¹ Apiamawe lhta Jesus fariseos apquellengai'a aplhamecamoc apquelieplecama, aplhaniec na apquellauquesaicamoc iemmen enenlhet'awoc, aselhte lhta m'a Juan. ² Coca jawe niecje Jesus apquellauquesaicamoc iemmen enenlhet'awoc, wanlha lhtoca niecje apqueltamesaicamoc. ³ Apiamawe lhta njan Jesus apquellengai'o Fariseos ania'a aplhenammap, lhta ncanec etiepoc iocjalhma Judea, ca aptaqjemo neptamen aquieto iocjalhma Galilea, ⁴ nietawe lhta njan nalhet amai lhema iocjalhma acuesai'a Samaria, ⁵ apuacme lhta m'a na temma acuesai'a Sicar, nengaqte lhta lhepop apancoc Jacob annenga apcaicocjo lhnac apquetca Jose. ⁶ Njeclhe lhta mocjom aquietnemo m'a iamelquet apancoc Jacob annenga, apnacme lhta necja Jesus ma'a aniem'o apiampai'a alhengama nalhepop, malha lhta la 12 catelho m'a. ^{7 8} Coca apqueltamesaicamoc apquenmeiacje lhta apnacja temma aptengiaicamoc aptecamoc. Ca acuecjo lhnac lhema nqueluana co Samaria neptamna'ac ma'a aquiaiam iemmen, lhna aptemac Jesus apcanemo: —Jeiamoc no colha quetsec iemmen ancoc—lhna ptemac. ⁹ Coca meltetescaiacmoc Judios, co Samaria m'a, ca ncanemac ncotnec acpaioma nqueluana m'a, lhna ntemac: —¿Se lha ntac apqueltonac anwancoc iemmen lheiap que, je? Judio lheiap, co Samaria co'o —lhna ntemac anemo m'a. ¹⁰ Ca apcatemmoianca lhnac Jesus: —Manjeiecpelcac lheia', mancoijec na apmac'acja engiancoc jata lheia' Engiapom Neten. Co lhtema nac jeiecpelquema lheia', jenmalhnama ta iemmen, cacpota anwancoc iemmen actacmanma acmases anque' — lhna aptemac ¹¹ Coca lhna ntemac mocjom nqueluana: —¿Se lha eiawoc iemmen actacmanma nac que, je? Mamma iemmen alhancoc apancoc lheiap apiengiecja la conne iamelquet anac, tawanne'. ¹² Nengelieijenca Jacob annenga lhnac na nec jengellaicocja jenque'e iamelquet anac, apienaianquec nac na nec apquetcac cacpota njan apnaqtoscama. Neten apanque Jacob annenga, melhnoc lheiap— lhna ntemac. ¹³ Ca apcatemmoianca lhnac mocjom Jesus, lhna ptemac: —Apienquec jata nquec enenlhet iemmen aniem'o iamelquet anac, eimac jata mocjom, ¹⁴ coca enenlhet apiama nac iemmen ascaicamoc anac co'o, meimaquiec jata mocjom. Ncotepancoc jata mota iemmen conne apualhoc, ncancoc jata aquiennactema apnengiec mancotnenweianlha nnelha— lhna aptemac Jesus. ¹⁵ Coca lhna ntemac mocjom nqueluana: —Jeiamoc iemmen aplheno nac lheiap, cacpota moimecjec mocjom, moiacuonwataniec jata mocjom iemmen jenque'e iamelquet anac—lhna ntemac. ¹⁶ Coca lhna ptemac mocjom Jesus: —Coiantenwacja' atawa— ¹⁷ Ca atemoianca lhnac: —Mamma co etawa'— Lhna aptemac Jesus mocjom apcanemo: —Jai, jawe ngiapac actacja nac aclheianma, ¹⁸ asiawec co'o 5 lhta anacteianca'a lheia, coca colhuawe nac jawe njan atawa aquiantemaianca nac—lhna ptemac. ¹⁹ Mpelapquescanquec nac aclengai'a nqueluana, lhna ntemac: —¿Se lha ntac apiojo nac que? Apiolhma nac lheiap. ²⁰ Asmac'ac apenesoc asqueltennascama asqueltawec jepeiwescasecja. Nelieiejenca co Samaria lhnac na nec apcacnecjac jenque'e lhienep acjema nac cacpota eltacnescasancoc Engiapom Neten ma'a, coca quetlhencap judios apquetlheianme mota actacmanma eltacnesquescacjac Engiapom Neten wanlha m'a aquieto Jerusalen, Engiapom Neten apnemacja nac. ¿Co la actacmelacja antacnesquescacjac Engiapom Neten ma'a, je?