¹ Saulo ẽiẽi jyve pẽinte ñẽiẽipe Esteban jukaha verã. Hokava arape heta tupao õñepyrõ mymorãhãã Jerusalenpe. Opaite, ñymomohẽi tenta Judeapi hareka Samaria, koñẽiĩ Apostolre ha'ẽiã hai. ² Ã'ãmo kuaretare Tumpa haihuva Esteban hetekue ñoty hareka heta hãpirõ reta. ³ Tẽivã Saulo haipe opa momohẽi Tumpare jyrojavare hareka hẽinta retaipitei iche oho, nohẽi mbytyryry kuimbaire hareka taupere raha mbyperesoka verã. ⁴ Tẽivã Jerusalenvi opa momohẽiã vekuare mbeu reta Ñẽiẽi kaviva ryheva ohova retaipi. ⁵ Ẽelipe, hai jyve pẽinteva, oho tenta Samariape hãrã õñepyrõ ijeta hareka mbeu Kristo ryheva. ⁶ Kuaretare ñymbatymba ñynoĩ hareka jasaka kavihe reta Ẽelipe hei'õ rãĩmi hareka jyve mbai heshaha verã hai japova. ⁷ Shara heta kuareta espiritu porãmba ĩmẽire vekua opamba mohẽihãshi hareka hokava porãmba õhẽimashirã sapukemba; hareka vatamba vekua, japa vekuare opa kuera. ⁸ Hãrã hai rehe opaite hokava tentamipe õre vy'aite jyre. ⁹ Tẽivã haipe pẽintemba'ẽi kuimbai Simon he'iashua, pajepe mbai kua'ia hokava tentape hareka mbytavy'ia kuaretare Samariape'õ, heimba'i ijehe kuareta vateve'õ. ¹⁰ Opaite jasakahe reta mishĩvavive hareka vateve'õre, hãrã hei reta: Kova kuimbaimba ĩmere hai Tumpa ñymbaikatu he'iashua. ¹¹ Hãrã jasaka kavihe reta, shara ñymbai kuaakue rupii heta ara mbytavypy reta. ¹² Tẽivã rojama reta Ẽeliperã mbeu Ñẽiẽi kaviva Tumpa vate'õ mburuvisha vasurã vate araivi ouva ryheva hareka Hesukristo heerã, vokape kuimbai hareka taupere ñymyngarai reta. ¹³ Hãrã Simonteiva rojarã ñymyngarai jyve, hãrã õñepyrõ mi'ĩrũshu Ẽelipe, mbyrymaĩhe mbai heshaha verã hareka mbai kavi heshaha verã hesharã. ¹⁴ Apostolre Jerusalenpe'õre kuaama Samariape'õre rojama Tumpa ĩñẽiẽirã, mondoshu reta haity Pedro hareka Juan. ¹⁵ Vãhẽima jyraharã, jururehe reta opaite jyrojavare Samariape'õ, Espiritu Santo myvãhẽi verã reta. ¹⁶ Shara nde'iaveteri pẽinteva vejyhe reta Espiritu Santorã; koñeĩ myngaraishu reta Ñandeja Hesu heepe. ¹⁷ Pedro hareka Juan ipo ñono'ĩãrẽihe retarã, kyrã vãhẽihe reta Espiritu Santo. ¹⁸ Simon hesha Espiritu Santo ou ĩãrẽi reta apostolre ipo ñono ñynoĩhe retarã, kyrypoti mbeureshu, ¹⁹ heishu: Pymẽiẽiveshe hokava mbaikatu, mbava shepo añono ĩãrẽirã, vejyhe verã jyve Espiritu Santo. ²⁰ Pedro heishu: Ndykyrypoti ryheve tijahea ndyrehekui!, shara ndypya kyrã rimbijetahe Tumpa kyrypotipy ovaha verã. ²¹ Nde mba'ẽiã ĩmẽiryrende kovape, shara ndypya symyĩã Tumpa