¹ Necsa aplhengama lhta Jesus apuet'o lhema enenlhet apteianlha secja metca apaqto'oc, ² ca apquellelmalhnenca lhta apqueltamesaicamoc, lhta aptancoc: —Jengetlhecmoscama ¿Se lha actemo apteiaiacmo nac metca apaqto'oc enenlhet anac, aniem'o nlho ca la mancoliamolhma ncana'ac nlho ca la njan meijamolhma apanque, je? —lhta ptancoc apqueltamesaicamoc. ³ Ca apquellatemmonca lhta Jesus ma'a, lhta aptac: — Jawe aniem'o ncana'ac ncoliamolhma, nlho ca la njan meijamolhma apanque', apteiacme lhta metca apaqto'oc ma'a cacpota eluetac jata aplhamacjo enenlhet'awoc aptemacja apmopuana Engiapom Neten acmowana ncotacmelcasecja. ⁴ Necsa actema mocjom acnem, angellanancoc no apqueltemo lhta apto jeiapascama, lheme ncowac jata aptema pelhasep coca mongapuanquec angellanac caselha m'a. ⁵ Necsa asnema apiesecsec quetlhencap, co'o asto ascaponmatma asquetsasquescama lhma' njan— lhta aptac Jesus. ⁶ Ca apquelpatso lhta apiemmanong nalhepop Jesus ma'a, nialpa lhta apquelan'ac, apqueltelhnasquesanco lhta apaqto'oc enenlhet, ⁷ lhta aptac apcano: —Engiacja pancalhua alanemmalhca metaimong anac acuesai'a Siloe ¹ , eliengiescacja ta apaqto'oc ma'a— lhta aptac. Ca apmeiacjo lhta m'a, apqueliengiescacjo lhta apaqto'oc, altaqmelacjo lhta njan ma'a, ca aptaqjacjo lhta njan apnemacja. ⁸ Necsa apqueluetai'a lhnac apquennemolhema apuacjo apnemacja, apquelpacmetquesammacpec nac moc apancawec ma'a, lhna aptaiancoc: —¿Jawe nlho enenlhet anac apquellanjeianca na mota patacom enenlhet, je?— ⁹ —Tocja' jam— Coca po'oc enenlhet alhta aptac: —Jawe, malha niecje'— Coca aplhenammacpawec na apanquec enenlhet anac ma'a: —¡Jai, co'o!— ¹⁰ Apquellelmalhnecjawec na mota actacja altaqmallueiam apaqto'oc, ¹¹ ca apquelleltennaseianca lhnac ma'a, lhna aptemac: —Lhema enenlhet lhec apuesai'a Jesus, nialpa lhquec apquelan'ac, jetnescaso ejaqto'oc, ca jeiapaso aquieto pancalhua alanemmalhca metaimong Siloe cacpota aliengiescacjac ejaqto'oc ma'a. Ca asmeiacjo lhquec asqueliengiescacjo, astacmelacjo njan, asuetacjo lhma' —lhna aptemac apqueltennaianca m'a. ¹² Coca apquellelmalhnecjawec nac mocjom enenlhet'awoc ma'a, lhna aptaiancoc apquellanemo: —¿Co la apnacja enenlhet anac ma'a? —lhna aptaiancoc. —Moijoc co'o —lhna aptemac apquellatemmoianca m'a. ^{13 14} Coca acnem nennecjelha sabado lhta m'a aptacmelquescaiacmo metca apaqto'oc apquelanei'o lhta njan nialpa Jesus ma'a, lhna nqueniemai'ac eliantemecjac aptacmalueiam apcacjanquelha fariseos ma'a, ¹⁵ lhna aptaiancoc apquellanemo m'a: —¿Co la actacja apuetacjo na lhma' lheiap?—lhna aptaiancoc. Ca apcatemmoianca lhnac enenlhet, lhna aptemac: —Jesus lhec apuesai'a jetnesquescama nialpa ejaqto'oc, ca asuetacjo lhma'—lhna aptemac. ¹⁶ Coca lhna aptaiancoc moclhem'a fariseos: —Enenlhet apto aptacmelcasecja nac lheiap, jawe Engiapom Neten apcapascama, meliajacjoc jenganemacja' enganco'oc, apmacmema acnem nennecjelha sabado—lhna aptaiancoc. Coca aplhamacja fariseos lhna aptaiancoc ma'a: — Tocja nlho ca Engiapom Neten apcapascama m'a, soca acto apquelan'o nac caselha jempelapquescama, ca enenlhet la aptemenweiacmo lhma mancapuanquec elanac ma'a—lhna ptaiancoc. Mang nac ncolhnemoc mo'oc apualho'oc fariseos ma'a, ¹⁷ ca apquelelmalhnecjo lhnac mocjom aptacmalueiam, lhna ptaiancoc apquellanemo: —¿Nieje actacja aclheianma apualhoc lheiap enenlhet nac lhec que, je?—lhna aptaiancoc Ca apcatemmoianca lhnac ma'a, lhna aptemac: — Engiapom Neten secama ania'a apancoc ma'a—lhna ptemac. ¹⁸ Coca apquelemjama apmania ie judios apqueliasqueiacmec nac ma'a enenlhet apto aptacmalueiam metca apaqto'oc alhta, ca apquellapascamo lhnac lhema apquellennencasecama eliantenwacjac ncana'ac ma'a, ^{19 20} ca apquelelmalhneianca lhnac ncana'ac ma'a, lhna aptaiancoc: —¿Ca nlho atcac quetlhenca' je?