— lhna ntemac. ²¹ Ca apcatemmoianca lhnac Jesus: —Ncanquetacmec acnem ntasec apquenmac'acja la eltacnescasancoc Engiapom Neten jenque'e lhienep acjaiam anac nlhoca la m'a Jerusalen, jawe ngiapac anque astacja nac. ²² Lheia annemolhema co samaria meliamoc selha eltacnescasancoc que, coca ennenco'o judios nengelliamawec, ncanec nengelluoncasemmalhca tep anac aniem'o m'a judios. ^{23 24} Engiapom Neten jawe aptonac enenlhet, mamma apjapetec ¹ , nwa'ac acnem apquelleltema eltejec apqueltacnescasecamoc acto jawe ngiapac anquec Engiapom Neten, eltacnescasancoc aniem'o apquenmaicama Apualhoc apanquec ma'a, actemacja aquietemo nquec ma'a—lhna aptemac Jesus. ²⁵ Coca lhna ntemac mocjom nqueluana: —Asiawec co ewac jata Mesias, mo'oc nema ltema Cristo, jata jengelpeiwescasecja lhamacjo caselha— lhna ntemac. ²⁶ Coca lhna ptemac Jesus: —Co'o nac Mesias— ²⁷ Mpelapcasque lhta apqueluactamo apqueltamesaicamoc ma'a, acpelapqueso apqueluetai'a apacmetquesaicama Jesus lhema nqueluana, coca nquellennawenque lhta apquenmajai'a elelmalhnama actacja aclheianma nqueluana. ²⁸ Ca acpecquenacjo lhta ietanwalhua m'a, acmeiacjo lhta temma aleltennascacjo enenlhet'awoc, lhna ntemac allanemo: ²⁹ —¡Enenlhet lhec ja'e, apiawec lhec lhamacjo astemacja, noc nojo, Mesias quelhaja!—lhna ntemac ma'a. ³⁰ Ca apquenmeiocmo lhta enenlhet apqueliocmo apnacja Jesus. ³¹ Coca apqueltamesaicamoc Jesus apqueliatenque lhta m'a, lhta aptancoc: —¡Etawecja apquetse! —lhta aptancoc. ³² Coca lhta ptac Jesus apquellatemmonca: —Nietnec co'o astoma meliejec quetlhencap— lhta ptac ma'a. ³³ Apquelpacmetquesacpe lhta moc apancawe apqueltamesaicamoc ma'a, lhta aptancoc: —Nne nlho ca la acsantencaso aptoma—lhta aptancoc. ³⁴ Coca lhta aptac Jesus: —Ascasecjai'o co'o Engiapom Neten, asaujo ta asmacmecama apqueltemo lhta alana' apto njan jeiapascama m'a, ca malha astoma co'o m'a. ³⁵ Ca ptanco mota quetlhencap apquetlheno, 4 pelten nelailhema nenganma cacpota annaclhec aquielhna, coca stac co asquellano ellanjono aniep aquiawai'a nac, nnacmatque aquielhna m'a, nennaclhemacja ntajac. ³⁶ Etlhewancoc jata aquianmoma apquellelto la apquenmacmecama apnaclhecamoc aquielhna, ca aquielhna nac enenlhet ma'a ncoitec jata aliennactema apnengio'oc ncotnenwaianlha nnelha, ncolpaijecjac jata apualho'oc lhemec ma'a apasmecja apquellelto apquenaicamoc cacpota njan apnaclhecamoc. ³⁷ Jawe ngiapac ma'a actacja nema altennaicama, napocja apquenaicamoc actec, napocja njan apnaclhecamoc aquielhna. ³⁸ Co'o coca asquellapascama quetlhencap