¹ Ĩmẽimba'ẽi tenta Cesareape pẽinte kuimbai Kornelio he'iashua, 100 ẽivã syndarore miñaka'ishua, kuaahava jyve Syndarore jatyse'õ "Italiava" he'iashuape. ² Kornelio hareka hĩjapore hãndi haihuva hareka kyje Tumpaivi. Heta Judiore paveteva mbory hareka ñymboiñy'iva Ñanderupe. ³ Pẽinte ara, ka'arumarã mbahapy oravape hesape ouva, hesha kavi pẽinte Tumpa jokueva ou hai ẽivãperã heishu: Kornelio! ⁴ Kornelio haipe mãĩ'ẽihe Tumpa jokuevarã kyje ryheve pyrãndushu: ¿Mbaivara ripota, Sheja? Tumpa jokueva heishu: ''Tumpa hẽindu rirureshuva hareka vy'aite'i rijapovare, pavetevare rymboryshurã. ⁵ Mondo ã'ẽivãĩ mõkue kuimbai tenta Jopepe, ereshu haipe tyhekakui Simon, mbyheavajy Pedro, ⁶ Simon mymba pire mba'apo'ihea hẽintape pyta'iva, yyvasu hymbeype''. ⁷ Tumpa jokueva ohojymarã, Kornelio hẽino mokue jokuereva hãndi syndaro jyrojaheva hareka haihuva Tumpa. ⁸ Hokavare mondoshu reta Jopepe, jehuva opama mbeushurã. ⁹ Pareejyrã, syndaro hareka jokuehareare ñymboja reta tenta Jopepe, haipe Pedro oo vate'õpe jupi ñymboi verã kuarasy mbytepema'ẽirã. ¹⁰ Haivi Pedro ñymbahymarã pota karu, tẽivã hou verã mẽihẽivãhãteri ẽishuape, Pedro hesape ouva hesha. ¹¹ Hesha vate arare jypearã hareka vejy ouva yvyre tarapo tivisha ovava, urũndy kavi japy jokuahava. ¹² Hokava tarapo tivishavapy ẽiẽi mymbare ipy ũrũndyva, yvyre poñyva hareka vyrare. ¹³ Pedro hẽindu pẽinte ñẽiẽi heiva: ''Pũ'ã Pedro, juka he'u!'' ¹⁴ Pedro hei: Mba'ety, Sheja! Mapeãpo hau so kyashuva Tumpa, hareka porãmbashuva. Shara kuatia mbyparahavape ñonohã ore kyrãva mymba hoo ho'ua verã. ¹⁵ Haipe ijeta'ẽishua heijyshu: Pedro, kova mymbare She opama ajohe, avy ereshu ''kyava''. ¹⁶ Kova mbahapy kavi jehu. Haivi hupihajy tarapo tivishava vate arapy. ¹⁷ Pedro pya mbijeta'ihe hokava, mbaivara he'iseshu hesape ouva. Haipe Kornelio mondovare pyrãndu jyrahahe Simon hoo, ¹⁸ hareka pyrãndu reta: ¿Kopera pyta’i Simon mbyheavajy Pedro? ¹⁹ Hãma Pedro ĩmẽiĩteri pya mbijeta'ẽi hesape ouvarã, Espiritu Santo heishu: ''Mãĩhe, mbahapy kuareta ndyreka ñynoĩ. ²⁰ Vejy hareka avy rejepy'apy ryheve ekua hãndi reta, shara She ãmondovare. ²¹ Hãrã Pedro vejyrã, heishu kuimbai jokuehavare: She hai pyhekapiva. Mbaiverãra shyrekapi? ²² Haire hei: Senturion Kornelio rãnga ẽirẽimbouje, pẽinte kuimbai heko kaviva, Tumpa omoimbaishuva hareka opavare ijeta kavihe Judiore mbytepe. Pẽinte Tumpa jokueva heishu ouha ma'ẽiã ndyrehe, reho verã hẽintape nde rereshuva hẽindu verã. ²³ Hãrã Pedro heishu iche verãre, haipe pẽinte pyntu pyta reta. Pareejyrã, oho hãndi reta hareka mĩ'ĩrũ jyve reta Jopepe'õre jyrojavare. ²⁴ Hãma ĩrũ arajyape iche reta Cesareape, haipe Kornelio hãrõ ñynoĩ hẽintarãre hareka ñi'ĩrũre ñẽiẽi rahakashuvare. ²⁵ Pedro iche oo iperã, Kornelio õhẽi mẽivãhẽishu hareka ĩñesu hẽinonderã, omombaishu. ²⁶ Tẽivã Pedro mupũãrã heishu: Pu'ã, she ha'eĩ jyve kuareta nde rãĩmiva. ²⁷ Ijeta teri'ẽi hãndiva, Pedro iche oo iperã hesha heta kuaretare ñymbaty ñynoĩ haipe. ²⁸ Pedro heishu: Pee pikua Judio jykuatiape ẽiẽi potamba ichehava hẽintape hareka jihia karai mbyryvare, tẽivã Tumpa shymbyheshaka potambaa ahenova mbavape kyashuva Tumpa. ²⁹ Hãrã shyrẽinõhakarã, mãĩnunga shijokoã ai verã kope. Aipota aikuaa mbaivẽirãra shyrẽinoka? ³⁰ Kornelio hei: Japoma 4 ara, kuijavepe'ãmo mbahape oravape, sheii shyrẽitape mbaimba hau ãĩva ka'arurã, mondii pẽinte kuimbai mondeva opaĩ himbipeva ijeshakashe. ³¹ Hãrã heishe: ''Kornelio, Tumpa hẽinduma rirureshuva hareka opama hesha rijapova, pavetevare rymboryshurã. ³² Mondo ã'ẽi kuimbaire tenta Jopepe, ereshu haipe tyhekakui Simonpe, mbyheavajy Pedro, Simon hẽintape pyta'iva, mymba pirere mba'apo ia yyvasu hymbeype''. ³³ Haivi ãrẽi'ãĩte amondo ndyreka verã hareka ndypya kavimbaje, rei verã. Ã'ẽi opaite ĩmẽihã'ẽi Tumpa hẽinonde, hẽinduha verã opaite Ñandeja ñonondeva rẽimbeu ore verã. ³⁴ Hãrã Pedro õñepyrõ ijetashu reta: Ã'ẽi aikuaa, añeteñoĩmba Tumpa pevarã pẽinteva rãĩmi ñanderã, ³⁵ hareka Tumpa opa pavẽiĩ haihu, opaite tenta, kyjeshiva retape hareka mbai haikaviva yngavare japova. ³⁶ Tumpa mondokashu ĩñẽiẽi Israelvare ñymoña hãndiare, mbeu verã Ñẽiẽi kaviva pyrymbypya kaviva Hesukristo rupii, hai opavare Ija. ³⁷ Pee pikuaa mbaivara jehu opaite Judeape, õñepyrõ Galileaivi, Juan õñepyrõvive ñimiñẽiẽirã hareka pyrymyngarairã, ³⁸ Tumpa ñonohe Hesu Nazareno Espiritu Santo hareka ñymbaikatukuepy, heta Ãña ichepy vekuare opa kuera, shara Tumpa ẽiẽi hãndirã. ³⁹ Ñande jahesha opa mbai Hesu japova Judeape hareka Jerusalenpe, haivi raha kurusure mbysavava reta juka verã. ⁴⁰ Tẽivã Tumpa mbahapy arajyape mupuãjyshu, hareka hykuaĩ ñonojy ñande jahesha verã. ⁴¹ Ha'ẽiã opaitevape ijeshakajyva, koñeĩ ore Tumpa ẽirẽipẽihẽirõva, mbeu verã Hesu hykovejyva. Shara karuha hareka ñymby'uha hãndi kuerajymarã, ⁴² hareka hei ñande opa rupi ñambeu verã Tumpa iñẽiẽi, hareka ñambeu verã Tumpa heshaverã mbai kavi hareka mbai porãmbava kuaretare japova, hykoveteri'iare hareka manovare. ⁴³ Opaite Tumpa ĩñẽiẽi mbeu'iare ijetahe Hesu hareka hei reta jyrojaheva hai heepe mbai porãmba japo vekua hejareiiposhi reta. ⁴⁴ Haipe Pedro ijetateri'ẽi vẽikua, mondii vejyhe reta Espiritu Santo opaite Pedro mbeuva hẽindu'ẽivãre. ⁴⁵ Hãma Judiovare Jopeivi Pedro ou hãndi vekuare mbypy'ãã heshama Espiritu Santo vejymahe haimba Judiova retarerã ⁴⁶ Shara hẽindu reta yngaiva ñẽiẽipy ijetarã hareka pyraheshu Tumpa. ⁴⁷ Hãrã Pedro hei: ¿Katurapo mbava jocha ñymyngarai verã opaite ko kuaretare Espiritu Santo vejyheva, ore rãĩmi? ⁴⁸ Kova opa heirã, Pedro hei myngaraishu verã Hesukristo heepe. Haivi jurureshu reta Pedro mbovy ara pytavee verã haipe.