¹ Mmopeiacmec nac conne atsai'a m'a, apcacnecjo lhnac aplhamacjo apquelemjama apmania ie sacerdotes, cacpota njan po'oc apquelemjama apmania ie' cacpota etlhenec ellanecjac ellaqjec na Jesus. ² Ca apqueliantemecjo lhnac aquieplomo apquelpelhquetema apmeio'oc apnacja gobernador co Roma apuesai'a Pilato.

Apcaqjammacpo apanquec Judas

³ Aplengai'ac nac ania'a Judas apto lhta apselhnanoncoma Jesus cacpota ematong ma'a, aplengaianquec nac acmaiose apualhoc ma'a, ca apmeiecjo lhnac apcacjaianquelha apquelemjama apmania ie sacerdotes, cacpota njan po'oc apquelemjama apmania ie, ca apqueltacjescamo lhnac na 30 aliaquiema alienmoma plata aplhewai'a lhnac ma'a, lhna ptemac apquellanemo: ⁴ —Mancolatsema asquelanai'a co'o, aselhnanacquec enenlhet anac metca aptemonweiacmo lhma'— lhna aptemac Ca apquellatemmoianca lhnac apquellemjama apmaniaie m'a, lhna aptaiancoc: —¡Ncotnamanquec ma'a, apquelanai'a apanquec lheiap!— lhna aptaiancoc. ⁵ Ca apquelhecjo lhna apanquec Judas aliaquiema alienmomo plata m'a conne Engiapom Neten apnemacja, aptaqjecjo lhnac na m'a, ca aptetecjo lhnac apiaspoc tama', apcaqjammacpo lhnac na apanquec ma'a. ⁶ Apqueliacjecjec nac apquelemjama apmaniaie sacerdotes aliaquiema alienmoma plata m'a, lhna aptaiancoc: —Mancoietoc annencanwacjac aliaquiema alienmoma nac nennencanwecjelha Engiapom Neten nengaicamoc anac ncanec enenlhet aquianmoma cacpota ematong ma'a—lhna aptaiancoc. ⁷ Ca apquelleltemo lhnac aliaquiema alienmoma plata nac enmancoc lhema iocjalhma acuesai'a apquenmacmeiancolha apqueliaqjapescama nialpa, cacpota elcatonnacpoc ma'a apquelletsepma apquelleniem'o la mo'oc necja apquellawacja. ⁸ Apqueliaqmoncasecjec nac na acuesai'a iocjalhma nac, apqueltemescasecjec nac acuesai'a iocjalhma ema, acuacmo njan nenwanlha nac. ⁹ Nwaiacmec nac acnem aplheianmo lhnac na nec Jeremias secama ania'a nennga: «Apquenmecjec tacja 30 aliaquiema alienmomo plata, apquelpeccanma apancawe nac apianmoma m'a enenlhet'awoc co Israel, ¹⁰ ca apquenmaianco lhnac iocjalhma acuesai'a apquenmacmeianquelha apqueliaqjapescamacja nialpa. Lhta aptac jeiano apuesque» ¹

Nema aquiantemecja Jesus napaqtec Pilato

¹¹ Nnenquec nac aquiantemecjo Jesus apnacja gobernador Pilato m'a, lhna aptemac apquenmalhneianca Pilato: —¿Jawe nlho ngiapac lheiap apto apiau'acja apuesque apancoc enenlhet'awoc co Judea? —Jai, tocja —lhna aptemac apcatemmoianca. ¹² Coca apquetlheianmec nac caselha ncolatsecama apquelanai'a Jesus apquellemjama apmania ie sacerdotes cacpota njan apquellemjama apmania ie apquellawacja m'a, man noca engiatemmoicama Jesus ma'a. ¹³ Lhna aptemac mocjom apcanemo Pilato Jesus: —¿Ma nlho enna'ac aplhenacpo nac lheiap meijamolhma, je? ¹⁴ Coca Jesus man noca engiatemmoicama mocjom ma'a, niemascanquec nac apualhoc Pilato m'a.

