(Paringatan Akan Urang Kaya) ¹ Ui urang-urang kaya, dongarkan! manangis lalu ingatkan akan kasusah am akan kona kolai. ² Kakayaanmu jadi buru lalu pakaianmu kona puseh bunta. ³ Amas umakan perakmu jadi bakarat, lalu karat iyah akan jadi bukti am mamoratkanmu lalu mamuseh dagingmu bera api. Kolai jadi manimuk harta metuh ari-ari taakhir. ⁴ Dongarkan, upah urang bagawie am magalola humamu, am kolai tahan honi kacurangan, basoru, malawanmu. Lalu basoru urang pamanennya jadi sampai ka poning Tuhan semesta alam. ⁵ Kolai jadi hirup ka bumi lalam kamewahan lalu kasonangan dirimu kaniri, kolai jadi manyobukan hatimu metuh ari panyamolihan. ⁶ Kolai jadi mahukum lalu mampati urang bujur, lalu inya honta malawanmu. (Tabah lalam Pandaritaan) ⁷ Laie iti, kawan manyariku, sabar mah sampai metuh ari kadatangan Tuhan. Ilakan apa ulah patani mananti buah am baie am hasil tanah, tantikan lalu sabar sampai datangnya hujan awan lalu hujan akhir. ⁸ Kolai jam harus basabar, kuatkan hatimu panatang Tuhan jadi damping. ⁹ Kawan manyariku, hinang kolai rise rahas siku akan am bukan nyaman kolai honta kona hukum. Ilakan, Sang Hakim jadi badiri ka muha pintu. ¹⁰ Kawan manyariku, jadi taladan pandaritaan lalu kasabaran, ilakan para nabi am bapaner kalalam nama Tuhan. ¹¹ Kami maanggap bahagia urang am tabah. Kolai jadi manongar katabahan Ayub lalu ma ilae maksud Tuhan metuh akhirnya, laie Tuhan iti ponuh balas kasih lalu murah hati. (Hinang Basumpah) ¹² Akan tapi, kawan manyariku, ka tingi urasnya, hinang kolai basumpah, baie demi langit, bumi, lalu demi apa pun. Panerkan'' au'' amun au lalu'' honta'' nyaman kolai honta kona jatu hukuman. (Kuasa Doa lalam Iman) ¹³ Apakah ka antara kolai tege am metuh susah? Biar am inya badoa. Apakah tege am metuh basukacita? Biar am inya banyanyi mazmur. ¹⁴ Apakah ka antara kolai tege am metuh kanyaman? Biar am inya manimai am tuha-tuha ungkup lalu urang harus mandoakannya, maurapinya honi binya lalam nama Tuhan. ¹⁵ Doa am kona naie lalam iman akan manyalamatkan urang am kanyaman iyah lalu Tuhan akan mahuaskannya. Lalu, amun inya metuh mangaruh dosa-dosa, inya akan kona ampun. ¹⁶ Laie iyah, kahonanya kolai hona mangaku dosamu lalu hona mandoakan nyaman kolai baie. Doa urang am bujur am kona naie nyaman bujur-bujur, bujur bakah kuasanya. ¹⁷ Elia inyaham kalunen biasa bera diri. Inya badoa bujur-bujur nyaman honta turun hujan, lalu hujan honta turun ka negeri iyah salama tolu tahun onam bulan. ¹⁸ Limah iyah, anya badoa mula, maka langit mancurahkan hujan lalu bumi manumuhkan buahnya. (Manulung Urang Am babali ka Hatalla) ¹⁹ Kawan manyariku, saandainya tege ka antara kolai am manyimpang mula ka bujur, lalu tege urang am manulungnya babali, ²⁰ ingatkan laie urang manaing urang badosa baulang ka jalan am bujur akan manyalamatkan jiwa urang iyah mula pamati lalu manutup banya dosa.