Capítulo 28
Engiapom Neten aptemescasecja mocjom apjalhnancoc apiesecsec apquenmasquenwaiacmo Jesus
1
Nieca alhta acnem sabado m'a, mopeiam conne acnem domingo lhta, anmeiecjo lhnac Maria Magdalena cacpota njan mo'oc Maria altenenwecjo aquieto apietnemacja apjapac Jesus conne metaimong alhua.
2
Mpelapquescanquec nac aquieujeianca lhepop aniem'o lhnac apuaiwenta Enenlhet Neten ma'a apcapascama Engiapom Neten, aptetesquectamo lhnac metaimong alhua, apleclemo lhnac nema apma metaimong aquiawai'a, apnenquec nac na tacjalhet ma'a.
3
Apquelienmomawec nac Enenlhet Neten ma'a malha apquelienmoma lhna aptemac, apmopai'a apanquec nac na aptalhnema malha acto nac ajapo' awa nac
4
Apquellai'ac nac soldados apquellanecama atong ma'a, nquelpelhcaicama lhnac apiempeioc, malha lhnac apqueletsepma aptaiancoc apqueluetai'o m'a.
5
Lhna ptemac Enenlhet Neten apquellanemo nqueluana'ac:
—Molienwa', asiawec co'o alquetamoc quetlhenca' Jesus, apquetsepo lhta neten iamet actennescama.
6
Mamma jenque'e, Engiapom Neten lhec aptemesquesacjac apjalhnancoc apiesecsec apquenmasquenwaiacmo, ca aptacja lhta apaioma ncotnec ma'a. ¡Colentelh, collanjo no apietnacja lhta apjapac!
7
Coltaqjo colhuawe nac coleltennascacja apqueltamesaicamoc Engiapom Neten aptemesquesacjec mocjom apjalhnancoc Jesus, ca apmeiacjac ma'a Galilea cacpota eluetanwacjac ma'a, ellanquesecjoc jata njan ma'a—lhna aptemac enenlhet neten.
8
Nquelienwaicama lhna nqueluana'ac ma'a, nquelpaijecjec nac na au'alho'oc, colhuawec nac nqueltaqjemoc aletquecjo, aleltennasquecjo ania'a apqueltamesaicamoc.
9
Necsa atlhengama lhnac amai, apteiapuei'o lhnac Jesus ma'a, ca apquelpaiwesaianco lhnac na m'a. Ca alelteclheianco lhnac atapno'oc lhepop, alpatjetmo anmanwacmo apmanco'oc ma'a. Awanjec nac na alpaijecjac au'alho'oc ma'a.
10
Lhna ptemac Jesus:
—Manjellaga, coletquecja coleltennascacja asqueltamesaicamoc enmeiacja ta Galilea, jata jeluetanwacjac ma'a—lhna aptemac
11
Ca anmeiecjo lhnac nqueluana'ac ma'a apcacjaianquelha apqueltamesaicamoc Jesus. Coca moclhem'a lhnoca soldados apquellelto apquellanecama Jesus apjapac aquieto m'a metaimong alhua, apqueluecjec nac apiau'acja natemma cacpota eleltennascacja apquelemjama apmania ie sacerdotes actacja apqueluetai'a m'a.
12
Coca sacerdotes cacpota njan apquelemjama apmania ie' apquellawacja, apquellaianquec nac nquescama patacom cacpota etnancoc apquenmopuanca ania'a, lhna ptaiancoc ma'a:
13
—Eleltennasama ta enenlhet'awoc apqueluacjec lhec apqueltamesaicamoc Jesus ma'a, pelhasep lhec, necsa nennacteianma apquelmenielhuacjec lhec apjapac Jesus, jata eltejec ellana quetlhencap enenlhet'awoc ma'a.
14
Jata aplenganwacjo ta gobernador apnacteianma quetlhencap, ennenco'o ta njan angelpasmoc angelpaqmetquesec cacpota mancolhec alpescacmo quetlhencap—lhna aptaiancoc ma'a
15
Apquenmaianquec nac tacja patacom soldado ma'a, ca apqueleltennaseianco lhnac enenlhet'awoc actacja apquetlheianma apquelemjama apmania ie sacerdotes. Ca jeng acmowana ania'a anac, ngieijac mocjom apiesecsec judios acuacmo nenwanlha nac.
Apquelapascama Jesus apqueltamesaicamoc elpaiacsec ania'a actacmanma lhma nquec jam
16
Ca apquenmeiacjo lhta 11 apqueltamesaicamoc Galilea m'a, aquieto metaimong acjaiam apqueleltennascamacja lhnac secjec Jesus ma'a.
17
Ca apqueluetanwacjo lhta ma'a, apqueltacnescasenco lhta njan, coca moclhem'a lhta apqueliasqueiacmoc ma'a.
18
Lhta ptac Jesus apquellano:
—Engiapom Neten jeianquec lhamacjo apmopuana cacpota atnec apuesque neten anac, cacpota njan nalhepop anac.
19
¡Enmamoc jata lhma nquec jam, eltesquesamoc jata jelieplecama enenlhet'awoc ma'a. Ellauquesamoc jata conne nemmen aquieplomo apuesai'a Apiapom, Apquetca, cacpota njan Engiapom Neten Apualhoc.
20
Etlhecmosamoc jata nengeliejecjo actemacja lhta mota asquetlhecmoscama co'o, alhec jata lhemec quetlhencap lhamacjo acnem acuacmo actacja nnelha lhma nquec jam— lhna aptemac Jesus apquellanemo apqueltamesaicamoc.