Aplhenammap apmatnama Jesus

¹⁵ Aptemacja lhta mota gobernador Pilato apacnemecjac lhema enenlhet apcaclhencasemmap la'a, apqueleltacja la njan enenlhet'awoc necsa actacmelaicama lhma Pascua. ¹⁶ Apcaclhencasemmacpe lhta njan lhema enenlhet neten apanque lhta apiecpelcammap ma'a apuesai'a Barrabas. ¹⁷ Ca apquelelmalhneianca lhnac Pilato apqueluescai'e m'a, lhna aptemac: —¿Se lha apquellelto apacnemecjac que', Barrabas, nlhoca la Jesus apuesai'a nac Cristo? —lhna aptemac. ¹⁸ Apiamawec noca niecje Pilato apquelemjama apmania ie m'a apquenmajai'a etselhnanac Jesus aniem'o apqueliasepquescama. ¹⁹ Apnenquec nac mocjom Pilato aquieto nengiecpelcammalhquelha, ca apuecjo lhnac nema annencasecama apsacjescama ania'a apascama aptawa, lhna aptemac: —Metues nac lhec enenlhet anac apeiwomo, niaqjapquec nac lhec acuanmescama pelhasep lhaiec neten anque ncolatsecama aniem'o enenlhet anac—lhna aptemac ma'a. ²⁰ Coca apquelemjama apmania ie sacerdotes cacpota njan apquelemajama apmania ie apquellawacja apqueliateianquec nac enenlhet'awoc ma'a cacpota elelmalhnama Pilato epaqnemecjac Barrabas, cacpota engiaqjec Jesus ma'a. ²¹ Netamen Pilato apquelelmalhnecjo lhnac mocjom enenlhet'awoc ma'a, lhna aptemac: —¿Se lha apquellelto apacnemecjac que, Jesus, nlhoca la Barrabas?— —¡Epacnemecja Barrabas!—lhna ptaiancoc enenlhet'awoc ma'a. ²² Ca apquelelmalhneianca lhnac mocjom Pilato enenlhet'awoc ma'a, lhna aptemac: —¿Se lha apquellelto quetlhencap atnesquesec Jesus apuesai'a nac Cristo, je?— —¡Engiaqja ta, eliaqlha ta njan apmeioc apmancoc neten iamet actennescama! —lhna ptaiancoc ma'a ²³ Lhna aptemac mocjom Pilato apquellanemo: — Mamma apquelanai'a caselha ncolatsecama enenlhet anac —lhna aptemac. Coca njeclhec nac apquelianwescaiam apquellelpalhnecama, lhna aptaiancoc: —¡Engiaqja ta, eliaqlha ta njan apmeioc apmancoc neten iamet actennescama!—lhna aptaiancoc mocjom ma'a. ²⁴ Apuetai'ac nac Pilato metca ncolhec asecjo m'a, cacpota njan apquelianwescaiacmo apquelpalhnecama. Ca apqueltemo lhnac ncolhec acsacjeso iemmen cacpota eliengiecsec apmeioc napaqtawec enenlhet'awoc, lhna ptemac: —Jawe co ascanema ematong enenlhet anac, quetlhencap coca apquellanema ematong—lhna aptemac ²⁵ —Jai, ennenco'o cacpota njan enquetca'ac nellanema ematong enenlhet anac jam—lhna ptaiancoc apquellatemmoianca enenlhet'awoc ma'a. ²⁶ Apacnemecjo lhnac Pilato Barrabas ma'a, ca apcapaso ncolhec aliacpelhquetanca Jesus apiempec, nema alanai'a neliacpelhquetma caselha aiempec, cacpota njan eliaqlhac apmeioc apmancoc neten iamet actennescama. ²⁷ Apqueliantemacjo lhnac soldados Jesus ma'a apcacjaianquelha aujac pa'at gobernador Pilato apnemacja, ca apquellawommacpo lhnac ma'a, apcacnecjo njan ma'a, ²⁸ ca apqueljatsoscaseianco lhnac aptalhnema Jesus, apquelapquesecjo lhnac na apcaclammap apielhuasema m'a. ²⁹ Apquelatquescaso lhnac na quetama nema am'oc apqatec, ca apquellaianco njan lhema iamet apquenenaicamoc apmanie