Sifat-Sifat Kalunen Metuh Akhir Zaman ¹ Perhatikan bahwa metuh ari-ari tarakhir, masa-masa kasusah akan datang. ² Lai, urang akan manjadi pancinta diri kaniri, pancinta duit, parongka, sombong, payumpah sarapa, honta taat akan urang tuha, honta tahu batarima kasih, honta baie, ³ honta tahu mangasihi, honta rajin badamai, rajin manfitnah, honta tahu manandalikan kaniri, jahat, honta suka apa am baie, ⁴ panghianat, caroboh, angkuh, lobih mancintai hawa nafsu mula mancintai Hatalla, ⁵ Pailanya mah maharoti tapi manyangkalkan kuasanya, jauhkan urang am bera iyah. ⁶ Lai, ka antara urang tege am manyasup ka lalam ungkup lalu malawan labini am lomah am jadi dibebani lai banya dosa lalu manyosat urang akan hawa nafsu. ⁷ Labini bera iyah salalu balajar, tapi honta tahu ingan sampai pangenapan akan ka baie. ⁸ Samah bera Yanes rang nua Yembres am malawan Musa, bera iyah jam urang iti am malawan kabaie. Pikiran urang jadi rusak lalu iman urang honta tahan uji. ⁹ Akan tapi, urang honta tahu lobih jauh mula lai kabodohan urang akan nyata akan satiap urang, samah bera kadua urang iti. Nasehat Paulus Ka Timotius ¹⁰ Tapi, kolai jadi uma ajaranku, cara hirupku, tujuan hirupku, imanku, kasabaranku, kasihku, lalu katekunanku, ¹¹ bera panganiayaan lalu panderitaan am ku alami ka Antiokhia, Ikonium, rang nua Listra. Aku batahan lalam panganiayaan, lalu Tuhan manyalamatkan aku mula uras iyah. ¹² Sabujurnya uras urang am hona hirup maharoti lalam Yesus Kristus akan dianiaya, ¹³ tapi urang am jahat rang nua panipu akan jadi lobih buru mula, urang manyosat rang nua kona sosat. ¹⁴ Tapi akan kolai, lanjutkan apa am jadi kolai palajar lalu jadi kolai yakini lai kolai tahu mula sapa kolai mampalajarinya, ¹⁵ mula metuh koni kolai jadi magenal Kitab Suci am sangup mamorimu Hikmat akan kasalamatan malalu iman lalam Yesus Kristus. ¹⁶ Uras Kitab Suci diinspirasi lai Hatalla lalu bamanfaat honi balajar, honi manyatakan kasalamatan, honi mamaie kalakuan, lalu mandidik lalam kabujur. ¹⁷ Amun bera iyah, kalunen hompu Hatalla akan bakena lalu cukup longkap honi satiap kalakuan baie.