Capítulo 3
Ania'a apasammalhca apcacnecjelha Jesucristo apquennemolhema aquieto Sardis
1
Etalhes no mocjom ania'a cacpota eniapasquesec enenlhet neten apno m'a Sardis, apcacnecjelha nac Jesucristo apquennemolhema, ca ntac jengque'e: Co'o asto nac aquietnema 7 apqueltoncoma aniem'o Engiapom Neten cacpota njan 7 iau'a. Asiawe co'o lhamacjo actemacja apquelanai'a lheiap, aplhenammacpo apiesecsec enenlhet apto apiamolhma lheiap apcaniemjaicama, coca malha apquetsepma lheiap.
2
Coca mangcolatsema ngquec aptemacja lheiap napaqtec Engiapom Neten ¡Elhatecja secja coca mocjom apualhoc, etacmelcasejo aptemacja amanie, apmajai'a ngcowac aquiawecamoc meijamolma lheiap!
3
¡Elanecja njan apualhoc, colheianwacjo no apualhoc nema atlhecmoscama alhta aplhewai'a lheiap, eliejecjo ta mocjom! Coca melano ta jeng, cotlapquesec jata awatac jam malha acto nac enenlhet la apmenielhma.
4
Asiawec na apiesecsec anac quetlhengcap apcacjanquec enenlhet mellanecamoc caselha ngcolatsecama, malha njan melpaisengquescama la apquelentalhnema, coca enenlhet'awoc anac ngquelietemawec anquec jetnangco ta apquetlhelhma'ac ma'a, apquenmopai'a apanquec jata njan apquelentalhnema m'a.
5
Apquellelto ta apqueliepjonweiacmo etlhewancoc jata apquelentalhnema apquenmopia'a apanque, monmasquesecjec jata njan apqueluesai'a waccajac aquiennactema ennengiec ancoc, netamen alaqlacjac jata njan asqueliecpelquemelha la enenlhet napaqtec Engiapom Neten ma'a cacpota njan
enenlhet neten.
6
Eltacmelcasamo ta aptacja aplheianma lhquec Engiapom Neten Apualhoc aplhamacjo apanquec Jesucristo apquennemolhema jam.
Ania'a apasammalhca apcacnecjelha Jesucristo apquennemolhema aquieto Filadelfia
7
Etalhes no mocjom ania'a cacpota eniapasquesec enenlhet neten apno m'a Filadelfia, apcacnecjelha nac Jesucristo apquennemolhema, ca ntac jengque'e: Co'o asto nema jepoccanma aniem'o Engiapom Neten, asto njan jawe ngiapac anquec, nietnec co'o llave apancoc apuesque David annenga, asmac'o la amaiacsec atong, mamma enenlhet apmopuana la engiapecjac ma'a, asmac'o la njan anwapecjac atong anac, mamma njan enenlhet apmopuana la emaiesecjac ma'a.
8
Asiawe co'o lhamacjo aptemacja apquelanai'a lheiap, asiawec na jeliejecjo lheiap niecje quetsec meiennactema, asiawec na metca apmancactema elhenec asuesai'a co'o, ca ncanec amiesquesec jata atong aquiawai'a cacpota ngcotacmaluomoc apcaniemjaicama lheiap ma'a, mamma ta enenlhet apmopuana la engiapecjac atong anac ma'a.
9
Coca apcacjanquec ma'a moclhema'a apquetlhenammacpo apancawec apquellelto judios, coca jawe m'a, apquellelto coca apquelieplecama satanas, alelteclheccasquesancoc jata ejenquec co'o aptapno'oc ma'a napaqtec lheaip ncanec ascamelaiam lheiap, lhamacjo enenlhet jata eluetac ma'a.
10
Lheiap coca jeliajacjawec, manjeiasqueiam na metca nnelha, ca ncanec atacmelquesec jata acuo'o la aquientalhnema tacjalhet lhmangquec jam.
11
Elhenquec jata mangjeiasqueiam co'o cacpota monnactengquescacjec metca aquianmoma lhta aplhewai'a lheiap. ¡Eniacjo ta lheiap, awatac jata colhuawec jam!
12
Apquellelto ta apqueliepjonweiacmo, altemesquese ta malha poste apquelliennactema nema alanquesama nac ma'a Engiapom Neten apnemacja, elloca ta mota metcca nnelha m'a, atalhacsec jata m'a apuesai'a Engiapom Neten ejencoc, acuesai'a njan natemma apjalhnancoc Jerusalen, apcawacja Engiapom Neten apietno m'a neten, atalhacsec jata njan alhnancoc asuesai'a m'a.
13
Eltacmelcasamo ta aptacja aplheianma lhquec Engiapom Neten Apualhoc aplhamacjo apanquec Jesucristo apquennemolhema jam.
Ania'a apasammalhca apcacnecjelha Jesucristo apquennemolhema aquieto Loadicea
14
Etalhes no mocjom ania'a cacpota eniapasquesec enenlhet neten apno m'a Loadicea, apcacnecjelha nac Jesucristo apquennemolhema, ca ntac jengque'e: Co'o asto nac amen ncanec mamma asmopuana ania'a, asquetlhecmosquec mota njan aptemacja Engiapom Neten, ca njan apto jemaicama cacpota alentepquesec lhamacjo caselhaja.
15
Asiawe co'o lhamacjo aptemacja apquelanai'a lheiap, asiawec na aselhtec jeliejecjo lheiap.
16
!Eiawencaso aquiocjo nquec coca etne'! Coca metno ta lheiap jeng, atacnonwacjac jata.
17
Nlhengque mota apualhoc lheiap aquietnema lhamacjo caselha altacmanma, apcanec lheiap mangcaimelhcac caselha apanco'oc, coca malha metca apquetsecama la lheiap napaqtec Engiapom Neten, meniasecjac na m'a, malha apcalhnai'o njan napaqtec ma'a, metca apaqto'oc najan.
18
Ascanquec co'o lhema aspaioma !Elheng jengque'e, asnacja nac! Anwancoc jata caselha neten ancawec altacmanma cacpota ngcotacmelquesquesec apcaniemjaicama lheiap, anwancoc jata apquelentalhnecja apquenmopei'o apanquec cacpota memangcama lheiap aniem'o apcalhnai'o, anwancoc jata njan ponja cacpota ngcoltacmelcasecjac apaqto'oc, etecjac na lhma.
19
Asnawesquec lheiap, asqueliasquec na lhma ncanec ascamelaiam lheiap. ¡Elanecja apualhoc, elienlhanmo aquiawai'a nquec apqueliejecjo Engiapom Neten mocjom!
20
Asuenema co aquieto atong apnemacja lheiap, apleng'o la'a, emaiacsec quelhaja, aclhec jata m'a antawocjac jata lhemec ma'a.
21
Apquellelto ta apqueliepjonweiacmo allancoc jata apqueltanema m'a aquieto asnacja, altemescasancoc jata malha apqueluescaie m'a, co lhta njan asto asiepjonweiacmo, asnec napocja aptanema Tata, jetnescasquec na apuesque aspasmecja m'a.
22
Eltacmelcasamo ta aptacja aplheianma lhquec Engiapom Neten Apualhoc aplhamacjo apanquec Jesucristo apquennemolhema jam.