Capítulo 4
Apqueltemacja antec Engiapom Neten
1
Quetlhencap elialheng'a, nelleltennasquec lhema nempaioma aquieplomo apuesque engancoc Jesús, eltacmelcasacpo ta lhamacjo acnem ncanec apiasponcomacja Engiapom Neten ma'a,
ca nentaiancolha lhta njan nengetlhecmoseianco quetlhencap ma'a, colhua apquelleliejacjawec na quetlhencap ma'a.
2
Jengellapascanquec ennenco'o Engiapom Neten cacpota angetlhecmosancoc quetlhencap, apquenmaianque lhta njan tacja quetlhencap ma'a netlhecmosecamo lhta.
3
Wanlha coca apqueltemawec Engiapom Neten eliengiecjac ma'a ncollatsecama nac, menmensanwom anque lhma mellanemmacpelha nac etnancoc.
4
Ntasec coca moclhem'a quetlhencap enmancoc apqueliocja nac cacpota mellaniec ncollatsecama caselha, wanlha coca ntasec eltacmelcasacpojo, ellajoc na po'oc.
5
Melleltonquec na ncolhnancoc apualho'oc alleltemo la enmensanwomo lhma', ca aptaiancolha nac ma'a enenlhet apqueliasqueiam anac Engiapom Neten.
6
Menactewascamanque lhma, meliennenques na po'oc actemacja m'a caselha ncolatsecama lhquec, nellascanque lhta ennenco'o m'a aquiawai'a nquec la apiaqmoncasecjac Apuesque.
7
Meltemo Engiapom Neten angellanancoc malha caselha alpaiseiam la'a, wanlha apqueltemo angeltacmelcasalhcojo.
8
Lhema enenlhet la aptacnoncoma jengetlhecmoscama nac, manjengeltacnewac ennenco'o, aptacnewacque' coca m'a Engiapom Neten apto jengellaicamoc Espiritu apancoc.
9
Mancaimelhcac annactalhescasancoc mocjom actemacja apquellamelammap apiesecsec anac quetlhencap jam ncanec apquetlhecmosecamoc apanque Engiapom Neten quetlhencap,
10
apquellaneianquec quetlhencap ma'a apqueltacmelquesquescamo njan apquellaniemjaicama apquelialheng'a apquellawa nac ma'a aquieto Macedonia. Wanlha nengellelto elienlhanmancoc lhamacjo acnem apquellamelaiam po'oc.
11
Nenmac'ac angelleltennasecjoc mocjom nelleltennaso lhta,
¡elienlhanmamoc metca apqueltemenwecjo lhma'! ¡meujanenwomanquec aptacja la po'oc, ellanjo toca apanco'oc apancawec aptancolha la'a! ¡Enmacmama coca motaja
12
cacpota mellelmoncalhnamaja¡ Netamen ellajoc jata mota apquellelto nac apqueliasqueiam Engiapom Neten.
Ncotnec jata apquellaniemjaicama apquellelto nac apquelletsepma
13
Elialheng'a, nenmac'ac angelleltennacsec acmac'acja ta ncotnec apquellaniemjaicama apquellelto nac apquelletsepma cacpota quetlhencap mancollaiose apualho'oc malha aptaiancolha nac ma'a enenlhet'awoc metca nac aleljalhnecama apualho'oc apmaniaie.
14
Mongeliasqueiacmoc ennenco'o Jesús apquetsepmo lhta canjan aplhatecjanweiacmo lhta njan, mang na angeliasqueiacmoc Engiapom Neten elaclacjac jata apquelleto nac apquelletsepma meliasqueiam la Jesús.
15
Nengelleltennasquec
ennenco'o mota jengetlhecmoscama nac aniem'o Apuesque, apmaniaie ta elaclacjac apquellelto nac apquelletsepma meliasqueiam, netamen jata njan m'a nengellelto nac enjalhnanco'oc apuactamo ta jenque'e Apuesque.
16
Ncolnalhcac jata aquiennactema apatong apqueliatecama, ncolnalhcac jata njan ma'a apqueliatecama lhema enenlhet neten apuesque, acpaiwoma njan iompa'at aniem'o Engiapom Neten, ewaiwentac jata Apuesque aquieto neten, apmaniaie ta enaclhatecjanwomoc apquellelto lhta apquelletsepma meliasqueiam alhta Cristo,
17
netamen ennenco'o nentanco nac enjalhnancoc mocjom ncolhec jata enlaclacjo lhemec apquellelto lhta apquelletsepma aisecsec iepjopai'a cacpota angeluetanwacjac Apuesque m'a neten, jata angelloca mota lhemec metca nnelha m'a.
18
¡Ntasec elpaqmetquesacpoc apancawec apiesecsec anac quetlhencap jam ania'a nac cacpota ncoliennecjo mota apualho'oc!