Capítulo 5
Mongiasqueiam actemesquesenta coneng ma'a maniamolhma
1
Apquellelto nac meliasqueiam Jesus apto njan Mesías coca apqueluesai'a m'a Engiapom Neten apquetcac. Apquellamelaiacmo la Engiapom, apquellamelacmec na apquetcac la m'a.
2
Nellamelacmo la m'a apquetcac anac ma'a Engiapom Neten, nellamelacmec na m'a Engiapom Neten, nelleliajacjawec na jenganemacja apanco nac ma'a.
3
Jai, acto la enenlhet apcamelaiam Engiapom Neten, apqueliajacjawec na jenganemacja apancoc anac ma'a, nquelheiwac'awe na jenganemacja apancoc anac ma'a.
4
Apto la enenlhet Engiapom Neten apquetca, aptemescasantec na coneng maniamolhma nac aniem'o aquietnema njan meiasqueiam ma'a.
5
Apto la njan meiasqueiam Jesus apto Engiapom Neten apquetca, aptemescasantec na coneng maniamolhma nac.
6
Necsa apuai'a lhta Jesucristo jenque'e nalhepop anac nietnenque lhta janet caselha apuai'o m'a acuetammalhca, iemmen canjan ema, jawe wanlha iemmen, canjan ema'. Espiritu lhta aplheianma m'a apto njan apuetaianco m'a, apto njan metca aptaicama apmopuana ania'a m'a.
7
Apcanet'olhema lhtoca njan apqueluetaianco m'a, apquetlheianma njan,
8
acno nac ma'a Espiritu, iemmen canjan ema, acnemo mo'oc alhta njan apualho'oc ma'a apquetlheianma.
9
Ca aplhamo la njan enenlhet apquetlheianma lhema ania'a, nenmanquec na tacja ennenco'o m'a, coca acto njan neten anquec actacmanma m'a angenmancoc tacja aptemacja aplheianmo Engiapom Neten apquetca apanque'.
10
Apto la enenlhet mei'asqueiam Engiapom Neten apquetca, apmec na tacja aptemacja aplheianma Engiapom Neten, coca apiascacmo la enenlhet, apqueltanquec na apmopuana ania'a Engiapom Neten.
11
Aplheianme lhta Engiapom Neten jengellaiancoc aliennactema ennengio'oc mancotnenwaianlha nnelha aniem'o m'a apquetca apancoie'.
12
Apto la enenlhet apmama tacja apuesai'a apquetca, nietnec na aquiennactema apnengiec ma'a mancotnenwaianlha nnelha, coca apto la njan memama tacja apquetca nac ma'a, mang na ncoietnac aquiennactema apnengiec.
13
Jai', lhamacjo actemacja asnactalhesquescama nac quetlhencap apquellelto nac meliasqueiam Engiapom Neten apquetca, cacpota eliamwomjoc acnaicamoc aliennactema apnengio'oc mancotnenwaianlha nnelha.
14
Mancoltama ta engellualho'oc napaqtec Engiapom Neten ncanec nelliawec jengellancoc jata nelmalhno la apmac'acja la jengellancoc aclequelha la njan apualhoc ma'a,
15
nelliawec apcailhawe mota nelelmalhnoncoma m'a, jengellancoc jata njan caselha actacja la nelelmalhnecama.
16
Jata apquelueto ta lhema engialheng apquelanai'a ncolatsecama ncotno nac jengaqjecmo, elelmalhnesques jata Engiapom Neten cacpota engiancoc aquiennactema apnengiec, coca nietnec na ncolatsecama acmowana jengaqjec, melelmalhnesquesanquec ma'a apquelueto ta apquelano la lhema engialheng.
17
Lhamacjo ncolatsecama nac alelto aluesai'a maniamolhma, coca nietnec ncolatsecama ncotno jengaqjemo.
18
Nelliawec ennenco'o mongelaneianco lhamacjo acnem ncolatsecama apquellelto nac Engiapom Neten apquetcac, ncanec Engiapom Neten apquetca nac apqueltacmelquescama m'a, mancawanquec na nconactewacsec maniamolhma nquen.
19
Nengelliawec na ennenco'o nengellelto Engiapom Neten apquennemolhema, coca apquellelto nac melleliejecjoc malha acnactetema m'a maniamolhma nquen anac.
20
Nengelliawec na apuai'o lhta Engiapom Neten apquetca, jengellanconwai'o lhta njan acnema nengelliamo cacpota angeliecpelcanwomoc ma'a apto jawe ngiapac anque nac ngiapom, nelpasmecjec na ennenco'o m'a aniem'o apquetca Jesucristo. Coca apto Engiapom Neten, apto nja ngiapom jawe ngiapac anque, jengaicamoc na aquiennactema ennengiec ncotnenwaianlha nnelha.
21
Eietcac apquetco'oc, melpasenwom anquec caselha aquiocja alanemmalhca nac.