Capítulo 15
7 Enenlhet Neten apquelletsoiam 7 aquientalhnema ngcoie'
1
Asuet'a lhta lhema caselha mongwetai'o neten, 7 enenlhet alhta apquelletsoiam 7 aquientalhnema ngcoie actacja nnelha, netamen jata m'a ngcowanmecjac jata Engiapom Neten aploma.
2
Asuet'a lhta njan malha aluata alhnai'o nquec iemmen malha ieiam appoc la'a nengwetai'o conne, nema ancaiecja lhtoca talha. Apcacjanque lhta m'a necja aluata nac iemmen apquellelto lhta apqueltemesquesecja coneng caselha newjac alhta acloma, mellaiangco lhta njan allelqascama m'a marca ancoc, meltacnescasecamoc alhta njan aquiocja alanemmalhca nema aquietquescamo m'a
caselha newjac anac.
Engiapom Neten alhta njan apquellancoc arpa m'a,
3
ca apquennecmasenco lhta njan apquennecmascamo lhta Moises actemacja aplhenammap apuesai'a Nepquesec Apquetcoc, lhta ntac nennecmascama:
—Lheiap apuesque Engiapom Neten, apto acnema apmopuana apanque lheiap, aquiawai'a njan caselha mongwetai'o nquec apquelanai'a, lheiap apuesque lhmangquec jam, apquelana mota caselha acpeiwomo cacpota njan acto aquietemo ngcoie'.
4
Apuesque, lhamacjo enenlhet'awoc apquellac'o lheiap, apqueltacnescasenquec na apuesai'a, ca ncanec apto wanlha apanquec apiamolhma lheiap, lhamacjo apquellawacja lhmangquec jam elelhiemoc jata apnacja lheiap cacpota eltacnescasancoc apuesai'a, ca ncanec lheiap apquelliawec enenlhet apto apeiwomo—lhta aptancoc apquennecmasenco m'a
5
Asuet'a lhta njan acmaijacjo na temma apocquenammap aquiet'o m'a neten, la tienda de la alianza.
6
Apquelentepque lhta 7 Enenlhet Neten lhec ma'a apquelletsecama 7 caselha ngcollatsecama ngcoie cacpota ngcollwac tacjalhet lhepop, apquelentalhnema lhtoca nema altema lino, apquenmennawe apanquec, apquelalhnaiojo, apquellaponmatque lhta njan ma'a, cacpota njan apqueliapnama aquieto apnengio'oc, alienmomo ncoie oro.
7
Netamen actetesco lhema caselha newjac allanconwo'o moclhema nojaicoc oro alienmomo, allaneianco lhtoca aploma Engiapom Neten apto mangcotnengwaiam annelha apcaniemjaicama.
8
Nlan'awec anque lhta njan eten na temma apoquenammap aniem'o apnec Engiapom Neten ma'a aquieplomo aquiawai'a apmopuana, ma lhtoca elentalhnac secje enenlhet aquieto natemma nac ma'a apocquenammap, acuacmo ta 7 Enenlhet Neten apsaujommap apquelianquenaicamoc tacjalhet lhepop 7 caselha ngcollatsecama ngcoie'.