¹ "Lalue, akan malaikat ungkup ka Sardis tuliskan: Itie paner Inya am bahompue tujuh Roh* Hatalla umakan tujuh bintang yah: Aku ingat perbuatan kolai. Urang mamaner amun kolai hirup, tapie sabujurnya kolai matie. ² Bajaga, lalue bakuat lalam hal-hal am masih tege, am hampir matie, laie Aku hompan baulih pengawiemu am sempurna lalam pailae Hatalla. ³ Laie iyah, ingat apa am jadie kolai tarima umakan kan dongar, patuh umakan batobat am! Amun kolai honta bajaga, Aku datang bera kan sikue urang pangolit lalue kolai hontae akan ingat jam berapa honae datang kakolai. ⁴ Tapie, kolaie bahompue urang ka Sardis am pakoyannya masih barasih; lalue urang jam bajalan barotae-Ku honie pakoyan putih laie urangnya layak. ⁵ Urang am monang akan dipakoyan putih lalue Aku hontae akan mahapus namanya mulae Kitab Kahidupan. Aku akan maakue namanya ka paharap Ompaie-Ku umakan ka paharap malaikat-malaikat-Nya. ⁶ Inya am bahompue poning biar am manongar apa am dipaner laie Roh akan ungkup-ungkup." (Surat akan Ungkup ka Filadelfia) ⁷ "Lalue, akan malaikat ungkup ka Filadelfia tuliskan: itie paner mulae am Barasih lalue am Bujur, am marigap kunci Daud,* am mambuka umakan hontae sikue urang ulih manutupnya; am manutup umakan hontae sikue urang ulih mambukanya: ⁸ Aku ingat parbuatan-parbuatanmu. Ilae tie, Aku jadie mambuka pintu akan kolai, am hontae sikue urang am ulih manutupnya laie kakuatan kolai konie, tapie kolai jadie mamatuh firman-Ku umakan hontae manyangkal nama-Ku. ⁹ Ilae tie, Aku akan mangaruh kawan sinagoge Iblis yah, ammangakue jadie urang Yahudi, tapie sabujurnya bukan, malainkan marongka, Aku jam mangaruh urang datang lalue sujud ka kakie mu, lalue mangaruh urang ingat amun Aku mangasihi kolai. ¹⁰ Laie kolai jadie manjagae firman katekun-Ku, Aku jam manjagae kolai mulae masa kasusah am akan datang ka saluruh dunia, akan maujie urang am tingal ka bumi. ¹¹ Aku segera datang. Rigap apa am kolai hompue nyaman hontae sikue urang pun akan maalap mahkotamu. ¹² Inya am monang, Aku ama manjadikan inya tiang penahan Dangau Barasih Hatalla-Ku, lalue inya hontae akan ingkas mulae diyah; lalue Aku akan manulis akannya nama Hatalla-Ku umakan nama kota Hatalla-Ku, iyah am Yerusalem am baharu, am yah turun mulae surga, mulae Hatalla-Ku, umakan nama-Ku am baharu. ¹³ Inya am bahompue poning biar am manongar apa am dipaner Roh akan ungkup-ungkup." (Surat akan Ungkup ka Laodikia) ¹⁴ "Lalue, akan malaikat ungkup ka Laodikia tuliskan: Itie paner Sang Amin, saksi am satia uma am bujur, awal mulae sagala ciptaan Hatalla: ¹⁵ Aku ingat perbuatan-perbuatanmu, laie kolai hontae colap umakan hangat. ¹⁶ jadie, laie kolai hangat kuku, hontae hangat umakan colap, Aku akan mamutah kolai mulae nyawa-Ku. ¹⁷ Laie kolai bapaner, 'Aku kaya, bakalimpah, lalue hontae kakurangan apa-apa,' umakan hontae ingat amun sabujurnya kolai sengsara, malang, miskin, buta, umakan telanyang. ¹⁸ Aku manasehat kolai akan mamolie mulae-Ku amas, am jadie konae murni honie api nyaman kolai manjadie kaya, lalue pakoyan putih nyaman kolai ulih mahonienya sahingga rasa malu lalie kolaie talanyang hontae akan tailae, lalue maoles salap akan matamu nyaman kolai ulih mailae. ¹⁹ Urang am kukasih, Ku tegur lalue Ku hajar; laie iyah, relakan hatiemu umakan batobatlah! ²⁰ Ilae tie! Aku badirie ka paharap pintu lalue mangatok. Amun tege urang am manongar suara-Ku umakan mambuka pintu, Aku akan tamae akan inya lalue makan barotanya, umakan inya barotae-Ku. ²¹ Inya am monang, Aku am maizinnya durue barota-Ku ka takhta-Ku, sama bera Aku jadie monang umakan durue barota Ompaie-Ku ka takhta-Nya. ²² Inya am bahompue poning biar am manongar apa am dipaner Roh akan ungkup-ungkup."