Capítulo 5
1
Quetlhencap elialheng'a, mancaimelhcac annactalhesquesec actemacja ncotnec jata acuetammalhca m'a lhamacjo caselha nac asquelleltennaso lhquec,
2
apquelliawec quetlhencap ncotnec jata acpelapquescama apuactamo ta Apuesque jenque'e, malha enenlhet la apmenielhma acpelapquescama apuai'a, metca nema aljalhanma.
3
Jata etnancoc enenlhet'awoc jenque'e: —Moltama apualho'oc, mellaga njan—jata etnancoc ma'a.
Coca ncotlapquesec jata acuai'a aquientalhnema apnactewasemmap enenlhet'awoc ma'a, mamma ta njan elielhanenwomoc ma'a, ncotlapquesec jata njan malha actonac nqueluana la nlosec acpelapquescama nac acmasca au'alhoc.
4
Coca quetlhencap mancolpelapquesec jata apqueluetai'a m'a malha enenlhet lhec apmenielhma, ncanec quetlhencap melloca mota ienactesacja lhma.
5
Malha coca apquelloca m'a atsac'elha lhma nac cacpota njan acnem ancoie.
6
Melienmamanquec najan malha aptaiancolha nac ma'a po'oc enenlhet, ntasec coca etnanco mota malha apnaclhatecjai'a la'a, metca njan alieijamalhma la'a.
7
Pelhasep apanquec la'a apnactenquec enenlhet'awoc, nquelieijac na lhma,
8
ennenco'o coca nelloca mota acnem ancoie ca ncanec ntasec montanquec malha jengelieijamalhma la'a, ntasec angelapquesec malha nelapquescama la ennengio'oc aluesai'a m'a nengamelaiam canjan mongiasqueiam, angelletsawec jata njan malha casco la'a acuesai'a nengeljalhanma angeluoncasalhcac jata tep.
9
Jengeliequiescanquec ennenco'o Engiapom Neten jawe apmajai'a jengellancoc apiaqmoncasecja nentaiancolha, wanlha coca apmajai'o jengeluonquesec tep aniem'o apuesque Jesucristo,
10
apto lhta apquetsepma jengianmoma ennenco'o cacpota annacjoc lhemec ma'a nengellelto nac enjalhnanco'oc canjan apqueletsepmo nac.
11
Ca ncanec ntasec
elleliatecjoc po'oc, eleliennactescasecjoc na apualho'oc po'oc lhamacjo acnem.
Apquellanemacja etnancoc Pablo co Tesalónica
12
Quetlhencap elialheng'a, nengelleltawec ennenco'o ellajoc apquelemjama apmaniaie apanco'oc apquellelto nac apquennawescama mota cacpota njan apquetlhecmosecamoc actemacja Apuesque engancoc.
13
Ellajo mota malha apquelpetma la'a, ellamelemjo ta njan ncanec apquelpasme mota quetlhencap ma'a, elloca ta njan metca acmasca apiesecsec anac quetlhencap jam.
14
Nengelleltawec na ennawacsec apquellelto la apquellanecamoc caselha ncolatsecama jam, eliatecjo ta njan ma'a apquellelto nac anmaiosac'a apualho'oc, elpasem jata njan meliennactema nac, cacpota njan etnancoc metca apquelpecjesammap apiesecsec anac jam.
15
Mellanco nquec eliaqmoncasquesecjac po'oc apquellanesquescama la ncolatsecama, ntasec coca mota etengiancoc ellanancoc caselha altacmelo apiesecsec anac quetlhencap cacpota njan apiesecsec po'oc anac enenlhet.
16
Colpaijecja coca mota apualho'oc,
17
elelmalhnamoc na metca nnelha.
18
Quetlhencap apquellelto meliasqueiam Cristo Jesús nietawec na etnancoc gracias lhamacjo caselha apqueluetacja la'a, ca apiasponcomacja Engiapom Neten ma'a
19
Menmanwom apmac'acja la etnec Engiapom Neten Apualhoc,
20
meltacnewa njan ania'a aniem'o Engiapom Neten aclhenammalhca nac,
21
ntasec secjec na ellanama netamen enmancoc jata tacja actacmelo la'a,
22
coca eltacnewa m'a ncollatsenca nlho nema atlhecmoscama.
23
Nengelleltawec na Engiapom Neten apto ngiapom metca actaicama enwalhoc etnec na
apquelpoccanma quetlhencap, eltacmelquesec apualho'oc, apqueluanmoncoma canjan apqueliocja cacpota etnancoc metca apqueltemenweiacmo lhma acuacmo apuactamo ta apuesque engancoc Jesucristo.
24
Jai', apto apquellawecama quetlhencap wanlha mota apquellanai'a aptacja la aplheianma, eiplauquesec jata njan aptacja apaioma.
25
Quetlhencap elialheng'a, jengellelmalhnesques jata Engiapom Neten cacpota jengeltacmelquesec ennenco'o m'a.
26
Elpaiwesap jata njan apquellialheng'a aquieplomo apquelpetsesma apmalhempen'oc jam,
27
asqueltawec co'o aquieplomo asientalhnemo jeiaicamoc Apuesque elietsatancoc waccajac anac aplhamacjo elialheng'a jam.
28
Asqueltawe na Apuesque engancoc Jesucristo ewaiwesentac apquellamelaiam tacjaplhet'oc quetlhencap jam.