¹ Lalu, Saulus pun manyatujui pamati Stefanus iyah. Saulus Mamatikan Ungkup ka Yerusalem Metuh ari iyah, tege urang kona kiyan am bakah homan paharap ungkup ka Yerusalem, lalu urang uras tapisah ka homan Yudea rang nua Samaria, kacuali kawal rasul. ² Barapa urang saleh mangubur Stefanus lalu datang ratapan am bera iyah bakah taharapnya. ³ Akan tapi, Saulus bausaha mamatikan ungkup dengan tama ka dangau demi dangau. Inya maihir kalaki rang nua labini, lalu manyorahkan urang ka lalam panjara. Filipus Mamarahkan Injil ka Samaria ⁴ Lalu, urang am jadi tapisah bakaliling samil mamarahkan Injil. ⁵ Filipus turun ka homan kota Samaria lalu mamarahkan tuntang Kristus. ⁶ Lalu, urang am banya dengan sahati maila kan apa am am Filipus marahkan lai urang jadi manongar maila tanda-tanda ajaib am inya ngaruhnya. ⁷ Lai, roh-roh jahat maluar mula urang-urang am dirasuknya, samil basoru suara nyaring, uras banya urang lumpuh pincang am di baikannya. ⁸ Lai iyah, tege sukacita bakah ka kota iyah. ⁹ Amun, tege saurang kalaki banama Simon am sahaompannya jadi mancontohkan sihir ka kota lalu mangaruh garogi uras urang Samaria, lalu manyoku bahwa kanirinya urang bakah. ¹⁰ Uras urang, nampara mula urang paling koni sampai urang paling bakah, baparah, ''Urang itie yaham kuasa Hatalla am dijoku 'Bakah'.'' ¹¹ Maka, urang mamori parhatian ka inya lai jadi sakian lamat inya jadi mangaruh urang takjub dengan ilmu sihirnya. ¹² Amun, jadi urang-urang iyah mamparcaya Filipus am mamarahkan Injil tuntang Karajaan Hatalla lalu nama Kristus Yesus, urang dibaptis, bai kalaki ataupun labini. ¹³ Bahkan, Simon kaniri parcaya jadi inya kona dibaptis, inya tarus homan damping Filipus, lalu katika maila babagai mukjizat tana-tana ajaib am tajadi, inya manjadi takjub. ¹⁴ Metuh waktu iyah, katika rasul-rasul ka Yerusalem manongar bahwa urang-urang Samaria jadi manarima firman Hatalla, urang mamutus Petrus rang nua Yohanes ka urang-urang koyah, ¹⁵ am datang lalu badoa bagi urang agar urang manarima Roh Barasih. ¹⁶ Lai, Roh Barasih hompan turun mula tingi saurang pun mula urang, urang baya jadi dibaptis ka lalam nama Tuhan Yesus. ¹⁷ Lalu, Petrus rang nua Yohanes manompangkan jarinya ka tingi urang lalu urang manarima Roh barasih. ¹⁸ Katika Simon maila bahwa Roh Barasih diborikan malalu panompangan jari rasul-rasul, Simon manawarkan duit ka rasul-rasul iyah, ¹⁹ dengan bapaner, ''Borikan jam ka aku kuasa iyah nyaman satiap urang am ka henya aku manompangkan jariku akan manarima Roh barasih.'' ²⁰ Akan tapi, Petrus bapaner ka Simon, ''Samoga duitmu iyah habis barotamu lai kolai bapikir kolai baulih mamudah karunia Hatalla dengan duit! ²¹ Kolai honta hompu habagian atau hak lalam hal iyah lai hatimu honta bai ka paharap Hatalla. ²² Jadi, batobatjha mula kajahatanmu iyah lalu badoalah ka Tuhan nyaman, jakai mungkin, niat hatimu baulih mamaafkan ka kolai. ²³ Lai, aku maila bahwa kolai tege ka lalam empedu am pahit lalu lalam jeratan kajahatan.'' ²⁴ Amun, Simon manyawab lalu bapaner, ''Badoajha akan aku ka Tuhan nyaman apa am jadi kolai parahkan honta manimpa aku.'' ²⁵ Maka, jadi Petrus rang nua Yohanes basaksi dengan bujur-bujur mamarahkan firman Tuhan, urang baulang ka Yerusalem samil mamarahkan Injil ka banya desa urang Samaria. Filipus Mamanikan Urang Etiopia ²⁶ Limah iyah, malaikat Tuhan bapaner ka Filipus, ujanya, ''Misik am lalu badari ka Salatan, ka jalan am turun mula Yerusalem manunyu Gaza. jalan iyah yaham jalan am sepi.'' ²⁷ Filipus pun huas lalu ingkas, Lalu, tampa saurang Etiopia, am yaham sida-sida mula saurang pajabat pangadilan Sri Kandake, Ratu Karajaan Etiopia. Inya batanggung jawab tingi uras harta sang ratu. Inya jadi datang ka Yerusalem akan basambayang, ²⁸ lalu pas baulang pulang, samil duru ka lalam karetanya mamaca kitab Nabi Yesaya. ²⁹ Lalu, Roh bapaner ka Filipus, ''Badari lalu bagabungjha dengan kareta iyah.'' ³⁰ Maka, Filipus baguang ka kareta iyah lalu manongar urang iyah pas mamaca kitab Nabi Yesaya. Filipus batanya ka inya, ''Apakah raja mangerti apa am pas raja baca?'' ³¹ Lalu, urang iyah manyawab, ''Bera apa aku tahu, kacuali sasaurang mambimbingku?'' Maka, inya mangundang Filipus akan nai duru barotanya. ³² Metuh waktu iyah, bagian mula Kitab Suci am metuh inya baca yaham iti, ''Inya manaing bera saiku domba ka homan panyamolih, lalu bera sasiku ana domba hompan digunting bulunya mambisu senga Inya honta mamuka nyawa-Nya. ³³ Lalam kahinaan-Nya, kahonta adilan dirobut mula-Nya. Sapa am baulih mamarah katurunan-Nya? Lai, hirup-Nya jadi dirobut mula bumi.'' Yes. 53:7-8 ³⁴ Limah iyah, sida-sida iyah manyawab lalu bapaner ka Filipus, ''Aku mohon ka kolai, tuntang sapa sang nabi mamarahkan iti, tuntang dirinya kaniri atau tuntang urang bukan?'' ³⁵ Lalu, Filipus mamuka nyawa nya, lalu mulai mula Kitab Suci iti, inya bakhotbah tuntang Yesus ka inya. ³⁶ Lalu, saat urang badari manompuh parjalanan, urang sampai ka homan am baarai, lalu sida-sida iyah bapaner, ''Ilajha, tege arai! Apa am manghalangku akan mani?'' ³⁷ [Lalu, Filipus baparah, ''Jakai raja parcaya dengan saponuh hati raja, raja tahu.'' Lalu, inya manyawab lalu bapaner, ''Aku parcaya bahwa Kristus Hatalla.''] ³⁸ Limah iyah, sida-sida iyah mamarintahkan kareta akan bahonti. Lalu, urang badua turun ka arai, Filipus lalu sida-sida iyah, lalu Filipus mambaptisnya. ³⁹ Jadi urang badua kaluar mula arai, Roh Tuhan manaing Filipus badari, sida-sida iyah honta mailanya mula, lalu malanjutkan parjalanan-nya samil barami. ⁴⁰ Amun, Filipus maulih kanirinya homan ka Asdod, katika inya malalu kawasan iyah, inya mamarahkan Injil ka uras kota sampai inya tiba ka Kaisarea.