¹ Netamen ma'a actacja lhta, asuet'o lhta njan mocjom atong acmaijecja aquieto m'a neten, lhta ntac jeiano mocjom nema aliatecama lhta, aquiennactema ngque lhta apaioma, malha lhta ntac trompeta nac acpaiwoma: —Elheng jalep, enianamet, atasquesec jata lhamacjo caselha acmac'acja ta ngcotnec—lhta ntac jeiano nema aliatecama. ² Mpelapcasque lhta acuo'o aclanei'o nquec acmowana Engiapom Neten Apualhoc, asuet'a lhta nema actanema aquieto m'a neten, apne lhta lhema enenlhet, ³ apquelienmawe lhta enenlhet malha lhta acto nac diamante, necja au'ac nema actanema nac apietne lhta malha pemjet la'a, apcaponmatawe lhta malha esmeralda, ⁴ apietne lhta njan napocjau'ac 24 nema altanema, apcanjanquec lhta njan 24 metno apquetcoc ma'a, apquenmopai'a lhta apquelentalhnema, nnangque lhta njan apnactetema apqatco'oc oro alanemmalhca. ⁵ Nema actanema nac apuesque apancoc, ntepque lhta apquelienmoma, apquelhtengioma cacpota njan nema alpacmeiasma, 7 nema alaponmatquescama talha lhta njan nquelentepac ma'a anmelhacja nema actanema nac, alietquesammalhca coca 7 Engiapom Neten apqueltoncoma. ⁶ Nietnengque lhta njan malha aluata, alhnai'o nquec iemmen malha ieiam appoc la'a nengwetai'o conne. Aisecsec anque lhta ncacjangcoc 4 malha caselha neujac, nsaujomawe lhta aiempec aqto'oc ⁷ Lhema lhta malha meiwa', mo'oc malha buey, mo'oc alhta njan malha enenlhet, mo'oc na malha mama' apquenpaicama la'a. ⁸ Moclhem'a lhta nietnac 7 alhempanco'oc, nquetsaujecjawe lhta njan aqto'oc aiempeioc, ngquennecmasengque lhta njan lhamacjo acnem, pesalhep najan, lhta ntaiangcoc: —Apeiwomo panque' apuesque engancoc, Engiapom Neten acnema apmopuana apanque', metca nnelha apcaniemjaicama— lhta ntangcoc annecmasecamoc ma'a. ^{9 10} Lhamacjo lhta mota annecmasenco la m'a, altacnescasenco la njan, ntangque lhta njan gracias apto apnema aptanema, apto njan mangcotnengwaim annelha apcaniejaicama, cacpota njan 24 metno apquetco'oc apquelhanque lhta apnactetema apqatco'oc napaqtec ma'a, apquelelteclhenco lhta njan aptapno'oc ma'a, lhta aptancoc: ¹¹ —Ietawec anquec lheiap apuesque angeltacnescasancoc apuesai'a lheiap, ncolhec na ac'o, ncoliemacsec na apualho'oc enenlhet'awoc acnema apmopuana lheiap, ncanec lheiap apquelentepquescama lhamacjo caselha lhma nquec jam nenwetai'o nac colhuawe nac, ncanec apmajai'acja lhta etnec lheiap ma'a—lhna aptaiancoc metno apquetcoc ma'a.