Capítulo 14
Nepquesec Apquetcoc cacpota njan apquelliequiesammap
1
Netamen asuet'o lhta Nepquesec Apquetcoc apuenmanca tacjalhet lhienep acjaiam Sion, apquetlhelhma'ac alhtoca 144.000 enenlhet'awoc moclhem'a alhta nnangcoc alqasemmalhca alpaijacja napaqta'ac apuesai'a Nepquesec Apquetcoc cacpota njan Apiapom.
2
Asleng'o lhta njan aleclhanwoma aiempec aniem'o neten malha la acsetcanmacja la iemmen, malha lhta njan apquelelhtengioma aquiawai'a ngquec ma'a, malha lhta njan arpa la apentalhnema apquelpaiwascama enenlhet.
3
Apquennecmasenque lhta njan alhnancoc nennecmascama naptec nema actanema, naptec na cuatro caselha newjac cacpota njan napaqtawec metno apquetco'oc. Mamma lhta enenlhet engiapuanac nennecmascama nac ma'a, wanlha lhtoca apquellapuanco 144.000 lhec enenlhet'awoc apquellelto nema aluonquescama tep apiesecsec enenlhet tacjalhet lhepop.
4
Coca apquellelto apqueliamolhma apanquec, mellanei'o ngquelwana
, wanlha mota apquelieplecama Nepquesec Apquetcoc apmancolha la'a. Apquellelto lhta njan nema aluonquescama tep apiesecsec enenlhet'awoc cacpota njan apquenmesenmacpo apancawec Engiapom Neten cacpota njan Nepquesec Apquetcoc, malha ctonac ofrenda.
5
Metca njan aptaicamoc apquenmopuanca ania'a, apquelpeiwomo apancawec
najan.
Enenlhet apqueniemai'o neten aptaiecjo enenlhet apanque cacpota njan 6 Enenlhet Neten.
6
Asuet'o lhta mocjom apquempanca neten enenlhet neten apsecama lhtoca apmec waccajac ania'a actacmanma cacpota epaiacsec ania'a tacjalhet lhepop lhmangquec jam, lhamacjo actemacja apiempeioc cacpota njan lhamacjo aptemacja apquelpaqmeiasma.
7
Lhta ptac apiennacteso apaioma:
—Ellajo' Engiapom Neten, eltacnescasamo ta njan, ngwa'ac acnem cacpota eliecpelcoc aplhamacjo enenlhet'awoc lhmangquec jam. Eltacnescasamoc apto apquelanai'a neten, nalhepop, aluata aquiau'acja cacpota njan iemmen actacmanma acteiapma nalhepop—lhta aptac enenlhet neten.
8
Ca apteiapuo'o lhta mocjom po'oc Enenlhet Neten, lhta aptac ma'a:
—Aptewasecpec apiau'acja temma Babilonia ncanec apquelleltennasenque mota etnancoc meliamolhma lhmangquec jam, cacpota njan elleliejecjo caselha aquiocja la alanemmalhca—lhta aptac Enenlhet Neten.
9
Ca apteiapuo'o lhta mocjom po'oc Enenlhet Neten, apcanet'olhema lhta apuacmoc ma'a, lhta aptac apiennacteso apaioma:
—Aptacnescasenco la moclhem'a enenlhet caselha newjac alhta acloma, cacpota njan aquiocja alanemmalhca nema aquietquescamo m'a, apcaianco la njan alqascama marca ancoc paijacja napa'at nlho ca la njan apmec,
10
eluoc jata aquiawai'a nquec Engiapom Neten, eiaqmoncasecjac jata neten anquec acmasca, aquieplomo talha cacpota njan talha aimenec aleiwoma napaqtawec Enenlhet Neten cacpota njan Nepquesec Apquetcoc.
11
Mangcotnengwomec jata nnelha anmecja neten talha eten ancoc, mangcotnengwomec jata njan nnelha apquellengaianco m'a, lhamacjo acnem, pelhasep najan apquellelto nema alcasecamoc marca ancoc caselha newjac acloma—lhta aptac Enenlhet Neten.
12
Ngcaimelhquec ngcoitec alliennactema meliasqueiam necsa apquellengaianco aquientalhnema Jesucristo apquennemolhema, ngcaimelhquec na elleliejecjoc jenganemacja apancoc Engiapom Neten cacpota njan etlhenquesec aptaicamoc meliasqueiam Jesus.
13
Netamen asleng'o lhta mocjom nema aliatecama neten, lha ntac jeiano:
—Etalhes jengque'e, ellengiojoc jata apquellelto la apqueletsepma apquelpasmecja apuesque engancoc—lhta ntac nema aliatecama.
Lhta ntac na Engiapom Neten Apualhoc:
—Jai', jawe ngiapac anquec, eliamposacpoc jata aniem'o apquellengaianco lhta aquientalhnema ncanec apquellanai'a lhta caselha altacmelo—lhta ntac ma'a.
14
Asuet'a alhta njan lhema iepjopai'a acmopai'a, nne lhta acno neten ma'a lhema enenlhet, malha enenlhet alhta apqueniemai'o neten aptaiecjo lhta enenlhet apanque', nietne lhta aptetema apqatec oro alienmoma, apmaicama lhtoca apmec pelletaw acjalhema acmajante ncoie'.
15
Aptepque lhta m'a conne Engiapom Neten apnemacja lhema Enenlhet Neten, apiennactesque lhta apaioma apto apnema neten iepjopaia, lhta aptac:
—Eliaqtemen, enaielh aquielhna nac jam tacjalhet lhepop, ataiantajac, ngwacmec acnem nennaclhemacja aquielhna—lhta aptac ma'a
16
Ca apqueliaqtemeno lhta aquielhna tacjalhet lhepop aquieplomo pelletaw acjalhema apto lhta apnema neten iepjopai'a.
17
Netamen aptepo mocjom po'oc Enenlhet Neten conne Engiapom Neten apnemacja, apcanet alhta apuacmoc ma'a, apsopme lhta njan pelletaw acjalhema acnema ajantec.
18
Netamen po'oc Enenlhet Neten aptepque lhta m'a aquieto aluanlhenmalhquelha caselha, nietnec lhta apmopuana etepquesec talha, apcawenca lhta njan apiennacteso apaioma apto lhta apmaicama pelletaw acjalhema enenlhet neten, lhta aptac apcano:
—¡Eliaqtemen uva aquielhna jam, pelletaw acjalhema nac nema ajantec ancoie', ataiantajac jam!—lhta aptac enenlhet neten.
19
Ca apqueliaqtemeno lhta uva aquielhna aquieplomo pelletaw acjalhema, ca apquelho lhta conne nemacja alietsemongamo aimenec uva, coca aquietquesammalhca m'a aploma Engiapom Neten.
20
Ca nema nac alietsemonquescama uva aquieto m'a mepiawa temma, ntepquec ema m'a, malha acuacmo 1metro y medio acmeiecja neten, acuacmo njan 300 kilometros aquietnema.