— —Jai —lhna ntaiancoc allatemmoianca m'a. —¿Jawe nlho ngiapac apteianlhasecja metca apacto'oc, je?— —Jai, jawe ngiapac —lhna ntaiancoc ma'a. Ca apquellelmalhnecjo lhnac mocjom, lhna aptaiancoc: —¿Niejec tacja apuetacjo na lhma colhuawe nac, je?— ²¹ —Mangeliojoc ennenco'o apto aptacmelcasecja, elelmalhnama ta apanquec ma'a, apuanengiec ma'a, apuanque engiatemmomaja— ^{22 23} Lhna ntaiancoc ncana'ac ncanec nquellai'ac nac apquellemjama apmaniaie judios enmasquescasecjac aluesai'a alpalhacuecja apcacnecjelha, actemacja lhta njan nema allanei'o meliasqueiam la Jesus apto Engiapom Neten apcapascama. ^{2 24} Ca apquellaweianca lhnac mocjom aptacmalueiam, lhna aptaiancoc: —Nelliawec ennenco'o Jesus apto enenlhet meijamolhma ¿Se lha aclheno apualhoc lheiap ma ie enenlhet anac? Elhen no metca apmopuana ania'a jengelleltennes ennenco'o—lhna aptaiancoc ma'a. ²⁵ Ca apcatemmoianca lhnac enenlhet aptacmalueiam, lhna aptemac: —Moijoc co'o, wanlha lhta metca ejaqto'oc co'o, colhua asuetecjo na lhma—lhna aptemac. ²⁶ Coca apquelelmalhnecjawec nac mocjom ma'a, lhna aptaiancoc: —¿Co lhquec aptacja aptacmelcasacjo lheiap, je?—lhna aptaiancoc. ²⁷ Ca apcatemmoianca lhnac mocjom ma'a, lhna aptemac: —Asqueleltennasquec lhec quetlhencap, coca manlhec jellailhojo. Se lha ncotnec altacjenwescacja alheianma, quetlhencap quelha njan apquenmac'ac etnancoc apquelieplecama m'a—lhna aptemac. ²⁸ Mang nac ncollatsecama apatno'oc apquellanei'o m'a, lhna aptaiancoc: — Lheiap apto apieplecama enenlhet anac ma'a, ennenco'o coca nengelleto nelieplecama Moises annenga, ²⁹ nengelliawec ennenco'o apacmetquescanquec nac nanec Engiapom Neten Moises, coca mangeliojoc co la apqueniem'acja enenlhet anac ma'a—lhna aptaiancoc. ³⁰ Ca apcatemmoianca lhnac mocjom enenlhet aptacmalueiam, lhna aptemac: —Pelapquescama co'o m'a quetlhencap meliojoc apqueniem'acja m'a enenlhet anac apto lhquec jetacmelcasecja, tocja quelha apqueniem'o Engiapom Neten ma'a. ³¹ Ca apto la meijamolhma m'a enenlhet anac, Engiapom Neten mancapuanquec enquesec apmopuana cacpota jetacmelcasecja. ^{32 33} Mangeluetai'ac ennenco'o acto nac nengiesecsa, alhnacjo nenwetai'a apqueniem'o Engiapom Neten ma'a enenlhet anac—lhna aptemac. ³⁴ Coca lhna aptaiancoc mocjom apquellanemo apquelemjama apmaniaie judios: —Apteianlhasecja lheiap meijamolhma, mancapuanque jengetlhecmocsec ennenco'o lheiap ¡Etiep, mewatamo nquec mocjom nengacnecjelha nac!—lhna aptaiancoc. ³⁵ Apleng'a alhta Jesus nema actepquescama enenlhet aptacmalueiam anac nemacnecjelha, apuetacje lhta njan m'a, ca apquenmalhnenca lhta, lhta aptac: —¿Mai'e ei'ascacmoc lheiap Enenlhet Apquetca nac, je?— lhta aptac. ³⁶ Ca apcatemmonca lhta enenlhet ma'a, lhta aptac: —Apuesque', jeltennes no secla enenlhet maie', cacpota moi'ascamec co'o—lhta aptac. ³⁷ Lhta aptac apcano Jesus ma'a: —Co'o m'a— ³⁸ Ca apquelteclhei'o lhta aptapno'oc lhepop napaqte Jesus ma'a, lhta aptac apcano: —Apuesque, moi'ascacmoc lheiap—lhta aptac. ³⁹ Coca lhta aptac apcano mocjom Jesus: —Asua'ac co'o asmajai'a aluetasquesec meliamolhma apanco'oc apancawec enenlhet'awoc. Aluetasquesecja lhma metca apaqto'oc la'a, etnancoc apancawec na malha metca apaqto'oc apquellelto nac apqueluetai'a lhma— lhta aptac Jesus. ⁴⁰ Apquellenga lhta njan moclhem'a fariseos actacja apaioma Jesus, lhta ptancoc apquellano: —Jengetlhenquec lheiap ennenco'o malha metca engaqto'oc—lhta aptancoc. ⁴¹ Ca apquellatemmonca lhta Jesus ma'a, lhta aptac: —Aptanco la quetlhencap metca apaqto'oc, malha niecje meluetai'a meliamolhma apanco'oc, mancolhec na nema aliaqmoncasquesecja apqueltacja la'a. Quetlhencap coca apquelleltacpoc nema apaqto'oc, alhnacjo nquec apqueluetai'a aptaiancolha meliamolhma, nquellietawec etlhewancoc jata nema aliaqmoncasquesecja meliamolhma—lhta aptac Jesus.