¹ Aplomaca lhta Jesus aquieto iocjalhma Galilea, ma lhta ncomac'ac engiacjac Judea, ncanec apquelemjama apmaniaie judios apquelquetanque lhta apquenmajai'a ennapoc ma'a. ² Ncanquetuacme lhta acnem actacmelaicama lhma judios apanco'oc acuesai'a Enramadas ¹ . ³ Lhta aptancoc apquellano apquelialheng'a Jesus: —Melhnecjanquec jenque'e, engiacja ta Judea cacpota eluetac apquellelto apquelieplecama lheiap caselha jempelapquescama apquelanai'a, ⁴ apquelto la njan eiecpelcacpoc lheiap, jawe ecpocsec apquelanai'a caselha jempelapquescama —lhta aptancoc. ⁵ Coca apquelpacmetque lhta panque' apquelialheng'a Jesus aniem'o njan apqueliasqueiam, ⁶ coca lhta aptac Jesus: — Mancowacmoc mocjom acnem ejencoc, quetlhencap coca ntasec lhamacjo acnem. ⁷ Meltacnewac apquelemjama apmaniaie quetlhencap jenque'e, co'o coca jeltacnewacque ncanec asquetlhenquec mota apqueltemacja ncolatsecama m'a. ⁸ Enmeiacjac coca quetlhencap moc apancawec ma'a actacmelaicama lhma nac, mongiacjec co'o, mancowacmoc mocjom acnem ejencoc ma'a—lhta ptac Jesus. ⁹ Ca apnacjo lhta Jesus ma'a Galilea. ¹⁰ Netamen apielhacpo lhta njan apmeiacjo Jesus actacmelaicama lhma neptamna'ac apquelialheng'a. ¹¹ Necsa actacmelaicama lhma lhta m'a, apquelquetanque lhta apquelemjama apmaniaie judios Jesus ma'a, lhta ptancoc: — Co la apmanquelha enenlhet anac—lhta aptancoc. ^{12 13} Ma lhta ellasac apquetlheno enenlhet Jesus aquieto actacmelancolha lhma m'a, apquelmalengioma lhta m'a, ncanec apquellac'awe lhta apquelemjama apmania ie judios ellenjoc ma'a, lhta aptancoc enenlhet: — Apiawe lhma' enenlhet anac ma'a, jela —lhta ptac. — Ma', meijolhma m'a, apmopuana ania'a m'a —lhta ptac po'oc enenlhet. ¹⁴ Netamen, nalhet actacmelaicama lhma lhta nwacmoc ma'a, aptalhnenwacjo njan Jesus Engiapom Neten apnemacja, ca apquempo apquetlhecmoscama m'a. ¹⁵ Mpelapcasque lhta apquelleng'o apquelemjama apmaniaie judios, lhta aptancoc: — Meltamesammacpoc jenganemacja engancoc anac ja'e, nieje ptemacja apianweiacmo nac—lhta ptancoc. ¹⁶ Coca lhta aptac Jesus apquellatemmonca m'a: — Ca asquetlhecmoscama nac jawe ejencoc ejenque', coca aniem'o m'a apto lhta jeipascama. ¹⁷ Apmac'ac jata nquec eliejecjoc Engiapom Neten enenlhet, eijoc jata actacja asquetlhecmoscama nac aniem'o Engiapom Neten, jawe aniem'o ejencoc ejenque. ¹⁸ Enenlhet apto la aplhenammacpo panque', apqueltemo ncolhec aquiaspenca aptacja la'a, coca enenlhet aptengiai'a la etnesquesec neten apanque apto apcapascama, coca enenlhet anac acto iocjalhmec aplheianma m'a, jawe apmopuana ania'a. ¹⁹ Apquellaianquec nac na nec Moises jenganemacja quetlhencap, coca melleliejecjo, ca ncanec ncomajac jellaqjec quetlhencap—lhta ptac Jesus apquellano. ²⁰ Ca apquellatemmonca lhta enenlhet ma'a, lhta ptancoc: —¡Mamma enenlhet engiaqjec lheiap, queliaqjameio i'e acmaicama lheiap! —lhta ptancoc. ^{21 22} Coca lhta aptac mocjom Jesus: —Apmanquec tacja Moises annenga aptemacja lhnac nac nanec Abraham, Isaac, Jacobo nnenga cacpota ncoiaqtemenalhcac quetsec apcammelhacja apquenno apquetcoc la'a, acuacmo nenwanlha nac apqueluanecamoc apqueluaneianco njan quetlhencap, ncacjoc acnem sabado apcaqjaicocjelha nac quetlhencap. ²³ ¿Se lhta cto apquellau'o lhta quetlhencap secje lhta ie, astacmelcasacjo lhta lhema enenlhet sabado lhta m'a, je? ²⁴ Metnamo nquec apqueliecpelquemo apiocja po'oc aniem'o apaqto'oc apqueluetai'a, ntasec coca etnancoc aquietemo nquec apqueliecpelquemo m'a—lhta ptac Jesus apquellano m'a.

