¹ Apostol reta hareka opaite pẽinte'ohova Hesu jyrojahea Judeape'õre, hẽindu mãrãra haimba Judiore myvãhẽi jyve Tumpa ĩñẽiẽi. ² Hãrã Pedro oujyma tenta Jerusalenperã, ĩmẽi'ẽi Hesu jyrojahea Israelitavare oñepyrõ ijeta pohy ijupe hãndi reta. ³ Hãrã pyrãndu jyreshu: ¿Mãrã’ĩrãra reho rypohyshu haimba Judiovare hareka rykaruri hãndi reta? ⁴ Hãma Pedro opa mbeushu oñepyrõaivive opava mbai ikovekua. ⁵ Tenta Jope he'iashuape Tumpa airure ãĩshuape shyresape ou: Ahesha pẽinte tarapo tivishava rãĩmivã, jokuahava ũrũndy japy retaivi, vejy vate araivi she ãĩvape. ⁶ Ãmaĩ kavi ahesha verã mbaivara hapype ẽiẽi, haipe ahesha mymbare ipy ũrũndyvare, ñarõva, hyereĩ vatavare hareka vyrare. ⁷ Haivi ãhẽindu pẽinte ijetashea hei: Pedro, pũã ''juka hareka he'u''. ⁸ Hãrã haishu: Mba'ety Sheja, pẽinteã rãnga maĩnunga kyava shi jurupe ãmĩnje. ⁹ Haivi vate araivi ijetava heijyshe: '' Tumpa opa johevare, avy nde ereshu kyava''. ¹⁰ Mbahapy kavi kyrã hoka jehu, haivi opa hupiajy vate arape. ¹¹ Haivi mbahapy kuimbai mbouha vekua Cesareaivi shyreka verã, vãhẽi jyveru aiko'iavape. ¹² Hãrã Espiritu Santo heishe aha hãndi verãre kyjembape, hãrã oho jyve shendie 6 ñandyryvy Hesu jyrojaheare, opaiteva icheha pẽinte kuimbai hoo ipe. ¹³ Hai mbeu ore mãrãra hoo'ipe hesha Ñanderu Tumpa jokueva, ñymbou hyvacherã hei: ''Mondo rijokuevare tenta Jope he'iashuape hareka veru ndeverã pẽinte kuimbai Simon he'iashua, mbyheavajy Pedro ¹⁴ hai heipo ndekui marãra katu rehojepe ndee hareka nẽisãjayre hãndi''. ¹⁵ Añepyrũmã aijetarã Espiritu Santo vejy'ĩãrẽi reta, jypyite vejy ñaneãreva rãĩmi. ¹⁶ Haipe shymanduahe Ñandeja heirã vẽikua: ''Añeteara Juan yype pyrẽimyngaraitẽi, tẽivã pee pynymyngaraihapokui Espiritu Santope''. ¹⁷ Tẽiva Tumpa mẽiẽi jyveshu reta ñande mẽi'ẽiha ñandevekua rãĩmiva Ñandeja Hesukristo jairojamãherã, mbavaraposhe ãñemoihe verã Tumpa? ¹⁸ Hẽinduma reta kovarã, opa chĩrĩrĩ hãrã õmombai reta Ñanderu Tumpa hei: Haimba Judiova reta'ẽiẽiĩmba jyveshu oujyverã Tumpape hejahareishi verãre mbai porãmba japo vekua, hipity verã tykove opambava! ¹⁹ Haivi Esteban jukahamarã õñepyrõ pũãhe reta Hesu jyrojaheare, hãrã ã'ãmore ñyvãhe Ẽenicia kyty, Chipre hareka Antiokiape, mbavamba ijetajyheshuare ñee kaviva koñeĩ Judiovaretapẽii. ²⁰ Tẽivã ĩmẽi'ẽi a'ãmo hai retava ouva Chipreivi hareka Sireneivi, vãhẽima jyraha Antiokiaperã õñepyrõ ĩjetaheshu reta haimba Judiova retape, ñẽiẽi kavi Ñandeja Hesu ryheva. ²¹ Ñandeja ñymbaikatukue ẽiẽi hãndi retarã, hetamba'ẽi rojavare hãrã hejava heko arykaiva rojava, haivi jyrojajyva Ñandeja. ²² Tupao Jerusalenpe'õre kuaama kyrã mbe'uharã, mondo reta Bernabe tenta Antiokiape. ²³ Bernabe vãhẽi oho Antioquiaperã hesha marãra Tumpa mãĩkavihe retarã vya'i, hãrã opaiteva mykyrẽiy verã heishu reta jyroja katu ñynoĩhe verãre Ñandeja. ²⁴ Bernabe haimba pẽinte kuimbai heko kaviva, tynyhẽivã Espiritu Santo hareka jyrojakue. Hãmemba heta'ẽi kuareta jyrojahea Ñandeja. ²⁵ Haivi Bernabe oho Tarsope veru verã Saulo, heshamarã raha tenta Antiokiape. ²⁶ Haipe pyta hareka ñymbaty hãndi reta tupaope'õre pẽinte ara pukukue kavi, hetava kuareta mboishu reta. Hareka ohojy tenta Antiokiape haipemba tynõndeite oñepyrõ mbo'eareare mbyheheharã he'iashu reta ''Kristo jyrojahea''. ²⁷ Hokava arape ã'ãmo Tumpa ĩñẽiẽi mbeu'iare oho Jerusalenvi tenta Antiokia kyty. ²⁸ Haipe haire mbytepe pẽinte ñymbou Agapo he'iashua, Espiritu Santo rupii mbeu, ou verã ñymbahy vasu opaite yvy ikoava retaipi, hokava iko Claudio huvisha vasurã'ẽi Romaperã. ²⁹ Hãrã opaite Hesu jyrojaheare mambaty verã pepẽinteĩ ĩmẽireamire, mbory verã Judeaipi iko'iare. ³⁰ Kyrã japo retarã, Bernabe hareka Saulo rupii rahaka reta Tumpape mẽi'ẽiãva, kuakuavare Judeape'õre pevarã.