aquieto apmec aquiennacja. Ca apquelteclheianco lhnac aptapno'oc na napaqtec ma'a, apqueluannaianca lhnac na m'a, lhna aptaiancoc: —¡Aptasec noca niecje apiau'acja apuesque apanco'oc enenlhet'awoc co Judea! —lhna ptaiancoc apquelluannaicama. ³⁰ Apquelelhpaqjai'o lhnac apiemmanong, cacpota njan apqueltecpoianca lhnac na apqatec iamet apquellaicamoc nac. ³¹ Nquelastengaianquec nac apnactewascama m'a, ca apqueleljatsoscasecjo lhnac mocjom apquelapquescama apielhuasema, apquellentalhnescasecjo lhnac na aptalhnema apanque nac ma'a, ca apqueliantemecjo lhnac cacpota eliaqlhancoc na apmeio'oc apmancoc neten iamet actennescama m'a. ³² Apquelenteiapmec nac gobernador apnemacja m'a, apqueluetai'o lhnac lhema enenlhet apuesai'a Simon co Cirene, apqueliateianco lhnac apquelleltema eiaqmonquesec apatama iamet actennescama aquientalhnema Jesus ma'a. ³³ Ca apqueluacjo lhnac iocjalhma acuesai'a Golgota, nema altema coca acnaianquelha ientepac nema apqatco'oc, ³⁴ apquellaianco lhnac na m'a vino nema aquiepetquescama panactema actaqmetquescama engiempejec, ca apiepconmo lhnac atquetsec Jesus ma'a, man noca eiamac ma'a. ³⁵ Ca apqueliaqlhaianco lhnac apmeioc apmancoc neten iamet actennescama Jesus ma'a, apnactewaseianco lhnac na lhema nennactewascama cacpota enacsepoc lhema apjapac esacjac Jesus aptalhnema. ³⁶ Apcacjaianco lhnac na m'a cacpota ellanamaja. ³⁷ Ca apqueliepetquescamo lhnac na lhema iamet acpaijema alqasemmalhca tacjaplhet Jesus ma'a, lhna ntemac nema alcascama: "Coca Jesus jenque'e, judios apiau'acja apuesque apanco'oc" lhna ntemac alcasemmalhca m'a. ³⁸ Nnenquec nac na aliaqlhaianco apmeio'oc apmancoc lhemec apcanet enenlhet meliamolhma, lhema lhnac aquiennacja apoctong, cacpota njan sancaluelha. ³⁹ Apqueluannamawec na mota'a enenlhet'awoc apquellelto apqueliecai'a m'a apielhnacja neten Jesus ma'a, apquelieiesaicama lhna mota apqatco'oc ma'a, lhna aptaiancoc apquellanemo Jesus: ⁴⁰ —Aplheianme lhta mota lheiap acnema apmopuana, apuanquec na lhta etuasecja Engiapom Neten apnemacja cacpota elanecjac mocjom janetolhem'a cnem. Apto la jawe ngiapac Engiapom neten apquetca lheiap, etiep jam neten iamet actennescama nac, ewoncasacpo panquec tep! —lhna ptaiancoc ma'a. ⁴¹ Apqueluannaicama lhnac na apquelemjama apmania ie sacerdotes, jengetlhecmoscama jenganemacja Moises, cacpota njan apquelemjama apmania ie apquellawacja, lhna ptaiancoc moc apancawec ma'a: ⁴² —Apuoncasque lhta tep po'oc, coca mancapuanac ewoncasacpoc apanquec tep. Apto la jawe ngiapac anquec apuesque apiau'acja Israel, etiepoc jatelha apanquec neten iamet actennescama nac cacpota mangeliascamec ennenco'o. ⁴³ Aplheianmec na mei'asqueiam Engiapom Neten, apto lhna lhta njan Engiapom Neten apquetca, apto la jawe ngiapac ma'a apcamelaiam, ntasec ewonquescatac jatelha tep Engiapom Neten—lhna aptaiancoc ma'a. ⁴⁴ Apqueluannamawec nac na enenlhet meliamolhma apquellelto nema aliaqlhai'o apmeioc apmancoc lhemec ma'a.