hẽinonde. ²² Heja maĩnunga porãmba vekua, hareka jurureshu Ñandeja katura hejareii ndyhevi ko ndypya rimbijetarẽiĩva rãĩmi, ²³ shara ahesha nytynyhẽi mbai pyryreshatambava hareka mbai porãmba rijapo vekua nymbypereso'i. ²⁴ 24 Hãrã Simon hei: Pirure katu shyrehe Ñandejape, mãhẽi jehushekui kova mbai perepẽiĩsheva. ²⁵ 25 Haivi poima ñimiñẽiẽi hareka mbeu Tumpa ĩñẽiẽirã, apostolre mbe'uĩ raha reta ñẽiẽi jahajepeva ryheva opaite tenta Samariape, haivi jyverujy Jerusalenpe. ²⁶ Kova mbai hasamarã, pẽinte Ñandeja jokueva heishu Ẽelipe: Pũ'ã hareka ekua rovai kyty, tape ohova Jerusalenpe Gaza kyty. Kova hai tape hasava yvy ikoambaipi. ²⁷ Ẽelipe pũãrã oho; haivi pehupi ijesha hãndi pẽinte kuimbai Etiopiava. Eunuco, mburuvisha vateve'õ hareka kyrypoti ñyngareko'ihea mburuvisha kuña Etiopiape'õ, hareka oho vekua Jerusalenpe omombai verã Tumpa. ²⁸ Kova kuimbai oujy'i jy'yvy kytyrã vapy ou jykaretape, mbijeta raha kuatia Tumpa ĩñẽiẽi mbeu'ia Isaia mbypara vekua. ²⁹ Espiritu Santo heishu Ẽelipe: ekua hokava kuareta hyvache hareka ñymbojahe. ³⁰ Ẽelipe ñymbojarã, hẽindu pẽinte mbijeta ẽivã kuatia ñĩmĩmi ñẽiẽi Isaias mbypara vekua, hãrã pyrãndushu: Rikuaara rĩmbijetarẽiĩva? ³¹ Kuimbai heishu: Mãrãrapo aikuaa mba'ety mbeu kavisheva? Hãrã jurureshu Ẽelipe jupirã vapy hãndi verã. ³² Mbyparahava mbijeta'ẽivã hai kova: Avisharay rãĩmimba rahaha jukaha verã; hareka ko avisha ray rãĩmi jasakava opaite piro ñonovare hẽinonde, haipemba mbai heiva. ³³ Oñemomishĩvape mbai japohahe hareka japohãshu teko jyvacheva; hareka ñymoña hãndiare, mbavarapo papakui? Shara hykove hekyha ko yvyivi. ³⁴ Ko mburuvisha heishu (eunuco) Ẽelipe: Mbeu kavĩtevesheno, mbavarera hei'ẽi ko Tumpa ĩñẽiẽi mbeu'ia, ha'ei ijeheĩra mãĩrã yngavarera? ³⁵ Hãrã Ẽelipe õñepyrõ mbeu kavishu ko mbyparahavape'õ mbijetavaivi, hareka mbeushu Ñẽiẽi kaviva Hesu ryheva. ³⁶ Hãma hasama jyraha yyvasu ẽivãperã, ko karai eunuco hei: Kope ẽiẽi yy, katuãra ã'ẽivãĩ shymyngarai? ³⁷ Ẽelipe heishu: Añete ndypyaivive ryrojarã, katupo rijapo. Haipe Eunuco heishu: Aroja rãnga Hesu haiva Tumpa tay. ³⁸ Hãrã heima mbypyta verã kareta; haipe mokue'õre vejy yyperã Ẽelipe myngaraishu. ³⁹ Haivi yy õĩjymashi retarã, sapy'aĩ Espiritu Tumpaivi ouva, ou rahashu Ẽelipe, hãrã karai eunuco hesha veamashu; tẽivã vy'a ryheve ohojy pehupi. ⁴⁰ Tẽivã Ẽelipe heshahajy tenta Azotope, hareka opaite tenta retaipi mbeu raha Ñẽiẽi kaviva, vãhẽi peve Cesareape.