¹ Jich te jpuk k'opetik sok te yermanotak te ayik ta bay lum yu'un Judea la yayik stojolok te sch'uunejik x'u ka te sk'op te Diose te jyan lumetike. ² K'alal Pedro mobael ta bay Jerusalén, jich te mach'atik ju'un ayik sok te circuncisoetik kaj bek yalbeyik. ³ Jich laj yalik; te ja'ate la ajoinabaix sok te winiketik te jmaba yich'ojik circuncision janix jich weatik sok. ⁴ Jich te Pedro och xcholbey yay ta jchajbach'ap' jich la yal: ⁵ Te k'alal ayon ta lum yope, yakon ta sk'oponel Dios a jich jach kil te bitil pajal yilel sok muk'ul sabana pak' te likbil ta schanebal xchikin ko tel ta ch'ulchan, jich jul tel ta stojol. ⁶ K'alal te jkil la jnop: la jkil chambalametik te chaneb yakanik te ayik ta sbaj te balumilalej, jti' wal chambalametik te yaj st'ajsbaik ta lumej sok te te-eltik mutetike. ⁷ Jich la jkaiy stojol jun k'op te jich la jyalbon: jach'an Pedro mila ati sok we'an. ⁸ Jich laj kalbey: jo'o kajwal, te jo'onej mayuk ochem ta jke te bina maba lekuk sk'oplal sok te boloben sk'oplale, ⁹ Jich ta yan buelta te k'ope la sut bon tel k'alal ta ch'ulchan: "te beluk yaloj te Diose te sakubenix yu'unej ma me xa wal te ma lekuk sk'oplale". ¹⁰ Oxeb buelta jich k'ot ta pasel, jich spisil la yich stat'esel moel yan buelta ta ch'ulchan. ¹¹ La jtaj te ilel, ox tul winiketik tek'atik ta st'i te naj te winiketik tikumbiliktel, ta k'alal ta lum Cesarea. ¹² Te espiritu yu'un te Diose, la yalbon te ya xboon soke, manchuk me ya x-at' ta k'otan te yantike. Sok la sjoinonik bael uk wak tuk te kermanotaktike jich botik a ta snaj te winike. ¹³ Sok laj xcholbotik te bit'il la yi'il te ch'ul abat tek'el ta banti snaj, jich yak ta yalelaj to: ''jti kun bon tel tul winik ta Jope sok ik'aiktel sujt'el te Simone, te ja sbi'ilinej Pedro. ¹⁴ Te ja ya yalbeyex jun mantalil ja yu'un ya me ja ta ja kolel te ja'ate sok spisil ja naj. ¹⁵ K'alal jach'on ta k'op ta stojolik, te ch'ul espiritu tal ta stojolik, jich bitil k'alal jul ta xjajch'ibal ta jtojoltikuke. ¹⁶ Te jo'onej ajk'nax jul ta jol te beluk laj yalbon te kajwaltike: ''Te Juane la yak' ich' ja' sok ja'; yan te ja'exe ya me ja a wich'ik te ch'ul espiritue.'' ¹⁷ Jich yu'un, te me janix te Dios laj yak' beyu'uk tej smajt'anike jich bit'il laj yak' botikuke k'alal te laj ch'uuntike te kajwaltik Jesucristoe, ¿mach'aona te jo'one te ya jkom te Diose? ¹⁸ K'alal la yaiyik stojol spisil into mayuk bina la yalik, janax ochik ta yich'el ta muk' te Diose, ja nax jich och yalik into: "Te Dios la yak' sujt'es yot'anik te yantik lumetike.'' ¹⁹ Te mach'atik la yich'ik pujk'esel ta skuenta yu'un uts'inel te ja jach'aj te k'alal laj te Esteban lek la yich'ik pujk'eselik belaa ta bay lum Fenicia, Chipre, sok Antioquía, mayuk mach'a la yalbeyik yay te sk'op te Jesuse janax te Judioetike. ²⁰ Jich yu'un cha'ox tul winiketik yu'un lum Chipre sok Cirene, k'otik ta lum Antioquía la staik ta k'op te Griegoetike ja yu'un jajch'ik ta xcholbeyel yayik te yach'il k'op yu'un te kajwaltik Jesus. ²¹ Jokimbilik yu'un te yu'el te kajwaltike jich bayal mach'atik la xch'uunik sok la sujt'es yot'anik ta stojol te kajwaltike. ²² K'alal k'ot ayej ta stojolik te ch'uunjeletik ta Jerusalén: ja yu'un la stikunbael k'ejel to te Bernabé bajt' ta Antioquía. ²³ K'alal k'ot le-a la yilbey yutsilal te Diose, binub yot'an yu'un; jich kaj smuk' tejsbe k'inal yayik ta spisilik ja yu'un yakuk x-ainik ta stojol te kajwaltike, sok spisil yot'anik. ²⁴ K'ax lek yot'an stukel te Bernabé nojel ta ch'ul espiritu sok ay bayal xch'unjel yot'an, bayal mach'atik ochik ta xch'uunel te kajwaltik. ²⁵ Jich te Bernabé bajt' ta lum Tarso yu'un te ba slej te Sauloe. ²⁶ Te k'alal la stae, la yik' tel ta Antioquía. Jich jun jawil la sjoinik te ch'unjeletike sok la sp'ijtesik bayal ta tul te ants winiketike. Jich sbajbialan la yich'ik albeyel ch'uunjeletik te nopojeletik ta lum Antioquía. ²⁷ Ja yorail te k'ot sk'alel te cha'ox tul te alwanejetik te koik tel ta Jerusalén k'otik ta Antioquía. ²⁸ La stek'an sba te tule, ja' Agabo sbiil, la yich' tijel yu'un te ch'ul espitue te ya xtal muk'ul winal ta spamal te balumilale. Ja k'ot ta pasel a te k'alal ay ta ajwalil te Claudioe. ²⁹ Jich yu'un te nopojeletik la staik ta nopel ta jtulutul ta ya stikunbeyik koltayel te kermanotaktik te ayik ta Judea. ³⁰ Jich la spasik; te la stikumbeyik beel tak'in te ansianoetike ta sk'ab te Bernabé sok te Sauloe.