Jesus aplheianma apqueniemacja

²⁵ Apquelpacmetquesacpe lhta moc apancawec moclhem'a enenlhet co Jerusalen, lhta aptancoc: — ¿Jawe nlho apquetamecpo lhta enenlhet anac apmajai'a ematong? ²⁶ Ca ja'e, apquelpacmetquesanca nac enenlhet, manac quelha emammacpoc —lhta aptancoc enenlhet. Lhta aptac na po'oc: — Colhua quelha meliasqueiacmoc apquelemjama apmaniaie enganco'oc anac apto Mesias ja'e enenlhet anac—lhta aptancoc. ²⁷ —Ma', jawe Mesias ja'e, jata apuo'o la m'a mancolhec jata aquiojo apqueniemai'acja, coca ennenco nenniawec apqueniem'acja enenlhet anac —lhta ptac po'oc enenlhet. ^{28 29} Necsa apquetlhecmoscama lhta Jesus conne Engiapom Neten apnemacja apquetlhenac enenlhet ma'a, ca apleng'o lhta Jesus ma'a, apiennacteso lhta paioma, lhta ptac: — Apquetlhenque niecje quetlhencap apqueliamo se lha co'o ie, cacpota njan co la asqueniem'acja m'a, meliejec coca. Jawe asuai'a ejenco ie', jeiapascama m'a apto apiamolhma, asiecpelcawec co'o, quetlhencap coca meliecpelcac ma'a —lhta ptac Jesus apquellan'o enenlhet ma'a. ³⁰ Ca apquenmac'o lhta elpatjetec Jesus apquelemjama apmaniaie judios ma'a, coca malhta ncollapuanca'ac, ma lhta njan ncowacmoc acnem apancoc ma'a. ³¹ Coca malhta ntec enenlhet meliasqueiam Jesus ma'a, lhta aptancoc: —Jai', Mesias jam, ellanjono lhamacjo caselha monwetai'o aniem'o neten apquelanai'a, elianwomjo coca—lhta ptancoc. ³² Apquelleng'a lhta njan ania'a aplhenammap Jesus fariseos cacpota njan apquelemjama apmaniaie' sacerdotes, ca apquellapaso lhta apquellanecama necjau'ac Engiapom Neten apnemacja' m'a cacpota elpatjetec Jesus. ³³ Apne lhtoca Jesus conne Engiapom Neten apnemacja, enenlhet alhta apquetlhecmosac ma'a, lhta ptac: —Aloca ta mocjom apiesecsec quetlhencap aquiacuatacjo, cacpota ataqjo apnacja' apto lhta jeiapascama. ³⁴ Jelquetmoc jata quetlhencap, coca manjeluetecjec jata, mancollapuanquec na enmeiacjac asmac'ac jata angiacja—lhta ptac. ^{35 36} Ca apquelelmalhnecpo lhta moc apancawec apquelemjama apmaniaie judios ma'a, lhta ptancoc: —Se lha aplheno nac aie', co la apmac'acja emjancoc cacpota mongeluetecje. Quelha apme' engiacjac elpalhacuacjac judios mo'oc apquellawacja ² nac cacpota etlhecmoscamoc ma'a, quelha njan apme engiacjac apiesecsec metnanco nac judios—lhta ptancoc ma'a.

