¹ Iman yah jaminan katingie sagala -galanyae dirie harapkan, lalue bukti mulae sagala sasuatu am hontae tailae. ² Laie, iman urang yah metuh zaman hariyah baulih pujian. ³ Laie iman, dirie mangerti amun sa isie dunia konae cipta honie firman Hatalla. Jarie, apa am tailae hontae takaruh laie apa am tailae jam. ⁴ Laie iman, Habel mamorie akan Hatalla kurban am lobih baie mulae apa am diborie Kain. Malalue pamorie nya yah, Habel baulih kasaksian am baie mulae Hatalla manjari urang am bujur; Hatalla mamorie kasaksian yah manarimae kurban pamorienya. Lalue laie imannya, biar inya mati, Habel masih ulih bapaner. ⁵ Laie iman, Henokh di incang nyaman iyae hontae baulih pamatie umakan iyae hontae didapat laie Tuhan jarie ma incangnya; laie sahompan di incang, iyae baulih kasaksian manjadie urang am manyenangkan Hatalla. ⁶ Hontae mungkin manyenangkan Hatalla hontae honie iman, laie sapa jam am badamping akan Hatalla harus percaya amun Hatalla yah tege, lalue Hatalla jam mamborie upah akan urang am mangaue Iyae. ⁷ Laie iman, salopas jarie konae diparah laie Hatalla berae paristiwae am hompan iyae ilae, Nuh hontae gentar umakan taat mangaruh bahtera honie manyalamatkan kaluarganyae. Honie itie, Nuh mahukum dunia umakan manjarie panerus kabujur am sasuai imannya. ⁸ Laie iman, Abraham metuh di timai Tuhan, taat ingkas ka homan am jarie diborie akan pusakanyae. Lalue, iyae ingkas, biar iyae hontae ingat iyae honae ingkas kamanih. ⁹ Laie iman, iyae ingkas lalue diam ka tanah am jadie di janjiekan berae tingal ka tanah am asing, yah am ka lalam kemah basamah Ishak umakan Yakub; kawan panerus mulae janji am samah, ¹⁰ Laie Abraham metuh manantie sutie kota am tege fondasi, am perancangnya umakan pamangunya iyah am Hatalla. ¹¹ Laie iman, Sara manarima kamampuan manganung umakan malahirkan ananyae, biar iyae tamang umakan jarie tahurau tuhae akan barana, laie Sara maanggap Iyae am jarie bajanjie akannyae am setia. ¹² Laie iyah, mulae siku urang am jari bujur tuhae umakan hona matie am, lahir katurunan am banya beraekan binatang ka langit uamakan jumlahnyae hontae tahitung berae buti pasir am ka sisie pantai. ¹³ Urang itie urasnyae jarie matie lalam iman hontae baulih apa am konae janjie, tapi urang ma ilae umakan manyambut janjie-janjie yah mulae jauh, puna ingat amun urang yah kaban panatang umakan urang asing ka bumie itie. ¹⁴ Paner urang am bera iyah manunyukan jelas amun urang metuh mangaue tanah araie akan urang. ¹⁵ Laie, amun am urang pikirkan yah nagara am urang konae jari tinggalkan sahompanya, maka urang jam ulih baulang ka dikeh. ¹⁶ Tapi, urang gau ka suti nagara am lobih baie, iyah am nagara surgawi. Laie yah am, Hatalla hontae malue amun dipaner Hatalla urang sabab Iyae jari manyadiakan kota akan urang tie. ¹⁷ laie iman, metuh Tuhan maujienya,Abraham mayorahkan Ishak akan kurban; iyae am jari manarima janji-janji iyah rela diborie anak tungalnya. ¹⁸ Laie anak iyah, Hatalla basae bapaner,"Laie nama Ishaklah katurunan kolaie am konae paner.'' ¹⁹ Abraham mangorae kapacayaan akan Hatalla, bahkan inya percaya hatalla sanggup mahirupkan urang matie. Ibaratnya, Abraham jadi baulih baulang mulae pamatie. ²⁰ laie iman, Ishak mamborkati masa depan Yakub umakan Esau. ²¹ laie iman, Yakub, damping pamatienya, mamberkati anak-anak Yusuf. Iyae manyembah akan Hatalla lalue basandar akan kapalae tungkatnya. ²² Laie iman, Yusuf, metuh akhir hirupnya bapaner masalah kaluarnya bangsa Israel mulae mesir lalue mamori parintah sahubungan akan tulang- tulangnya. ²³ Laie iman, Musa, katika iyae lahir, ditawukan sapalamat tolu bulan laie urang tuhanya. Urang mailae bahwa musa yah jam onin am bujur romis, lalue urang hontae golae akan parintah raja. ²⁴ Laie iman, Musa, sapalamat iyae bujang, hontae tarimae dijokue anak mulae putri Firaun. ²⁵ Iyae lobih mamilih manderita basama umat Hatalla mulae am manikmati kasenang dusa am cumae samantara, ²⁶ iyae maanggap bahwa kahinaan Kristus lobih barogae mulae am saluruh kakayaan Mesir sabab Musa mailae akan pahala am honae datang. ²⁷ laie iman, Musa maningalkan Mesir hontae mansai golae akan kagusar Raja Firaun saolah-olah iyae ulih mailae Iyae am hontae tailae yah. ²⁸ Laie iman, Musa malaksanakan paskah umakan mangobar darah nyaman malaikat pamati hinam mannyuntue bangsa Israel. ²⁹ Laie iman, bangsa Israel bajalan manipah laut mirah,berae bajalan ka tanah koring. Tapi, katika urang Mesir mancubae berae hal am samah,tapie urang ditanggolamkan. ³⁰ Laie iman, dinding Yerikho hancur salopas dikaliling sapalamat tujuh arie. ³¹ Laie iman, Rahab, pelacur yah, hontae konae patie basamah akan urang-urang am hontae taat katika iyae manarima mata-mata Israel honie hatie damai. ³² Lalu, apa mulae am kupaner? Aku hontae arae cukup waktu akan mangisahkan akan kolaie sual Gideon, Barak, Simson, Yefta,Daud, Samuel, lalu kaban nabi, ³³ am laie iman jam jarie mangalahkan karajaan- karajaan, mangawi kabujur, baulih janji-janji, lalue manutupkan nyawa singa-singa, ³⁴ mamatikan nyalae api, talopas mulae mata porang, dikuat mulae kalomahan urang, am gancang gagah lalam batempur, lalue malawan kaban tantara asing. ³⁵ kawan labinie manarima mulae urang-urang mati urang malalue kabangkitan, tapi tege jam am konae jerae lalue manulak manarima kabebasan nyaman urang baulih pahirup ka lalam pahirup am lobih baie. ³⁶ sementara yah, tege jam am konae hinae umakan konae cambuk, lalu konae belenggu uma di penjara. ³⁷ Urang diranjam, digaragaji menjari dua, lalu kona patie honie podang. Tege jam am namuai lalu mahonie pakaian mulae kulit domba atau kulit kambing; urang puna miskin, konae ditindas, lalue kian saujanya. ³⁸ Dunia itie hontae pantas akan urang,urang namuai kapadang gurun umakan gunung-gunung, diam ka helat-helat gunung, lalu gua-gua ka lowa tanah ³⁹ Biar iyae baulih kasaksian am baie laie iman am urang bagorae, urang hontae narimae apae am dijanjikan. ⁴⁰ Laie, Hatalla manyadia sagalae am lobih baie akan dirie, biar hontae arae dirie, urang honta akan jarie sampurna.