enaclhancoc aquielhna aquietemelha lhta apquenaicocjelha po'oc enenlhet ma'a, coca quetlhencap nquelietacjec apquenmecja apnaclhecamoc aquielhna —lhta ptac apquellano Jesus ma'a. ³⁹ Ma lhta eliascacmoc enenlhet'awoc co Samaria Jesus, lhta ncanec nqueluana altennanwecjo actemacja aniemjaicamaja apiamo Jesus ma'a, ⁴⁰ ca apqueluo'o lhta enenlhet apnacja Jesus, apquellelto lhta njan elhnecjac secjec Jesus ma'a, ca apnacjo lhta janet acnem ma'a. ⁴¹ Ma lhta eliascacmoc enenlhet'awoc apquelleng'o actacja apaioma Jesus. ⁴² Netamen alhta aptancoc apquellano nqueluana lhta m'a: —Ma lhta angeliascacmoc Jesus actacja lhta aclheianma lheia, coca colhuawe nac mangeliascacmoc ncanec nelleng'ac aptacja apaioma, colhua nelliawec apto jenwonquescama tep ma'a—lhta aptancoc enenlhet'awoc. ⁴³ Netamen ma'a, janet acnem alhta ntac apnema m'a, apquempacjo mocjom aplhengama Jesus aquieto Galilea. ⁴⁴ Aplheianme lhta Jesus mamma secama ania'a emacpoc tacja apcawacja apanquec la'a. ⁴⁵ Coca apquenme lhta tacja apuacmo Jesus Galilea m'a, ncanec nquetlheianwacje lhta apualho'oc enenlhet caselha jempelapquescama apquelanei'o alhta Jesus aquieto Jerusalen necsa actacmelaicama lhma pascua lhta m'a.

Aptacmelcasecja Jesus apuesque apquetca

⁴⁶ Ca apquempacjo lhta mocjom Jesus aplhengama, apuacjo lhta na temma Cana aquieto Galilea, aptemescasecjelha lhta njan iemmen vino ma'a. Aplomaca lhta m'a lhema apuesque soldados, apquennencasecama apiau'acja apuesque, acmasca apiempec alhta apquetca aquieto m'a na temma Cafarnaum. ⁴⁷ Apleng'a lhta apuesque apuo'o Jesus apquempai'o Judea apuaiacmo Galilea, ca apmeiacjo lhta apqueltennascacjo etnec aplhelhma apnemacja, apcasquesque lhta ame' apqueltemo etacmelcasecja apquetca ncama lhta apquetsepma m'a. ⁴⁸ Lhta aptac Jesus: —Lheiap cacpota njan apquennemolhema nac wanlha apquelleltemo eluetac caselha monwetai'o aniem'o neten cacpota manjeliascame—lhta aptac apcano. ⁴⁹ Apcapema lhta apuesque m'a, lhta aptac: —Noc, engiacjetamoc, angenmeiacja asnemacja amanie apmajai'a enietsepoc eietca— lhta ptac apuesque. ⁵⁰ Ca apcatemmonca lhta Jesus: —Etaqjecja apnemacja, etacmelecjac jata apquetca—lhta ptac. Ma lhta ei'ascacmoc aptacja apcano apaioma Jesus, ca aptaqjacjo lhta njan ma'a. ⁵¹ Necsa aptaqjecja lhnac m'a, nalhet amai, apqueltaniacmo apquenmacmesaicama, lhna aptaiancoc apquellanemo: —Aptacmelacjec lhec apquetca— lhna ptaiancoc. ⁵² 52 Lhna ptemac apquelelmalhneianca apuesque: —¿Se lhquec hora aptacmelacjo ie, je?— — Acnem alhta, la 1 catelho lhta mmascac acmelhanma apiempec ma'a—lhna aptaiancoc ma'a. ⁵³ Nlheianwecjec nac apualhoc apuesque nietemawec anque lhta hora actacja apaioma Jesus etacmelecja apquetca, mang nac ei'asqueiacmoc apuesque cacpota njan acuacjo apquetcac. ⁵⁴ Coca jeng janet alhta ntac apquelanai'a Jesus caselha monwetai'o aniem'o neten, aquieto m'a Galilea necsa aptaqjemo Judea.