Iemmen jengiennactescama

^{37 38} Nwacme lhta actacja nque nnelha acnem actacmelaicama ³ lhma m'a, acto lhta neten anquec aquiaspommalhca m'a, ca apquenmacjo lhta neten Jesus apiesecsec enenlhet, apiennacteso apaioma, lhta ptac: —Apiemac'ac jata nque' enenlhet, jei'ota ta, manjeiascacmo la'a enenlhet anwanco ta apiama cacpota ncotepancoc iemmen apualhoc malha acto nac aluata', ca ntac ma'a waccajac Engiapom Neten apaioma—lhta ptac Jesus. ³⁹ Ca actemacja lhta apaioma Jesus aplheianma aptemacja Engiapom Neten Apualhoc, etlhewancoc jata m'a apquellelto la meliasqueiam, mang coca ewai'ac ma'a secje lhta, amanie coca ncaimommalhcac secjec ematong Jesus, cacpota njan etnecjac mocjom apjalhnancoc apiesecsec apquenmasquenwaiacmo.

Apquetlheianma enenlhet alpeiwecja aptemacja Jesus

⁴⁰ Moclhem'a lhta enenlhet acto apquellengai'a apqueltennaicama Jesus ma'a, lhta aptancoc: —Quelha secama ania'a nellailhemo nac ewacja ta, ca jam, enenlhet anac— lhta aptancoc. ⁴¹ Coca po'oc enenlhet alhta aptac: —Mesias enenlhet anac jam— Coca po'oc lhta aptac: — Jawe', meniengiemec Mesias m'a iocjalhma Galilea nac. ⁴² Nietnec actalhesammalhca waccajac Engiapom Neten apaioma Mesias apto David aptawen neptamen, etiemoc jata natemma Belen, apcawacja lhnac na nec David—lhta ptac. ⁴³ Ma lhta ncolhoc mo'oc apquetlheianma enenlhet'awoc Jesus ma'a. ⁴⁴ Moclhem'a enenlhet alhta apquelleltawe niecje ellaclhenquesec Jesus nengaclhengcasemmalhquelha, coca nquelluannalhque lhta apualho'oc ma'a. ⁴⁵ Ca apqueltaqjo lhta neptapna'ac apquellanecama Engiapom neten apnemacja apcacjanquelha apquellemjama apmania ie sacerdotes cacpota njan fariseos, ca apquelelmalhnenca lhta: —¿Se lha cto meliantemantamo nac Jesus que, je?— lhta aptancoc apquelemjama apmaniaie ⁴⁶ Ca apquellatemmonca lhta m'a, lhta ptancoc: — Ntasec lhec apqueltennaicama m'a, mamma enenlhet elhoc ma'a —lhta aptancoc ma'a. ⁴⁷ Coca lhta aptancoc fariseos: —!Apqueliennencasquec na quetlhencap ma'a! ⁴⁸ Ellanjono, apqueliascacmec apquelanma apmanie enganco'oc anac, cacpota njan apquelanma apmanie fariseos enenlhet anac ma'a. ⁴⁹ Coca enenlhet anac meliasqueiacmo nac ma'a Jesus, meliamoc jenganemacja Moises annenga, Engiapom Neten jato ca eliaqmoncasquesecjac apqueltemacja m'a—lhta ptancoc. ⁵⁰ Apne lhta njan ma'a lhema fariseo apuesai'a Nicodemo, apioiacmo lhta pelhasep apnacja Jesus, lhta aptac apquellano aptemo lhemec fariseos: ⁵¹ —Ca ntac jenganemacja enganco'oc anac, mangapuanquec anlhenec apselhnanemmap metco la aptemacja emmo'oc, amanie coca nengailhemo aplheianma—lhta ptac. ⁵² Ca apquellatemmonca lhta m'a, lhta ptancoc: —Lheiap anac na apto malha co Galilea. Eltameso no apquelanei'o jenganemacja Moises, mamma lhema secama ania'a engiengiemac ma'a Galilea—lhta ptancoc ma'a. ⁵³ Netamen ma'a, apqueltaqjacjo lhta moclhem'a apcacjaianquelha.