¹ Aku baharap, kolai sabar taharap kabungulku am koci, lalue kolai memang sabar taharap aku. ² Laie, aku marasa cemburu akan kolai dengan kacemburuan ilahi laie aku jarie manunangkan kolai akan sutie kalakie, yah am mamoriemu akan perawan am suci akan Kristus. ³ Tapi, aku gola, hinang-hinang, samah macamkan ular am dengan baakal manipu Hawa, macam yah jam pikiran kolai disosatkan mulai katulusan tuntang kamurnian pagabdian ka lalam Kristus. ⁴ Laie, kolai sabar metuh siku datang lalue mamaner tentang Yesus am bukan, am beda dengan apa am kami paner, atawa metuh kolai manarima roh am beda, am hompan kolai tarima, atawa injil bukan am hompan kolai tarima. ⁵ Manurutku, aku hontae kurang mulae kawan rasul am luar biasa yah. ⁶ Biar aku hontae pintar lalam hal bapaner, tapi hontae lalam kapintar, laie dengan banya cara, kami jarie manunyukkan akan kolai lalam sagala hal. ⁷ Atawa, apae aku mangawi dosa katika aku maronahkan dirieku kanirie nyaman kolai ulih kona tingie laie aku mamaner Injil Hatalla akan kolai dengan cuma-cuma? ⁸ Aku marampas ungkup-ungkup bukan dengan manarima upah mulae urang akan malayani kolai. ⁹ Lalu, katika aku basamah kolai susah, aku hontae manderoh siku urang jam laie kaban manyarieku am datang mulae Makedonia am jarie mamorie kaperluanku. Lalue, lalam sagala hal, aku manyaga dirieku akan hontae manjarie beban akan kolai am rajin mangaruhnya . ¹⁰ Semacam iyah kabujur Kristus ka lalamku, kabangganku tie hontae kona halang ka wilayah-wilayah Akhaya. ¹¹ Ngapa? Apa laie aku hontae mangasihi kolai? Hatalla am maingatnya! ¹² Amun bera iyah, Aku tarus mangawie apa am ku gawie sahingga aku ulih manota kasempatan mulae urang am hona akan kasempatan yah nyaman ulih samah kan kami lalam hal-hal am urang banggakan. ¹³ Sabab, urang-urang macam iyah am rasul-rasul palsu, pagawi-pagawi am curang, am manyamar akan rasul-rasul Kristus. ¹⁴ Hal iyah hontae heran laie Iblis jam manyamar manjarie samahkan malaikat am torang. ¹⁵ Laie iyah, hontae am heran amun kaban pangawinya manyamar samah kan kaban pangawi am sabujurnya, am sahapus urang nya samah satimpal dengan Perbuatannya kanirie. (Panderitaan Paulus akan Kristus) ¹⁶ Sakali mulae, aku mamaner hinang tege sutie am maanggap aku tie bungul. Amun bera iyah, tarima aku jam akan urang am bungul nyaman aku jam ulih koci babangga. ¹⁷ Apa am aku paner lalam hal keyakinan akan kabanggaan itie, aku hontae mamanernya samah kan kahona Tuhan, malainkan samah kan lalam kabungul. ¹⁸ Banya urang am bangga secara daging. Jarie, aku jam bangga. ¹⁹ Sabab, kolai bijaksana sahingga dengan sanang hatie kolai basabar taharap urang bungul! ²⁰ Kolai basabar, amun tege urang am ma hulun kolai, manolan kolai, ma alap kauntungan katingie kolai, maningikan dirie nya kanirie, atawa manampar muha kolai. ²¹ Dengan iyah aku bujur malue mamaner bahwa kami terlalu lomah akan iyah! Tapie, apa jam am urang bukan baranie akan bebangga,-- aku bapaner samahkan urang bungul -- aku jam baranie. ²² Apakah urangnya Ibrani? Aku jam. Apakah urangnya Israel? Aku jam. Apakah urangnya katurunan Abraham? Aku jam. ²³ Apakah urangnya malayani Kristus? Aku lobih-lobih jam -- aku bapaner samah kan urang gila. Jerih payahku lobih banya, lobih rajin ka lalam penjara, pukulan-pukulan am hontae ulih kona hitung, lalue am lobih rajin tege ka lalam bahaya maut. ²⁴ Mulae urang-urang Yahudi, sabanya lima kali aku jarie manarima ompat puluh kurang sutie cambukan. ²⁵ Tolu kali aku kona rabas honie huwie, sakali aku dipedak honie batu, tolu kali aku tege ka kapal karam, sutie malam umakan sutie arie aku kona seret galombang laut. ²⁶ Banya bujur lalam pajalanku, aku kona ancam bahaya mula sungai, mula urang parampok, pihak urang-urang Yahudi, lalue am bukan urang-urang Yahudi. Aku kona ancam bahaya mulae kota, ka padang belantara, ka laut, lalue jam bahaya mula kaban manyari palsu. ²⁷ Aku jarie basusah payah umakan bagawie borat, tatap tajaga, kaporan umakan ka haus, rajin mayan tege pamuseh, lalam kadingin, lalue mayan bapakaian. ²⁸ Tuntang, salain hal-hal iyah, tege jam masalah sa arie am manjarie tanggung jawabku akan mamolihara ka tingie uras ungkup. ²⁹ Sapa am lomah, lalu aku honta lomah? Sapa am jatu, lalue aku honta barami? ³⁰ Amun aku harus ba bangga, aku bangga katingie hal-hal am manunyukan kalomahanku. ³¹ Hatalla umakan Bapa Tuhan Yesus, am harus konae puji sapalamat nya, maingat amun aku hontae marongka. ³² Ka Damaskus, gubernur ka loba Raja Aretas maila kota Damaskus akan manangkap aku. ³³ Tapi, aku manurunkan sabuah karanyang mulae sabuah tangawan ka dinding, sahinga aku talopas mulae jarinya.