Capítulo 4
Engiapom Neten apualhoc anac canjan au'alhoc anmelhmacja nac Cristo
1
Quetlhencap elialheng'a asquellamelaiam, menmamonquec tacja aptacja la aplhenammacpo panquec la enenlhet apietnema Engiapom Neten Apualhoc ma'a, coca ellanama ta njan secjec ma'a aptacja la aplhenquescama m'a cacpota eliojoc apqueniemo m'a Engiapon Neten ncanec aplhaniec lhmanquec jam apquetsecama ania'a apquenmopuanca ania'a.
2
Asmac'ac aleltennacsec quetlhencap cacpota eliojoc apietnema la Engiapom Neten apualhoc. Coca enenlhet apto la mei'asqueiam Jesucristo aptaiecjo lhta enenlhet apanque, apuai'o lhta njan nalhepop anac, coca enenlhet ma'a apietnema Engiapom Neten Apualhoc.
3
Coca enenlhet la apiasqueiam ma'a, meietnac Engiapom Neten apualhoc ma'a, nietnec coca au'alhoc apualhoc ma'a anmelhmacja nac Cristo. Apquellengai'a lhta quetlhencap
ma'a ncowac jata jenque'e nalhepop anac au'alhoc anac ma'a, nwai'ac coca njan ma'a.
4
Quetlhencap eietcac, apquelpasmecjec Engiapom Neten quetlhencap, apto neten anquec aquietnema apmopuana mancolhnoc ma'a anmelhmacja nac ma'a, ca ncanec apuanca'ac quetlhencap eltemescasentac coneng apquetsecama ania'a nac apquenmopuanca ania'a.
5
Wanlha mota apquetlheianma ncollatsecama aniem'o apquelpasmecja anmelhmacja nac ma'a, apquellailhawe mota enenlhet anac ma'a apquellelto la njan melleliejecjo Engiapom Neten.
6
Ennenco'o coca nengellelto nelpasmecja Engiapom Neten, jengellailhawe mota m'a apquellelto la apquelleliejecjo m'a, coca manconmac'ac jengellailhoc ma'a apquellelto la apquelleliejecjo anmelhmacja nac ma'a. Netamen enwanca'ac angeluetac enenlhet apto la apietnema Apualhoc acto jawe ngiapac anque ngiapom, nlhoca la njan enenlhet apto la apietnema au'alhoc jengiennenquescama nquen.
Nenga melaiam nqueniemai'ac ma'a Engiapom Neten
7
Quetlhencap elialheng'a asquellamelaiam, enwanca'ac angellamelalhco mota nengiesecsa ennenco'o ncanec nengamelaiam anac nqueniemai'ac ma'a Engiapom Neten. Enenlhet apto la apcamelaiam amota po'oc apto njan Engiapom Neten apquetca apqueliejecjo,
8
coca apto la meniamelaiam po'oc meliajacjoc na Engiapom Neten ncanec Engiapom Neten apto jengamelaiam ngiapom.
9
Awanjec anquec jengellamelaiam Engiapom Neten ca apcapascamo lhta apquetca wanlha apanquec lhema nalhepop anac cacpota jengellancoc aliennactema ennengio'oc,
10
coca acto aquiawai'a nquec jengeluetasquescama jengamelaiam ma'a. Ma lhta ennenco'o angellamelaiacmoc ma'a, aptema apanquec coca jengellamelaiam ma'a Engiapom Neten, apcapascamo lhta njan apquetca cacpota engietsepoc jengiaqmoiecja aniem'o lhta mongeliamolhma engancawec ennenco'o.
11
¡Elialheng'a asquellamelaiam, aquiawai'a nquec jengellamelaiam Engiapom Neten, ncaimelhquec na angellamelalhcoc ennenco'o!
12
Mamma enenlhet apuetai'o Engiapom Neten, coca nengellamelacmo la m'a, eloca ta njan ma'a nengiesecsa ennenco'o, ncowenque pancoc jata nentaicamoc nengeliamolhma aniem'o m'a jengamelaiam anac.
13
Nelliawec ennenco'o nengelpasmecja engancawec Engiapom Neten ncanec jengellaianque lhta Apualhoc apanque,
14
nelliawec na ennenco'o Engiapom apcapascamo lhta apquetca cacpota eluonquesec tep aplhamacjo enenlhet'awoc, jawe ngiapac anquec neluetai'o lhta ennenco'o m'a, nelpaiescamo mota njan apuesai'a m'a.
15
Apto la enenlhet mei'asqueiam Jesús apto Engiapom Neten apquetca, aptec na nengaqtec anquec apasmecja mota m'a.
16
Neluetai'a lhta mota ennenco'o jengamelaiam Engiapom Neten, mongeliasqueiacmo lhta njan jengellamelaiam ma'a ncanec apto jengamelaiam ngiapom. Enenlhet apto la apcamelaiam amota po'oc, apto njan nengaqtec anquec apasmecja Engiapom Neten ma'a.
17
Ncowenque pancoc jata nentaicamoc nengeliamolhma aniem'o nengellamelaiam emmo'oc cacpota njan neluanecamoc aptemacja lhta mota Jesucristo jenque'e nalhepop anac, netamen jata m'a mancoitec jata nellai'a acuo'o ta acnem nemacja jengeliecpelquemo.
18
Enenlhet aquietno la apsaujonwaiacmo nengamelaiam, mamma njan apcaiacja m'a ncanec nengamelaiam anac ntepcasquec apualhoc ma'a apcaiacja la'a, coca aquietno la apcai'a, aniem'o mesaujonwacmo aquietnema apcamelaiam.
19
Nengellamelacmec ennenco'o Engiapom Neten ncanec apmanie panquec jengellamelaiam ma'a.
20
Apto la enenlhet aplheianma mota apcamelaiam Engiapom Neten, coca aptacnewacque mota
engialheng la'a, apmopuana ania'a njan ma'a enenlhet anac. Apto la mengiamelaiam engialheng apuetai'a mota lhamacjo acnem, mengiamelacmoc na Engiapom Neten ma'a meta'ac na m'a.
21
Jengellaianque lhta lhema apaioma Jesucristo, lhta aptemac jeng: "Enenlhet apto la apcamelaiam Engiapom Neten, ncaimelhquec na engiamelemmac engialheng la'a"