwo kelim le humon, "lakin Ana mashi ashan Ana bi gowumu huwo min mutu." ¹² Ashan kida talamiz kelim le Huwo, "Ya Rab, kan huwo bi num, huwo bi gum." ¹³ Yesuah kan gasid kelim mutu ta Lazarus, lakin homon fekir gali huwo kan bi kelim an nom ta raha. ¹⁴ yau Yesuah kelim le homon be saraha, " Lazarus mutu. ¹⁵ Ana farhan , le ajli intakum, ana kan mafi hinak ashan intakum bi amin. kede anina ruwa le homon." ¹⁶ Thomas, al homon timania, kelim le talamiz al bi ruwa ma huwo, kede anina kaman ruwa ashan kaman anina bi mutu ma Yesuah." ¹⁷ zaman Yesuah ja, huwo ligo Lazarus kan kalas endu arba ayam fi turuba. ¹⁸ betania kan gerib ma orshelim, masafa talata kilu miter min sika. ¹⁹ ketir min yahudin kan ja le mariyam wa martha, ashan bi azi le homon an aku bitimon. ²⁰ biga martha, zaman asuma gali Yesuah jai, hia ja ashan bi gabilu huwo, lakin maryam kan geni fi bet. ²¹ martha biga kelim le Yeusah, "Rab, lo kan inta heni, aku taikan ma bi mutu.lakin ²² hasa, ana arufu gali ai haja al inta bi asalu min Allah ,huwo bi wodi le inta." ²³ Yesuah kelim le hia, aku taki bi gum tani." ²⁴ Martha kelim le Huwo, Ana aruf huwo bi gum fi youm ta giyama yom ta akir." ²⁵ Yesuah kelim le huwo, "Ana yau giyama wa haya; al kan amin fi Ana, sala kan huwo mutu, bi hai; ²⁶ wa al kan hai wa amin fi Ana ma bi mutu. Sei inta bi sedek? ²⁷ hia kelim le huwo, "nam ya rab, ana amin gali inta yahu mesih, jena ta Allah, al bi ja fi donia. ²⁸ "zaman hia kelim kalam de, hia ruwa nadi ukut bito mariam be seir. wa hia kelim, mualim fi heni wa huwo bi nadi inta." ²⁹ zaman hia asuma kalam de, hia gom be sura wa ja le huwo. ³⁰ Yesuah lisa ma ja fi karia lakin huwo kan fi mahal al maryam gabil ma huwo fogo de. ³¹ zaman yahud, al kan ma hia biga fi bet wa al kan bi azi hia, homon aynu maryam gum fok be sura wa tala bara, homon ruwa wara ta hia, homon fekir gali hia bi ruwa fi kubur ashan bi kori hinak. ³² zaman maryam ja fi mahal al Yesuah kan foko wa hia aynu huwo, hia waga tehet gura bito, wa kelim le huwo, "ya rab, lo kan inta hina, aku bitai kan ma bi mutu." ³³ zaman Yesuah aynu hia bi kori, wa yahud al ja ma hia kaman bi kori, huwo kan dakalu fi roho bito wa huwo galgan; ³⁴ huwo kelim, intakum kutu huwo wen?" homon kelim le huwo, ya rab taal wa aynu." ³⁵ Yesuah kori ³⁶ biga Yahudin kelim, "aynu godur sunu huwo bi hibu Lazarus!" ³⁷ lakin bad min homon kelim, sei zol de, al fata ena ta zol al amiyan de, kaman ma bi agder ashan bi kutu zol de ma bi mutu?" ³⁸ biga Yesuah tani, dakalu fi juwa nefas bito, huwo ruwa fi gubur. huwo kan fi wa gutu hujar foko huwo. ³⁹ Yesuah kelim, shilu hujar de bara." Martha ukut ta Lazarus, la huwo mutu, kelim le Yesuah, "ya Rab, wokit ze de gisim de kalas karabu, le anu huwo mutu endu arba ayam." ⁴⁰ Yesuah kelim le hia, Ana ma kelim le inta gali, kan inta amin, inta bi aynu mejid ta Allah?" ⁴¹ ashan kida homon tala hajer de bara. Yesuah arfa ena bito fok wa kelim. "baba, ana bi rija le inta shukuran ashan inta asuma le ana. ⁴² Ana arufu gali inta bi asuma le ana fi kulu zaman,lakin ashan nas al fi gidam bitai de ana kelim kalam de, ashanhomon bi amin gali inta rasulu Ana." ⁴³ bad ma huwo kelim kalam de, huwo kori be sot shedid, "Lazarus, taal bara!" ⁴⁴ zol al mutu de tala bara; kura wa ida bito kan murbut be malabis, wa wosa bito kan lifu be gumas. Yesuah kelim le homon, "fiku huwo wa kede huwo ruwa." ⁴⁵ ketir min Yahud al ja le maryam wa homon ainu haja al Yesuah amulu, homon amin fi huwo. ⁴⁶ lakin bad min homon ruwa le ferisin wa kelim le homon hajat al Yesuah amulu. ⁴⁷ biga ruasa ta kahana wa ferisin ze mejles ma bad wa kelim, anina bi amulu shunu? zol de amulu hajat ketir. ⁴⁸ kan anina sibu huwo barau ze de, kulu nas bi amin fi huwo; nas Romanin bi ja wa bi silu mahal bi tanina wa uma ta nina." ⁴⁹ be hal tani, be takid zol fi nus bitomon, caiafa, kan min mustawa al fok le ruasa ta kahana fi sena dak, kelim le homon, ⁵⁰ intakum ma bi arufu ai haja. intakum ma bi fekir gali ahsan le inta kede zol wahid mutu le nas bidal uma kulu bi mutu." ⁵¹ Hasa huwo ma bi kelim min nefsa bito. lakin, huwo reista kahana fi sena dak, huwo naba gali Yesuah bi mutu le uma; ⁵² wa ma bes le uma, lakin kaman ashan bi limu iyal ta Allah ali ferigu del fi mahal wahid. ⁵³ min yom dak le gidam homon katitu kef homon bi kutu Yesuah bi mutu. ⁵⁴ amulu zaman Yesuah biga ma bi ruwa fi gidam ta Yahud be moftuh, lakin huwo ruwa min hinak le bilad gerib min beriya le medina bi nadi Ephraim. huwo geni hinak ma talamiz bito. ⁵⁵ eid al fusha ta Yahud kan biga gerib, wa ketirin tala wa ruwa fi orshelim min medina gubal eid al fusha homon der ruwa nedefu nufus bitomon. ⁵⁶ homon kan bi fetisu Yesuah, wa bi kelim le badu bitomon ze homon bi wogif fi haikal, "intakum bi fekir shunu? sei huwo ma bi ja fi eid?" ⁵⁷ wa kan reis ta kahana wa ferisinwodi talimat gali kan .ai wahid arufu Yesuah wen, kede huwo ja wori ashan homon bi amsuku huwo