Apquetsepma Jesus

⁴⁵ Catelho lhna ntemac, acteiaiacmo lhnac ienactescama lhma m'a lhma nquec jam, acuacmo las tres ienacteso, ⁴⁶ ca apiennactescamo lhnac apuenecama Jesus ma'a, lhna aptemac: —¡Eli, Eli! ¿lema sabactani? Nema altema: ¡Engiapom Neten ejencoc, Engiapom Neten ejencoc! ¿Selha ntac jeiengiacjo nac que', je?—lhna aptemac ⁴⁷ Lhna aptaiancoc na enenlhet'awoc ma'a: —Ellailhono, Elias secama ania'a annenga apcawema ja'e! —lhna aptaiancoc ma'a. ⁴⁸ Colhuawec anquec nac apqueliasquescamac aia'ac, apqueleltelhnaianco lhnac vino aquiepetcai'a panactema, apnactetmo njan lhema iamet nau'a acuenactema cacpota elteclhecquescamoc apatong Jesus cacpota epetsesec ma'a. ⁴⁹ Coca napocja enenlhet'awoc lhna ptaiancoc ma'a: —Eliengiecja, metnamo nquec mocjom jam, elhiemoc jatelha Elias cacpota ewonquescatac tep jam— lhna aptaiancoc. ⁵⁰ Ca apueneianca lhnac mocjom aquiennactema Jesus ma'a, apquetsepmo njan ma'a. ⁵¹ Colhuawec anquec nac apiaptemmacpoc nema acjalhtama ietamopai'a conne Engiapom Neten apnemacja m'a, apuectamec nac coneng apiaptemmap ma'a, nquelieujecama lhnac lhepop ma'a, nquelpaclhaiacmec nac na metaimong. ⁵² Nquenmaijecjec nac malhca'a m'a, aplhaniec nac apquellelto meliasqueiam Engiapom Neten aptaicocjo mocjom apjalhnanco'oc apiesecsec apquenmasquenwaiacmo m'a. ⁵³ Apquelenteiapmo m'a aquieto malhca'a, ca apquelentalhnenwecjo lhnac na temma Jerusalen ma'a, man nantec enenlhet apqueluetai'a m'a. Lhna ntemac acuetammalhca netamen aptaiecja mocjom apjalhnancoc Jesus apiesecsec apquenmasquenwaiacmo m'a. ⁵⁴ Necsa apqueluetai'a lhnac aquieujecama lhepop cacpota njan lhamacjo caselha actacja m'a acuetammalhca, apuesque soldados apquellanecama Jesus cacpota njan apquetlhelhma'ac alpelhcaseianca lhnac apiempeioc apquellai'a m'a, lhna ptaiancoc: —¡Jawe na ngiapac anquec, enenlhet anac apto Engiapom Neten apquetca!—lhna aptaiancoc. ^{55 56} Nlhaniec nac na nqueluana'ac ma'a allaneianca mocje, Maria Magdalena, Maria Santiago cacpota njan Jose nquen, cacpota njan Zebedeo aptawa, allelto lhta alieplenta Jesus allempai'o m'a Galilea, alpasmomo lhta njan Jesus ma'a necsa aplhengama.

Nema aclhenquesquecja metaimong alhua Jesus apjapac

^{57 58} Nwaiacmec nac pelhasep, apmeiecjo lhnac apnacja Pilato lhema enenlhet apto lhta njan apieplecama Jesus, nema apquetsecama lhta m'a apuesai'a Jose co Arimatea, apquelmalhnenwecjo lhnac Jesus apjapac apmajai'a elcoc neten iamet actennescama, ca apcasecjai'o lhnac Pilato m'a. ⁵⁹ Apmeiecjec nac Jose aplecuecjo apielhnacja neten Jesus apjapac ma'a, apelhquetmo lhnac na ietamopai'a lino apmopei'o. ⁶⁰ Apcaqlhenquesquecjo lhnac metaimong alhua apancoc colhua allanemmalhca, apquellapecjo lhnac na lhema metaimong aquiawai'a atong, ca aptaqjecjo lhnac ma'a. ⁶¹ Ncacjaicocjec noca m'a Maria Magdalena cacpota njan mo'oc Maria aquieto atong. ⁶² Nwaiacmec nac ma'a acnem sabado, ca apquenmeiecjo lhnac apquellemjama apmania ie sacerdotes cacpota njan fariseos apnacja Pilato, ⁶³ lhna aptaiancoc ma'a: —Apuesque, nquetlheianwacjec ennenco'o engellualhoc enenlhet alhta aptemo apmopuana ania'a aplheianmo lhta janet'olhema acnem ncotnec apquetsepma, netamen etnecjac nac mocjom apjalhnancoc. ⁶⁴ Enmenielhuatac jatelha apjapac Jesus apqueltamesaicamoc alhta, cacpota elleltennacsec enenlhet'awoc aptecja mocjom apjalhnancoc. Ca cto la jeng acmowana ania'a nac, tep anquec jata ncotnec ncolatsecama aplhenammacpo lhta apanquec enenlhet anac. Ntase quelhaja lheiap ellapacsec soldados cacpota ellanama atong acuacmo janetolhem'a cnem cacpota memenielhacpec apjapac Jesus ma'a—lhna aptaiancoc ma'a. ⁶⁵ Lhna aptemac Pilato apquellatemmoianca: —Apcacjanquec quetlhencap soldados apancoc, enmeiacja, elleltacmelcaso ta ellanama apancawec quetlhencap atong anac ma'a—lhna aptemac. ⁶⁶ Ca apquenmeiecjo lhnac aquieto metaimong alhua m'a, apqueliennactescamawec nac atong ma'a cacpota mancactalhqueje, apqueliepetcaso njan caselha mongenasquescama aquieto atong, ca apquelleltemo lhnac engiacjancocjac soldados cacpota ellanama m'a.